上古漢語

上古漢語（粵拼：soeng6 gu2 hon3 jyu5）係最初由古漢語語言學家高本漢主張，由商代（中國青銅時代，公元前11世紀）至東漢或者延伸到西晉（公元2-3世紀）嘅古人講嘅古代中原話。其中又可以細分做幾個時期，即原始漢語（至商代中晚期，有時嘸包含喺上古漢語裏面討論）、早期上古漢語（至戰國）、晚期上古漢語（戰國以後）。呢個詞主要用喺漢語音韻史入面，而呢科嘅宗旨係憑而家有嘅歷史資料去重構古代中文嘅語音。

上古漢語
周代頌鼎上面刻嘅金文
用嘅國家、地區	古華夏（周朝、春秋戰國、秦漢）
講嘅人口	—
系屬	漢藏語系 漢白語族 上古漢語
文字	甲骨文、金文、篆書、隸書
語言代碼
ISO 639-1	無
ISO 639-3	och
Linguist List	och
Linguasphere	79-AAA-a

古文

上古漢語亦係秦漢時期大一統帝國嘅官話，《論語》、《孟子》同《道德經》喺之前嘅時期寫成，而沿用咗二千幾年嘅文言文正正保留咗上古漢語嘅語法同詞彙。

由於喺先秦時期留低嘅音韻書唔多，亦無乜其他語言可以對照，所以上古漢語唔似得中古漢語噉、學界喺語音方面已經取得咗廣泛嘅共識。直到而家啲語言學家都重拗緊一啲重要問題，例如上古漢語中嘅陰聲韻字到底有無濁塞音尾。雖然係噉，複輔音嘅存在同無聲調呢兩點都近乎係定論。

就算今日留低嘅相關資料有所不足，重構上古漢語主要重可以靠幾方面嘅嘢。漢文方面，第一：收集咗上古文學嘅書，譬如《楚辭》同《詩經》，留低咗唔少韻文；第二：兩漢嘅字書，例如《說文解字》、《爾雅》、《釋名》等，有啲好似《輶軒使者絕代語釋別國方言》噉，重會解說當時嘅方音；第三：出咗土嘅甲骨卜辭、銘文嘅鍾鼎、竹簡、帛書；第四：當年四夷、甚至喺泰西嘅種族、國邦名嘅譯音。漢文以外，第一：今日流通各地嘅中國話及各有異同嘅方音，當中閩語因為形成年代早過中古漢語，語言學家又重構出原始閩語，對研究上古漢語好大幫助；第二：日本、朝鮮半島、越南、琉球流傳嘅早期漢字音；第三：藏緬語族、侗台語系、以至南島語系等嘅同源詞，而呢樣同上古漢語嘅關係，學界都爭論咗好多年。

音系

雖然現代漢語冇乜複輔音，但係上古漢語就似乎有。廿一世紀嘅歷史語言學研究者有著力嘗試重新建構上古漢語嘅音系，發現上古漢語似乎有一定量嘅複輔音。根據鄭張尚芳、白一平同埋沙加爾等學者嘅研究，喺上古漢語入便江呢隻漢字係讀做類似 /*kroːŋ/ 噉嘅音嘅—開頭輔音係 /kr/，而且亦有啲學者話上古漢語有 /sn/ 或者 /st/ 等嘅音節開頭輔音串。