喼汁

喼汁（粵拼：gip1 zap1，英文：Worcestershire sauce）係英國一種醬汁，由英國窩士打嘅李派林（Lea & Perrins）響19世紀初發明，味道酸辣，黑色。

李派林喼汁

佢實際上幾時發明已經無從稽考，但係應該係1837年左右。

名

粵語

喼汁個名嘅來源有好幾種講法，邊個先啱已經好難考究。其中一種講法話「喼汁」係英文catsup嘅音譯。Catsup同另一隻英文字ketchup通用，依家通常指茄汁，但亦可以泛指啲酸酸甜甜嘅醬汁。有可能係喼汁喺二十世紀傳入廣東嗰陣，俾英國人俗稱叫catsup，經過音變就成為依家嘅「喼汁」。

另一種講法話「喼」字係嚟自英文嘅give。舊時啲英國人屋企會請啲華人嚟做工人，但係呢啲工人英文又麻麻。假若想叫佢哋攞支喼汁嚟，又費事佢哋聼唔明，就會話「give me that汁」。久而久之，就縮短叫佢做「喼汁」。

仲有種講法話因為喼汁個味澀澀哋，俾人起咗個花名叫「澀汁」，後來傳下傳下就變咗做「喼汁」。

英文

喼汁嘅英文係Worcestershire sauce，又可以叫Worcester sauce。Worcestershire即係英格蘭嘅窩士打郡，而Worcester就係郡府窩士打。喼汁係喺窩士打呢度發明嘅，所以呢隻汁就以呢個地方命名。Worcester個中文名仲可以按官話音譯做「伍斯特」，所以有時會見到有人話喼汁個「正式名稱」係「伍斯特醬」或者「伍斯特郡醬汁」。

歷史

英式喼汁係由John Wheeley Lea同William Henry Perrins兩位化學家發明嘅。佢哋夾份開咗間公司，將佢哋兩個個姓拼埋叫Lea & Perrins（李派林），並喺1837年開始賣喼汁。李派林早期嘅廣告話喼汁嘅配方嚟自郡内某位貴族。而後來亦盛傳係孟加拉前總督Marcus Sandys勳爵1830年代嗰陣喺印度遇著隻差唔多嘅醬汁，先會等返到窩士打之後托兩位整返隻汁出嚟。不過，公司内部文件就提到其實Marcus Sandys勳爵冇做過孟加拉總督，甚至冇去過印度，所以份配方嘅來源仲係一個謎。