摔角,中國大陸叫摔跤,係古希臘發展出嚟嘅一種運動項目,根據希臘神話嘅傳說記載,摔角係由英雄德修斯(Theseus)所創。

"摔角手" -古典摔角-

摔角可以分為古典式;又稱為希臘羅馬式(Greco-Roman wrestling),同埋自由式(freestyle wrestling)兩種。

乜嘢係摔角? 編輯

狗仔或者貓仔有啲好似打交咁樣嘅嬉戲,但係呢種咁樣嘅嬉戲,雙方都唔會傷害對方,而呢一種咁樣形式嘅打交,其實已經係一種動物版本嘅摔角。

而人類嘅摔角最初係由祭神儀式開始,因為係格鬥技關係,總畀人覺得係啲打打殺殺嘅嘢,但係喺人類歷史入面,摔角從來未曾試過作為廝殺用途。

簡史 編輯

喺無乜娛樂嘅古代社會,人類一直用呢種角力運動嚟嬉戲,玩玩吓越玩越刁鑽,結果就不斷諗出各種技術同玩法,摔角就係咁誕生。所以,摔角原本就係一種唔會傷害對方身體嘅角力格鬥遊戲,而唔係以殺死或傷害對方為目的嘅戰爭式格鬥。喺古代嘅奧林匹克運動會入面,摔角一早就係正式嘅項目。喺希臘設有稱為"競技場"嘅年青人修練場,喺嗰度進行摔角同社會教育,因為咁樣,所以摔角對古希臘人嚟講,亦係一種教育手段。

人類赤裸身體,互相競賽「心」、「身」同「技術」 嘅簡單運動-摔角,喺人類文化發展中一直扮演住重要一環,唔理喺乜嘢時代,摔角手都零捨受人尊敬,咁除咗因為摔角手曾經係宗教儀式一部份,同時亦因為摔角手係集「心」、「體」、「技術」三者合一嘅卓越強者,摔角手所呈現畀世人嘅係一種具人性魅力嘅人物。

一般運動形式入面,會有包括殘留狩獵形態嘅運動好似足球欖球,或者係具有宗教儀式嘅運動好似體操跳水咁,又有比試人類體能嘅運動好似田徑。而摔角就可歸屬晒所有運動形式嘅領域,同其他運動都無嘅獨特文化性,總之,自古摔角就被認為係增長人類魅力嘅身體活動同文化。呢啲都係點解佢即使係古老運動,但今日仍然可以普及,而且發展到全世界嘅原因。

類型 編輯

摔角通常都係指奧林匹克項目入面嘅業餘摔角(Amateur Wrestling),分為古典式;又稱為希臘羅馬式(Greco-Roman wrestling),同埋自由式(freestyle wrestling)兩種。亦有純表演用嘅職業摔角,不過職業摔角業餘摔角其實係兩樣好唔同嘅嘢嚟。

喺摔角裡面絕對唔會有拳打腳踢嘅招式,因為摔角本來就唔係一種需要傷害對手嘅格鬥,但職業摔角由於係用嚟表演,為咗增加感官剌激,所以先加入拳打腳踢嘅招式。

除咗呢幾種摔角之外,亦有喺蒙古發展出嚟嘅蒙古摔跤蒙古摔跤又有佢一套獨特嘅技巧同規矩。

摔角入面有好多好實用嘅格鬥技巧,尤其用喺制服對手方面嘅技巧,所以喺混合格鬥界亦有好多擅長摔角嘅格鬥家,其中以一啲關節技(Submission)最多人用,另外摔角入面嘅一啲防衛技巧亦好適合用喺混合格鬥入面,所以摔角係武術界其實好受到重視。

規則 編輯

業餘摔角嘅規則比職業摔角復雜得多,用唔同嘅招式有唔同嘅攞分方法,男子摔角同女子摔角嘅規則又有分別,基本上摔角嘅目的係為咗制壓對手,意思就係制服同壓止對方嘅活動,而喺比賽上會以限時入面最先令對手兩個博頭掂地為之贏,如果喺限時入面壓制唔到對手,就會用分數定勝負,至於計分方法就會根據唔同類型嘅摔角而有唔同。

相關 編輯