九不得

九不得，全名為「港澳居民不得從事活動一覽表」，係指一張由台灣內政部移民署喺2023年1月3號公告嘅一張清單，內容明文禁止喺台灣嘅香港人同澳門人參與九種唔同性質嘅活動，內容被指剝奪集會及言論自由，文件上線一天內就被移除，陸委會之後話係「誤植」，但有評論指事件已經損害政府公信力、同埋引發寒蟬效應。

九不得原文

• 不得參加選舉造勢活動或助選活動，如上台發言、隨車遊行。
• 不得參加政治性質公眾活動，如：遊行、抗爭、演說、發放傳單。
• 不得進入軍事國防地區。
• 不得進入國家實驗室、生物科技、研發或其 他重要單位。
• 不得至各軍事基地、要塞堡壘窺視、拍照或攝影。
• 不得從事違反社會善良風俗或危害社會秩序之行為，如賣淫、買春、賭博、買賣毒品。
• 不得未經許可從事工作，如：短期契約工、模特兒走秀。
• 不得接受媒體邀請，上電視（廣播）節目發表意見，如：CALL IN節目。
• 不得違反其他法令有明確規範之行為，如: 刑法、國家安全法、國家機密保護法、反滲透法、社會秩序維護法、政治獻金法等。

各界反應同評論

台灣學者

• 東吳大學政治學系助理教授陳方隅接受BBC中文訪問嘅時候話，無法猜測政府係有心定無意放出呢份文件，但相信唔係空穴來風，顯然內部有該份文件存在，只係官員正在討論未有定案。佢又指，移民署過度防護，甚至有排外同歧視嘅態度。
• 國立政治大學法律學系副教授廖元豪話呢份文件無法律依據，而且下架文件後唔係用「撤回」字眼，而係話「誤植」，引起更多疑惑係法治作業上嘅不良示範。

香港

• 有啲親中派香港媒體喺九不得刊登之後，大肆報道台灣當局反民主，將香港人視作炮灰。

在台港人

• 多名在台港人喺接受媒體訪問嘅時候亦都話憂慮，覺得係白色恐怖，形容「九不得」為「台版國安法」，質疑點解對小粉紅同法輪功都唔限制，反而限制香港人有人甚至話會考慮離開台灣。
• 身在台灣嘅香港時事評論員、律師桑普指事件係低級錯誤，但就好容易成為中國對台灣認知作戰嘅著力點。佢又批評一啲香港嘅親中媒體喺度造謠生事。