土地發展公司

土地發展公司，簡稱土發公司，係喺1988年根據《土地發展公司條例》成立嘅香港公營機構。目標係為咗重建市區，避免香港市區環境進一步惡化，以及改善舊區居民嘅居住環境。土發公司財政自負盈虧，但係後來因為財政問題拖慢重建項目進度，最終政府喺2002年將土發公司解散，改為成立市區重建局。

發展項目

土地發展公司由1988至2002年期間，一共完成咗15個項目（居仁閣屬於房協「市區改善計劃」，起好之後畀土發公司買咗嚟安置重建戶）。

項目名	地區	用途	合作發展商	現況	註
西港城	中西區	商業	無	存在	項目係活化計劃
中環中心	中西區	商業	長實	存在
新紀元廣場	中西區	商業	新世界	存在
高雅閣	中西區	住宅	新世界	存在
高雋閣	中西區	住宅	新世界	存在
皇后大道中152號	中西區	商業		拆咗	前身係仁人酒樓
居仁閣	中西區	住宅	房協	存在	原本係房協嘅「市區改善計劃」項目，土發公司後嚟買咗做安置重建戶嘅住宅
李節花園	灣仔區	住宅	新世界	存在
太源閣	灣仔區	住宅		存在
忻怡閣	灣仔區	住宅		存在
豉油街12號	油尖旺區	住宅		存在	市建局旗下安置重建戶嘅住宅
周大福商業中心	油尖旺區	商業		存在
銀城廣場	油尖旺區	商業		存在
園圃街雀鳥花園	油尖旺區	休憩		存在
東禧閣	九龍城區	住宅		存在	依家係東華三院出租住宅
曦華樓	深水埗區	住宅		存在	單身人士宿舍

展覽中心

1999年土發公司搬咗新辦公室之後，喺中環中心39樓嘅總部整咗個「土發公司展覽中心」，展覽中心分做五個展區，每區都以唔同主題同形式帶出舊區嘅生活實際情況，導致人口老化等嘅問題，包括用模型展示皇后街舊樓林立嘅環境，仿照舊建築「籠屋」入面嘅惡劣環境重現眼前，講述土地發展公司自成立後進行嘅市區重建研究同埋以劇場加埋錄影帶嘅形式帶出市區重建設點樣改善舊區居民環境，並且改善社區。

土發公司認為，唯有將籠屋的居住環境呈現喺參觀者眼前，先可以令佢哋了解喺香港繁榮背後，仍然存在居住問題，對生活無憂嘅下一代嚟講係好好嘅教材。