安慶

  想搵第二個意思嘅話，請睇安慶 (搞清楚)。

安慶
安庆市
簡稱：宜
花名：宜城
安慶位置圖
經緯度 [http:https://geohack.toolforge.org/geohack.php?pagename=%E5%AE%89%E6%85%B6&params=30_53_00_N_117_05_00_E_{{{9}}} 北緯30°53′00″東經117°05′00″]
國	中華人民共和國
省	安徽
地級政區	地級市
轄下一級政區	3區1市6縣
轄下二級政區	19條街道、88個鎮、53個鄉
建城年	1260年
設市年	1927年
市長	魏曉明
市委書記	虞愛華
總面積	15398 km²
人口
總人口(2011)	618.65萬人
市區	195.3萬人
人口密度	344.9人人/km²
民族	漢族
官方語言	普通話
本地語言	淮語、贛語
註	戶籍
經濟
GDP(2012)	1359.7億
人均GDP	25601.58
時間
時區	中國時區（UTC+8）
識別信息
電話區號	+86 (0)556
郵政編碼	246000
車牌	皖H
象徵
市樹	樟
市花	月季
網站： 安慶市人民政府門戶網站

安慶（粵拼：on1 hing3；英文：Anking；普通話拼音：Ānqìng）係中國一城，家下係安徽省西南部一地級市，叫安慶市。大清時係一府，叫安慶府。安徽省名，係安慶同徽州嘅合稱。佢響大清同中華民國期間，係安徽省城，去到第二次世界大戰之後，先讓咗畀合肥。安慶靠近長江水，係中國一埠。

安慶西北面係安徽、湖北、河南接界嘅大別山區，北面係六安，東北係合肥、蕪湖，西面係湖北黃岡，東面係銅陵，東南係池州，南接江西九江。安慶沿長江一帶好多湖嘅。

史

安慶喺漢朝（前2世紀）有城跡，中古時得名「安慶」。1853年到1861年期間係太平天國嘅活躍地。若干年後安慶變成軍工業中心。安慶位置好重要，曾國藩評論：「安慶之得失，定乾坤之轉與不轉。安慶關係淮南之全局，為克復金陵之張本。」所以安慶歷來係兵家必爭之地，曾經重兵駐守。

安慶喺歷史文化上幾豐富。中國第一部蒸汽機、第一部機動船、第一間水廠以及安徽第一間電廠都喺安慶誕生；孔雀東南飛、大小二喬、無過雷池一步、六尺巷呢啲典故就發生喺安慶；文藝上係散文桐城派、戲曲黃梅戲嘅中心，因而有「文化之邦」、「戲劇之鄉」、「禪宗聖地」嘅美譽。出身呢度嘅名人有陳獨秀、趙樸初、鄧稼先、黃鎮。

沿革

宋朝前

• 春秋時安慶潛山係皖國嘅都城，安徽簡稱「皖」就噉來。
• 秦漢時潛山發展成江北重鎮皖城，後來三國時曹操、孫權多次喺度對打。
• 南北朝時，安慶市區、懷寧山口鎮一帶係江北軍事重鎮呂蒙城、皖口城，屬豫州，戰後城池荒廢。
• 唐武德四年（621年）改爲同安郡，至德二年（757年）改盛唐郡，乾元元年（758年）改舒州。

宋朝後

「安慶」呢個名係從南宋紹興十七年（1147年）以軍號出現（安慶軍），「安慶」呢個名係攞「同安郡」（隋大業三年置，治所同安，即而家桐城）同「德慶軍」（北宋政和五年置，治所懷寧，即而家潛山梅城）嘅尾字合成嘅，有「平安吉慶」嘅意頭。

慶元元年（1195年）安慶軍昇爲安慶府，治所喺而家潛山古皖城。舒州嘅古名係「盛唐郡」，最早嘅文獻紀錄係漢武帝喺元封五年（前106年）南巡到呢度，「作盛唐之歌」。而家嘅安慶市區其實係新安慶城，原名叫「宜城渡」，嗰度有座山叫「登雲坡」，原名就叫「盛唐山」，山下臨水就叫盛唐灣古渡。相傳東晉詩人兼風水先生郭璞爬過盛唐山睇長江，話「此地宜城」，所以而家安慶有個別名叫「宜城」。

安慶建城於南宋。嘉定十年（1217年）金兵破光山（而家河南潢川），爲咗抵禦金兵，安慶知府黃干喺舒州故址（而家潛山梅城）「城安慶以備戰守」；後來因為戰亂，端平二年（1235年），安慶府搬咗去羅剎洲、楊槎洲；景定元年（1260年）沿江置制大使馬光祖爲咗防範蒙古軍由水路攻擊南宋國都臨安（而家杭州），而廢舒州府，用原來舒州府嘅城牆磚石喺宜城渡築新安慶府（而家安慶市區），將安慶府治、懷寧縣治搬入新城。因為呢度臨長江、易守難攻，所以府治再無喐過，「安慶」作為地名同政區名相一致而沿用到而家，從建城年起到而家安慶有770年歷史，之後一直到清末都係安慶、懷寧政府駐地，明末以來係巡撫鎮守地方，民國時則係專署駐地。

康熙六年（1667年）拆江南省爲江蘇、安徽二省，省城就係安慶，安徽個名係「安慶」「徽州」嘅頭字合併。乾隆二十五年（1760年）安徽布政使司從江寧（今日南京）搬去安慶，安慶正式升為安徽完全嘅省城。咸豐三年（1853年）太平軍攻佔安慶，安徽省城搬去廬洲（而家合肥），太平天國喺當地持續活動到咸豐十一年（1861年）湘軍攻奪返城池，之後安徽啲衙門搬返來。光緒二年（1876年）據煙臺條約安慶變成對外商埠。

1927年設市，繼續做安徽省城，1938年1月，日本進攻安慶，安徽省府搬趄，至此，安慶做咗170年嘅安徽省城。1949年4月解放軍佔領安慶，後來變成安慶市。

轄下變動年表

安慶專區（1949年到1951年）

• 1949年10月1號，中華人民共和國皖北行署區安慶專區成立，轄懷寧縣、望江縣、宿松縣、太湖縣、岳西縣、潛山縣、桐城縣、桐廬縣（8縣）
• 1951年1月31號，劃懷寧一部分成立安慶市（縣級市），桐廬改名爲湖東縣（1市8縣）
  • 8月18號，安慶市昇爲地級市（8縣）

安慶專區、安慶市（1951年到1956年）

• 1951年8月18號，安慶市昇爲地級市，設中心區、集賢區、大觀區、樅陽區（市4區、專區8縣）
• 1952年3月28號，皖南行署區池州專區畀咗銅陵縣、貴池縣、青陽縣、至德縣、東流縣去專區（專區13縣）
  • 4月15號，中心區併入集賢區，集賢區改名城中區，大觀區改名城西區、樅陽區改名城東區（市3區）
  • 8月7號，安徽省成立，專區同地級市劃歸安徽省。
• 1953年10月7號，桐城畀咗部分去湖東（專區13縣）
• 1955年5月17號，城中併入城西，城西同城東各畀一部分成立郊區（市3區）
  • • 21號，湖東縣改名爲樅陽縣（專區13縣）
  • 6月24號，懷寧畀過部分去郊區（市3區，專區13縣）
  • 9月16號，城西區改名西市區，城東區改名東市區（市3區）
  • 11月，銅陵畀咗部分去蕪湖專區南陵縣（專區13縣）
  • 12月，太湖、懷寧、桐城各畀一部分去潛山，潛山畀咗一部分分畀岳西、桐城，桐城畀咗一部分去懷寧（專區13縣）
• 1956年1月3號，潛山畀咗一部分去桐城，懷寧畀咗一部分分畀潛山、桐城（專區13縣）
  • 1月，岳西畀咗部分去六安專區霍山縣（專區13縣）
  • 5月18號，郊區解散分入西市區、東市區（市2區）
  • 5月，安慶市降爲縣級市，編入安慶專區（專區1市13縣）

安慶專區（1956年到1959年）

• 1956年10月12號，銅陵分出一部分成立地級市銅官山市（1市13縣）
• 1957年8月12號，懷寧畀咗部分去潛山（1市13縣）
  • 11月5號，東流畀咗部分分畀貴池縣、安慶市（1市13縣）
  • 12月，望江畀咗一部分去懷寧，懷寧同太湖各出一部分去望江（1市13縣）
• 1958年8月6號，太湖畀咗一部分去潛山（1市13縣）
  • 9月5號，銅官山市降爲縣級市、編入專區並且改名爲銅陵市，並且將銅陵縣併入銅陵市（2市12縣）
  • 10月，懷寧畀咗一部分分入安慶市、貴池縣（2市12縣）
• 1959年3月22號，青陽併入貴池，東流同至德合併成東至縣，望江同懷寧嘅一部分合併爲懷望縣，懷寧淨低部分併入安慶市（2市9縣）
  • 3月，安慶市重新昇爲地級市（1市9縣）

安慶專區、安慶市（1959年到1965年）

• 1959年3月，安慶市重新成爲地級市，設東市區同西市區（專區1市9縣，市2區）
  • 5月，懷望畀咗部分去銅陵（專區1市9縣）
• 1960年1月7號，銅陵市昇爲地級市（專區9縣）
  • 4月3號，攞咗銅陵市嘅銅陵縣（專區10縣）
  • 5月22號，東市區改名迎江區，西市區改名大觀區（市2區）
• 1961年4月17號，潛山畀咗一部分去太湖（專區10縣）
  • 12月15號，從貴池恢復返青陽，懷望重新分立爲懷寧同望江（專區12縣）
• 1962年5月14號，懷寧畀咗一部分去安慶市大觀區（專區12縣，市2區）
  • 5月，潛山畀咗一部分去太湖（專區12縣）
• 1963年6月，安慶市嘅迎江區、大觀區各畀一部入懷寧，另呢兩個區再各出一部分成立郊區（專區12縣，市3區）
  • 7月24號，安慶市嘅郊區畀咗一部分去東至（專區12縣，市3區）
  • 9月3號，貴池畀咗一部分去懷寧（專區12縣）
• 1965年5月21號，貴池、銅陵、青陽、東至畀咗池州專區（專區8縣）
  • • 25號，安慶市又降爲縣級市編入專區（1市8縣）

安慶專區（1965年到1971年）

• 1965年5月25號，安慶市又降爲縣級市編入專區（1市8縣）
• 1971年3月29號，安慶專區改名爲安慶地區。

安慶地區（1971年到1979年）

• 1973年11月9號，太湖畀咗一部分去宿松（1市8縣）
• 1979年8月6號，桐城畀咗一部分去安慶市（1市8縣）
  • 11月4號，安慶市重新昇爲地級市（8縣）

安慶地區、安慶市（1979年到1988年）

• 1979年11月4號，安慶市重新昇爲地級市，設迎江區、大觀區、郊區（地區8縣，市3區）
• 1980年1月29號，池州地區嘅東至、貴池兩個縣畀入地區（地區10縣）
  • 3月12號，樅陽嘅普濟圩農場畀咗銅陵市嘅郊區（地區10縣）
  • 9月，潛山畀咗一部分去太湖（地區10縣）
• 1987年11月27號，徽州地區嘅石臺縣畀咗地區（地區11縣）
• 1988年8月17號，安慶地區合併到安慶市。

安慶市（1988年至今）

• 1988年8月17號，安慶地區合併入安慶市，然後貴池、東至、石臺3縣畀咗池州地區。（3區8縣）
• 1996年8月20號，桐城縣昇爲縣級市做桐城市。（3區1市7縣）
• 2005年5月13號，郊區分咗一部分分入迎江、大觀，懷寧畀咗一部分去大觀，郊區淨低部分同懷寧、桐城各出嘅一部分合併爲宜秀區。（3區1市7縣）
• 2016年1月，樅陽縣劃出安慶，歸咗銅陵。‎（3區1市6縣）

經濟

2012年安慶GDP達1359.7億人民幣，人均GDP達2萬5601.58文，同沿海地區相差幾遠。而家安慶經濟發展緊，不過城鄉差距幾大，市區一帶作爲河港係個工業、貿易中心，而週邊嘅縣重係以農業為主。目前安慶嘅主要產業重係第一產業，因為週邊多山，茶係重要作物。

安慶地處華中偏東，安慶港係全國十大內河港之一，天柱山機場亦發展緊國內航班，而國家亦搞緊「皖江城市帶承接產業轉移示範區」嘅計劃。而家轄區內有1個國家級開發區、17個省級開發區、同各類工業集中區，而家形成咗石油化工、輕工紡織、汽車附屬品、食品、電機製造、新型建材、文化旅遊、農產品加工呢啲產業為主嘅產業聚集帶。目前國有企業發展慢，而私人企業發展快，外資亦加大投資。出口方面主要出口到日本、美國。重要企業有安慶石化、華茂股份有限公司。

政區

安慶轄3個市轄區，1個縣級市，6個縣。

• 市轄區
  • 迎江區
  • 大觀區
  • 宜秀區
• 縣級市
  • 桐城
• 縣
  • 懷寧
  • 太湖
  • 潛山
  • 宿松
  • 望江
  • 岳西