世僕制，係一個源自封建社會嘅蓄奴制。喺西晉末「五胡亂華」，唔少嘅人走北方嘅兵亂，去到咗廣東度落腳。其中嘅一啲豪族，征服咗啲弱勢嘅族群同少數民族，將佢哋當成奴隸，仲規定咗佢哋後世嘅子孫，世代都係主人家族嘅奴隸。蒙古人同滿洲人都有相類似嘅制度，蒙古人就稱啲門戶奴隸那可兒，滿洲人就稱做包衣阿哈。
喺廣東各地對呢種世僕，有過唔同嘅稱呼：四邑度係叫做細仔或娣仔，東莞到南海一帶就係會叫家山娣，而新界度就叫細民或下夫。
而喺日本，有著呢種身份嘅奴隸係叫做譜代下人或譜代奉公人，日本各地又有家抱（けほう）、門屋（もんや）、庭子（にわこ）、内百姓等嘅稱呼。
