嘉禾大廈大火

嘉禾大廈大火（Cornwall Court Fire）係香港2008年8月10號一宗大火，地點喺九龍旺角，彌敦道西側嘅嘉禾大廈。消防處喺中午12點16分將火警升做五級。大火4死55傷，死者包括兩名殉職嘅消防員。呢宗大火係香港21世紀第一單五級大火，對上一次係1996年嘉利大廈大火。

旺角嘉禾大廈發生火警，彌敦道濃煙彌漫。

起火

大火引來唔少途人圍觀

消防員前去救火

大火源於旺角彌敦道687號，嘉禾大廈閣樓一間夜總會。喺香港時間2008年8月10號，上晝9點20分突然起火，大量濃煙，沿著大廈裏便樓梯，湧上高層單位，即係產生煙囪效應。加上大廈通道狹窄，內部聚熱難耐，難以救援。

搶救

警察同消防員喺3分鐘後，即係上晝9點23分到火場。因為接報有十幾名戶住客受困，消防員隨即救援，開出兩條喉同派出一隊煙帽隊入大廈搜索。上晝9點35分，警察將彌敦道往太子方向，近亞皆老街全綫封閉。到9點43分，因為多人被困大廈，消防員將火警升為三級；有住客喺窗邊揮舞毛巾求援，消防員升雲梯，將吸入燶煙不適者救出，由救護員送院治理。

上晝10點23分，消防處將火警升為四級，並將多名傷者分別送去廣華醫院、明愛醫院、瑪嘉烈醫院同埋伊利沙伯醫院；消防員繼續用雲梯救人，警察呼籲快富街同上海街嘅住戶疏散，重要求途人離開附近街道，唔好阻住救援。另一方面，火警中有兩名消防員蕭永方同陳兆龍喺大廈12樓被發現昏迷，由同袍將兩人抬去天台急救。

正午12點，署理九龍副消防總長劉志豪話救出咗60人，其中18人要送院，嗰時重有人致電求救。消防處喺12點派出200名消防員，同埋40架消防車撲救。由於現場溫度好高，撲救困難，消防處喺中午12點16分，將火警升為五級。

下晝1點，消防員動用咗三條消防喉，同五隊煙帽隊繼續撲救。消防出動多架救護車，分別將47名傷者送咗去三間醫院治理，之前昏迷嘅兩名消防員，送院證實死亡。一點半，保安局局長李少光同消防處處長盧振雄親身到火場視察。截至1點45分，消防員經已救出咗60幾名住客；同時，唔少居民重用毛巾或衫，掩住口鼻，等吸少啲濃煙，亦有住戶繼續打電話，或者伸手出窗、搖毛巾等救。

大火下晝3時13分救熄，消防員繼續射水降溫，以免死灰復燃。消防處用咗五條消防喉同 10 隊煙帽隊撲救，出動二百幾名消防員救火。

火後

當晚，警方畀住戶返去單位拎返重要嘢走。之後再封返大廈，住戶暫時唔可以返去。另一方面，幾十名消防員同殉職消防員親屬，喺大廈門口路祭；之後，消防員代表，帶香燭祭品，入災場拜祭殉職同袍。

消防處當日下令全港消防局下半旗致哀，而三名受傷消防員已全部出院。另外，消防處職工總會會繼續跟進消防員死後事宜，為兩個死者設立慰問金戶口，同埋發短訊畀員工，希望佢哋收拾心情。消防處，初步知道兩個殉職消防員事發時，用晒身上所有安全裝備，真正死因，有待部門成立專責小組，調查防煙門同其因素。

死傷人數

大火有兩名消防員殉職，另有兩女死，其一身份未明。而受傷有55人。

殉職

• 蕭永方，男，46歲，消防隊目，隸屬旺角消防局，服務24年，已婚
• 陳兆龍，男，25歲，消防隊員，隸屬旺角消防局，入職一年

死者

• 劉改女，女，77歲；有三成皮膚燒傷，送院後證實死亡
• 一名姓文女子，39歲，佢喺閣樓吸入濃煙致死再俾烈火燒焦，之後俾消防員發現

調查

消防處處長盧振雄，喺大火當日下晝3時話發表初步調查，認為火警無可疑。消防員搶救時，發現夜總會防煙門畀人鎖咗。火警主要發生喺閣樓舞廳，同1字樓卡拉OK，而嗰度並無防煙門，煙同熱力由缺口漫延至上層。現正研究消防裝置，係咪畀人改過以至失效。消防處會由首長級人員，成立專責小組，調查起火同消防員殉職嘅原因。〈旺角火警：災場再發現一具燒焦屍體〉. on.cc. 2008-08-10. 喺2008-08-11搵到.</ref>。與此同時，政府人員帶同調查工具進入火災現場，相信係調查同鑑證呢次起火原因。

措施

交通

• 彌敦道，旺角道到窩打老道一段北行，同旺角道到亞皆老街南行，全綫封閉

巴士

• 凡係以尖沙嘴天星碼頭同佐敦匯翔道為總站，都暫停服務
• 所有經彌敦道北行嘅過海巴士綫，即係九龍方向，以紅磡海底隧道九龍出口巴士站做臨時總站
• 凡係由九龍東去九龍西，都縮短到九龍城迴旋處
• 凡係由九龍東去九龍南，都改行窩打老道、彌敦道南行、加士居道同埋漆咸道北

地鐵

• 凡係由九龍西去九龍南，縮短到深水埗欽州街
• 港鐵旺角站多個出口封閉

各部門措施

• 民政事務總署喺廣華醫院地下、伊利沙伯醫院地下、明愛醫院急症室同瑪嘉烈醫院H座地下大堂，設立跨部門援助站，並分別設置熱線電話畀市民查詢
• 民政事務總署。開放喺旺角綜合大樓二樓嘅旺角社區會堂，畀受影響市民棲身
• 警察喺事發當日，早上設立1條24小時查詢熱綫，畀市民查詢有關意外傷者情況，及向警方提供有關死傷者資料，以協助警方調查。該熱線其後喺當晚9點前取消，但警方繼續呼籲市民提供消息
• 運輸署緊急事故交通協調中心，喺下晝2點，由運作第1級轉為第3級

傳媒

• 無綫電視翡翠台喺《北京奧運 上午直擊》同《北京奧運 下午直擊》節目上以滾動字幕形式，向外發報有關呢次大火最新消息同交通情況。另外，翡翠台喺節目廣告時段加入《特別新聞報道》，報道有關最新消息。

• Now新聞台喺正午十二點報導指有兩名消防員殉職，當時只有Now公佈相關消息。喺下晝兩點半左右，其他電視台同網上傳媒亦陸續公佈相關消息，但根據呢啲報導。醫院相關部門消息，係兩名消防員送院搶救後，延至下晝兩點幾宣佈不治。表示Now報導消息嗰時，嗰兩名消防員重搶救緊，因此部份網民質疑Now有發放假消息之疑。

類同事件

• 1992年澳門永亨銀行大廈京都夜總會大火
• 1996年嘉利大廈大火

參

• 2008年8月10號，ON.CC即時新聞
• 2008年8月10號12點30分，亞洲電視本港台《十二點半新聞》
• 2008年8月10號13點00分，無綫電視翡翠台《午間新聞》
• 2008年8月10號14點00分，亞洲電視新聞財經頻道《新聞報道》
• 2008年8月10號14點50分，無綫電視翡翠台《特別新聞報道》
• 2008年8月10號15點00分，亞洲電視新聞財經頻道《新聞報道》
• 2008年8月10號16點00分，亞洲電視新聞財經頻道《新聞報道》
• 2008年8月10號18點00分，亞洲電視本港台《六點鐘新聞》
• 2008年8月10號18點30分，無綫電視翡翠台《六點半新聞報道》

睇埋

• 香港火災
• 煙囪效應

出面網頁

• 旺角五級火警
• 旺角五級火警(二)
• 旺角五級火警(三)
• 旺角五級火警(四)
• 旺角五級火警(五)
• 旺角五級火警(六)
• 旺角五級火警(七)
• 旺角五級火警綜合報告(附圖)
• 旺角五級火(Youtube)
• 旺角嘉禾大廈五級大火(Youtube)

之前： 嘉利大廈大火（1996年）

香港五級大火

之後： 最新一宗五級火警