希特拉靠民主選舉上台謠言

希特拉靠民主選舉上台，係一啲對民主制度或所屬當地民主進程有保留嘅人士，不時會攞嚟引用嘅說法。反駁呢種說法嘅人，一般會批評希特拉當時所用嘅暴力手段，以及當時所謂嘅民主選舉並無俾到真正人民選擇嚟去反駁。

關於說法嘅真偽

反駁呢種說法嘅人指，希特拉雖然參與選舉，但佢用上唔少恐嚇同暴力嘅手段，提倡種族主義灌輸排外仇視猶太人嘅仇恨心理，領導自己所屬嘅納粹黨嗰陣都用上軍事化手段，唔容許有反抗聲音存在。就算手段係一人一票，入面亦冇真正嘅選擇，而係迫人哋投票畀自己。呢啲做法，根本唔可以叫做真正民主選舉，反而係剝奪人權，係最極端嘅獨裁。

再者，就算真正民主制度可以選出一個希特拉，但喺一樣制度之下，仍要可以有新聞自由去監察，換屆嘅時候亦可以用民主選票將希特拉拉落馬。

另外，希特拉喺德國政府當權之前，佢同佢領導嘅納粹黨，雖然日漸取得越來越多嘅支持，但始終攞唔到過半選票。例如喺1932年嘅德國總統大選入面，就有53.0%嘅人投咗俾佢嘅主要對手興登堡，而希特拉自己就只係得36.8%嘅選票。而去到1933年2月27號，納粹黨掌權後對德國共產黨進行插贓嫁禍（國會縱火案）之後嘅選舉，納粹黨都只係攞到4成坐緊嘅選票，唔能夠喺國會攞到過半議席。連同佢建立衝鋒隊喺德國挑起，針對反對佢嘅人嘅武鬥案件同恐怖襲擊，佢都要1933年11月選舉先至一統國會，驅逐所有反對佢嘅人。

引用謠言嘅例子

• 喺推動香港就基本法23條立法期間，當時嘅保安局局長葉劉淑儀就曾經話民主幫助希特拉上台，並導致後嚟嘅大屠殺，仲話民主唔係解決所有問題嘅萬靈丹。呢句話當時引起社會嘩然。
• 中國海協會長陳德銘喺2015年訪台期間，就曾經提及呢個說法，之後被民運人士王丹批評無知，對唔住自己嘅歷史專業。