慢鏡重播
慢鏡重播（又叫做慢動作或者即時回放）係指比賽嘅時候，裁判喺得分或者犯規發生之後，馬上（或者喺極短時間之內）通過睇返事發當時嘅錄像，決定得分有無效或者犯規成唔成立。
應用 編輯
美式足球 編輯
美國國家美式足球聯盟（NFL） 編輯
對陣雙方每半場各有三次暫停（英文：timeout），呢三次暫停可以用來要求裁判睇返慢鏡重播（專業術語叫做『挑戰裁判』），以確定裁判嘅判決成唔成立。如果慢鏡重播確定裁判判決正確，挑戰裁判嘅球隊就會被扣除一次暫停，因此如果一支球隊剩返最後一次暫停，就唔可以再挑戰裁判；如果確定裁判判決錯咗，就唔使扣除暫停，兼且被慢鏡重播證明係錯誤嘅判決會被人推翻。
任何裁判可以喺任何時候要求睇返慢鏡重播，而唔影響任何一方。
裁判祇可以睇返涉及以下狀況嘅慢鏡重播：
- 得分有無犯規在先；
- 傳球成功定係失敗；
- 係唔係截球；
- 帶球員有無出到界；
- 生波有無出界；
- 合法向前傳球有無被唔合法接球員或者防守方球員掂到（根據規則，祇有外接球手、近端鋒或者二分衛可以接住向前嘅傳球）；
- 四分衛嘅掟波應該算係傳球定係甩手（英文：fumble）；
- 向前傳球有無犯規（根據規則，祇有四分衛同埋二分衛可以向前傳球）；
- 傳球係向前定係向後（根據規則，向後傳球失敗視同甩手）；
- 帶球員係唔係已經被防守方球員推倒；
- 進攻方能唔能夠獲得一檔；
- 踢球時防守方隊員有冇掂到個波；
- 個波嘅位置；
- 任意一隊係唔係太多人上咗場（根據規則，美式足球每隊最多11人，加拿大式足球每隊最多12人）。
全美大學體育協會（NCAA） 編輯
全美大學體育協會沿用國家美式足球聯賽關於即時回放嘅規則，同時允許各個賽區自己決定即時回放設備嘅標準。
目前，甲一組（Division I FBS）全部比賽都應用即時回放，甲二組（Division I FCS）季後賽、乙組（Division II）同埋丙組（Division III）嘅全國總決賽都使用即時回放。
加拿大式足球 編輯
加拿大加式足球聯賽（CFL） 編輯
加拿大加式足球聯賽大致沿用美國國家美式足球聯賽關於慢鏡重播嘅規則，但係有例外：
- 每支球隊每場比賽只能夠挑戰裁判兩次，但係如果一支球隊喺同一場比賽裡面連續兩次挑戰裁判成功，就會自動獲得第三次機會；
- 由於每支球隊每半場比賽只能夠請求一次暫停，因此第一次挑戰失敗唔會導致扣除暫停；球隊可以喺剩返一次暫停嘅時候挑戰裁判；
- 球隊唔可以喺法定時間最後三分鐘之內或者加時階段挑戰裁判，但係任何裁判都可以喺任何時候要求覆核慢鏡重播，而唔影響任何一方。
加拿大大學校際體育總會（CIS） 編輯
加拿大大學校際體育總會唔強制屬下院校用慢鏡重播。
籃球 編輯
美國國家籃球聯賽（NBA） 編輯
美國國家籃球聯賽規定：裁判必須靠睇返慢鏡重播來確定：比賽最後一刻出手嘅射球（『壓哨球』），喺法定時間結束之前離開咗球員雙手未。
可以睇慢鏡重播覆核嘅其他情況包括：
- 球員有無參與場上打鬥；
- 球員射球嘅時候，雙腳係喺三分線以外定以內；
- 針對某次犯規，應該射幾多次罰球；
- 從計時設備失靈到下一次開波之間嘅時間（同時亦係重啓計時設備之後應該扣除嘅時間）。
全美大學體育協會（NCAA） 編輯
全美大學體育協會特別規定：覆核即時回放時候，祇有比賽計時器上面嘅0可以作為法定時間結束嘅依據，汽笛聲或者籃板上面嘅紅燈就唔得。
意大利甲組籃球聯賽（Lega Basket Serie A） 編輯
意大利甲組籃球聯賽大致沿用全美大學體育協會嘅慢鏡重播規則，但係同時允許教練每場比賽挑戰裁判兩次。
裁判可以通過睇慢鏡重播來判定控球權。
歐洲籃球聯賽（Euroleague Basketball） 編輯
歐洲籃協規定：
- 所有歐洲籃球聯賽賽事中，通過睇慢鏡重播作出嘅、關於壓哨球嘅判決，都係有效而且合法嘅；
- 籃框着燈可以作為法定時間結束嘅依據，但係汽笛聲就唔可以。
網球 編輯
喺職業網球裏面，以『鷹眼』同埋MacCAM為代表嘅慢鏡重播系統已經得到廣泛應用。呢類即時回放設備通過高速攝像機拍攝同埋電腦計算，可以準確咁計算出網球落地嘅時候有無出界。
國際網聯規定：每位運動員每盤比賽有三次機會要求覆核慢鏡重播，搶七局就祇有一次機會。如果慢鏡重播證明裁判誤判嘅話，咁要求覆核嘅運動員就會再獲得一次要求覆核嘅機會。
法國網球公開賽由於場地條件限制（大滿貫賽事當中祇有法國公開賽嘅場地係紅土賽場，其他嘅就全部都係硬地賽場），所以用唔到『鷹眼』，但係運動員可以要求裁判用肉眼覆核網球著落地嘅位置。
橄欖球 編輯
聯盟式橄欖球有專門睇慢鏡重播嘅裁判，稱為『慢鏡裁判』。慢鏡裁判可以喺主裁判嘅要求下覆核慢鏡重播。
絕大部份時候，慢鏡裁判可以喺場上裁判睇漏眼嘅時候提醒主裁判場上有人犯規，包括犯規在先嘅得分。唯一嘅例外係向前傳球：就算場上裁判睇漏眼都好，慢鏡裁判睇到向前傳球唔可以通知主裁判，因為攝影機嘅角度有可能導致誤判。
聯合式橄欖球關於慢鏡重播嘅規則，同聯盟式橄欖球大致一樣。
冰球（冰上曲棍球） 編輯
國家冰球聯賽（NHL） 編輯
國家冰球聯賽全部比賽都有慢鏡重播。裁判可以通過慢鏡重播判定得分係唔係犯規在先。
足球 編輯
國際足協係一直明文禁止用慢鏡重播同埋其他任何技術協助。現任國際足協主席白禮達聲稱『誤判都係足球比賽一部分』，引起球迷不滿。
關於裁判使用慢鏡重播嘅爭議，喺2004年亞洲盃同埋2009年洲際國家盃期間再次成為話題：
- 2004年亞洲盃總決賽中國對日本，下半場20分鐘，中田浩二嘅入球被現場慢鏡重播確定係手球，但係主裁判依然判入球有效。
- 洲際國家盃小組賽巴西對埃及，下半場第43分鐘，埃及後衛阿穆哈馬迪用手臂擋出巴西嘅射球，主裁判先係判角球，然後又改判12碼並且將阿穆哈馬迪紅牌罰出場。埃及上訴，因為質疑係第四裁判睇到慢鏡重播之後通知主裁判先至會導致改判。事件導致國際足協要求撤走所有場上顯示器。
呢個爭議喺2010年南非世界盃期間進入白熱化：
- 6月18日，C組第二輪，美國對斯洛文尼亞。比賽開始咗10秒鐘左右，美國隊8號丹比斯（Clinton Drew Dempsey）同斯洛文尼亞隊9號遼比仁基治（Zlatan Ljubijankič）爭緊一個高空球，遼比仁基治落地之後即刻跌低咗，雙手揞住塊面係咁打關斗。慢鏡頭顯示，丹比斯搶球嘅時候用左手踭打咗遼比仁基治[1]。伊個動作本來拿得紅牌，但係馬里籍主球證古利巴利（Koman Coulibaly）只係口頭警告丹比斯[2]。同一場比賽，美國上半場落後兩球，下半場快攻追返兩球。比賽第85分鐘，後備入替嘅伊度（Maurice Edu）嘅入球被古利巴利判咗無效。美國隊長當奴雲（Landon Donovan）質問裁判點解入球無效，裁判嘅回答竟然係「唔話你知」[3][4]。
- D組最後一輪分組賽，塞爾維亞對澳洲。塞爾維亞一定要賽和先至晉到級去十六強，但係打到第80分鐘依然落後緊1–2。第89分鐘，塞爾維亞前鋒維迪治（Немања Видић/Nemanja Vidić）嘅射門打中喺禁區裏面嘅澳洲球員卡曉（Tim Cahill）隻手，本來贏到12碼，但係球證拉里安達（J. L. Larrionda Pietrafesa）無任何表示。最終，塞爾維亞輸1-2被淘汰。賽後，塞爾維亞領隊安鐵治（Radomir Antić）話：塞爾維亞遭遇咗最黑暗嘅一日[5]。
- 而喺之前嘅兩輪比賽入面，澳洲隊同樣被人砌咗生豬肉：第一輪對德國，核心球員卡曉鏟球失敗被球證直接用紅牌罰出場，但係慢鏡頭顯示佢鏟球嘅時候有一個明顯嘅收腳動作，最後淨係膝頭哥撞親德國球員舒雲史泰加（Bastian Schweinschteiger）[6][7]；第二輪比賽，喺領先緊加納一球嘅大好形勢下，澳洲嘅基維爾（Harold Kewell）因為喺禁區裏面手球，被球證判咗12碼兼直接用紅牌罰落場。賽後多個傳媒表明：判12碼無可爭議，但係慢鏡頭顯示，個球打中咗基維爾上臂同膊頭中間嘅部位，而且基維爾無故意手球嘅跡象，直接紅牌罰落場明顯係嚴到過晒龍[8][9]。
- G組第二輪，巴西對象牙海岸，法比亞諾（Luís Fabiano Clemente）喺第50分钟两次挑球加两次手球攻入一球，但係法國籍主裁判就睇漏咗眼。第87分鐘，象牙海岸嘅基達（Abdul Kader Keïta）回防嗰陣時個身被卡卡（Kaká）用手踭顶咗一下，即刻就揞著塊面冧低咗。卡卡食咗黃牌，單場累計兩黃一紅被人罰落場。但係慢鏡頭顯示，基達冧低擺明係插水。卡卡入到球員通道嘅時候喊咗。[10]。
- 八強阿根廷對墨西哥。第25分鐘，泰維斯（Carlos Tévez）射入咗阿根廷嘅第一個入球。但係慢動作顯示泰維斯接應美斯嘅傳球嘅時候好明顯已經越咗位。墨西哥球員圍著球證爭論，但係意大利籍主球證羅西鐵（Roberto Rosetti）堅持判入球有效。
- 本屆世界盃最震撼嘅誤判：八強德國對英格蘭。英軍喺比賽早段因後防兩次失誤落後緊1–2。第38分鐘，英格蘭中場林柏特（Frank Lampard）遠射中楣彈入，個球明顯越過白界至少50公分。然而當時主球證拉里安達同旁證都認為個球並未過白界，令到英格蘭錯失追平比分嘅機會。下半場開始之後，英軍全面進攻而忽略咗後防，被德國再入兩球，最後以1–4大敗完場。事件震驚全球，包括路透社[11]，法新社以及美聯社[12] 紛紛喺頭版抨擊當事球證以及國際足聯對誤判嘅無原則妥協政策，其中法新社更加形容事件係「世界盃歷史最嚴重嘅誤判」，並且聲稱個球已經過咗白界92公分，接近一米[13]。當時喺加拿大參加G20峰會嘅德國總理安格拉·默克爾同英國首相大衛·金馬倫一齊睇直播，賽後默克爾親自向卡梅倫道歉[14]。但係國際足協主席白禮達賽後表示：裁判誤判是「人之常情」，並且重申國際足協唔會採用任何非人為操控嘅判罰系統[15]。但係到咗6月29日，白禮達馬上改咗口，表示國際足協將會重啓引用慢鏡重播「協助」球證執法嘅討論，重話「國際足協唔考慮高科技龍門線技術」嘅講法完全係「亂噏廿四」，并且特登向英格蘭同墨西哥道歉[16]。
- 八強西班牙對葡萄牙。第63分鐘，略倫迪（Fernando Llorente）、恩尼斯達（Andrés Iniesta Luján）、靴南迪斯（Xavier "Xavi" Hernández i Creus）禁區前連續配合，靴南迪斯腳踭後傳畀大衛•韋利亞（David Villa），喺細禁區邊緣嘅射門被愛德華度•卡華略（Eduardo Carvalho）撲出，大衛韋利亞即刻補射入網。西班牙伊個入球有兩大疑問：1. 靴南迪斯接應恩尼斯達嘅傳球之前越過位，有越位接球嘅嫌疑；2. 隨後靴南迪斯腳踭後傳畀大衛•韋利亞嘅時候，大衛•韋利亞有無越位都是一個疑問。當時葡萄牙後衛關特朗（Fábio Alexandre da Silva Coentrão）喺防線嘅最後邊，但係慢鏡頭都睇唔出佢同大衛•韋利亞焉個更靠近卡華略。賽後，巴西環球電視台用3D影像還原技術重建咗伊個入球，重建嘅證據顯示：靴南迪斯傳球嗰一刻，大衛•韋利亞身位超過關特朗22公分，即係話大衛•韋利亞係越位在先。
- 四強烏拉圭對荷蘭。第70分鐘，史乃達（Wesley Sneijder）禁區邊緣起腳嘅時候，有荷蘭球員明顯越咗位，但係旁證無舉旗，史乃達伊球擦入側網，荷蘭終場以一球險勝烏拉圭。
- 總決賽西班牙對荷蘭。上半場中段，荷蘭中場德容（Niger de Jong）喺明顯無可能搶到個球嘅情況下仍然起飛腳，直接踢中西班牙中場沙維·阿朗索個心口。賽後，大家普遍認為球證應該直接紅牌罰德容落場，但係英格蘭籍主球證韋伯（Howard Melton Webb）手下留情，淨係用黃牌警告咗德容。此外，荷蘭重有幾次惡劣犯規，都被主球證輕判。同一場比賽，加時下半場，荷蘭前場開出自由球打中西班牙嘅人牆彈咗出底線，理應係荷蘭角球，但係主球證就判咗西班牙龍門球。結果西班牙食住上，並以1-0勝出奪冠。隨後荷蘭球員馬泰臣（Joris Mathijsen）向主球證投訴嘅時候食咗黃牌。
參考 編輯
- ↑ 〈酷6网视频：邓普西肘击对手柳布尔扬基奇〉. 原著喺2021年1月10號歸檔. 喺2013年2月19號搵到.
- ↑ 〈邓普西肮脏肘击对手太阳穴 美国老将竟躲过红牌〉. 原著喺2011年5月1號歸檔. 喺2013年2月19號搵到.
- ↑ 多诺万：没有犯规为何吹掉进球 裁判：不告诉你
- ↑ 陆俊式判罚再次袭击美国！ 究竟什么让他非吹不可
- ↑ 〈塞尔维亚主帅怒斥裁判漏判点球 称遭遇黑暗一天〉. 原著喺2020年9月22號歸檔. 喺2013年2月19號搵到.
- ↑ 〈卡希尔直接红牌引发争议 过严判罚催生最大比分〉. 原著喺2020年11月17號歸檔. 喺2013年2月19號搵到.
- ↑ 世界杯小组赛14大争议判罚：德西又占便宜又吃亏
- ↑ http://2010.sohu.com/20100626/n273096218.shtml 互聯網檔案館嘅歸檔，歸檔日期2020年7月14號，. 细数本届世界杯五大误判 揭秘裁判南非奢华生活
- ↑ 〈裁判红牌惹争议 科威尔：他毁了我的世界杯之旅〉. 原著喺2020年7月14號歸檔. 喺2013年2月19號搵到.
- ↑ 〈阿斯报：桑巴军团成功 法比亚诺手球骗过裁判〉. 原著喺2010年6月26號歸檔. 喺2013年2月19號搵到.
- ↑ Analysis: Germany see off team that never turned up
- ↑ Germany gets lucky break, beats England
- ↑ 法新社：世界杯历史最严重误判 皮球已越门线一码
- ↑ 默克尔就争议球表达歉意 英国首相：结果非常遗憾
- ↑ 布拉特：不会采用门线技术手段 误判也是人之常情嘛
- ↑ 国际足联主席布拉特“松口”考虑引进高科技
