曹操(「操」可讀「粗」或「燥」音;155年220年),字孟德maang6 dak1),沛國譙縣(安徽省亳州市)人[1],細個時嘅乳名叫阿瞞aa3 mun4),有一個名叫吉利gat1 lei6[2],係東漢末年出名嘅軍事家政治人文學家三國時代魏國嘅奠基人同埋主要締造者。

曹操
曹操像
東漢 魏王、丞相、冀州牧
155年
220年
繼任 曹丕(魏王、丞相、冀州牧)
仔女 曹昂曹丕曹彰曹植曹熊曹沖
遞啲名
孟德

生平 編輯

早年 編輯

中平元年(184年),東漢爆發咗黃巾之亂,嗰時擔任騎都尉嘅曹操奉朝廷嘅命令,到潁川鎮壓。平定亂事後嘅佢升做濟南相,係任內打擊當地嘅貪官同埋邪教[3]。後尾漢靈帝駕崩,宮廷係經過一連串嘅混亂後,由西涼嚟嘅軍閥董卓專權,曹操由於睇唔慣董卓擅自廢帝嘅暴行而走咗去陳留[4],然後用晒啲家產係當地招兵買馬[5],聯合其他諸侯組成討伐董卓聯盟,但係聯盟最終因為諸侯內訌而解散,曹操亦都因為係榮陽之戰中損失慘重而去淮南募兵[6]

征戰中原 編輯

初平三年(192年),曹操平定兗州嘅盜賊,自立做兗州刺史,並且趕走咗朝廷委派嘅兗州刺史金尚[7]。到咗195年,曹操已經喺兗州鞏固成一個勢力。董卓被王允呂布謀殺後,佢嘅手下李傕同埋郭氾推翻咗王允嘅統治,並且趁機控制政府[8],之後兩人為咗爭權奪利而互相攻打,漢獻帝趁亂逃離長安,進入安邑[9]。曹操聽從軍師荀彧嘅建議,迎接獻帝,獻帝俾咗曹操錄尚書事[註 1]嘅權力。之後,曹操又聽從董昭嘅建議,將都城由洛陽搬去許昌[10]。曹操之後係建安三年(198年)消滅割據徐州呂布[11]。第二年,割據淮南嘅袁術病死,領土被曹操兼併。曹操係消滅中原嘅其他軍閥後統一咗中原[註 2],並且開始同北方嘅軍閥袁紹爭奪天下。

統治北方 編輯

建安五年(200年),曹操喺官渡河北袁紹展開官渡之戰,最後曹操贏咗,第二年再度打敗入侵嘅袁紹,激到袁紹一病不起,喺建安七年(202年)病死[12]。曹操喺之後嘅7年內平定咗成個河北,嗰陣嘅曹操已成為最強嘅諸侯。建安十三年(208年),曹操自立做丞相[13],並且喺同年嘅七月南征荊州[14],同年八月,荊州牧劉表病死,佢個細仔劉琮投降[15],曹操因此攞到成個長江以北嘅荊州地區。雖然曹操睇嚟就嚟統一天下,但佢喺赤壁之戰輸咗畀孫權同埋劉備,令到佢統一天下嘅機會就咁冇咗。建安十六年(211年)七月,曹操開始遠征西涼[16],平定嗰頭嘅馬超韓遂等軍閥,馬超逃往漢中,而韓遂就俾部下殺害,曹操係第二年班師回朝[17]。自嗰陣時開始,曹操統一咗中原北部嘅大部分地區。佢喺213年自封為魏公,216年自封為魏王,最後喺220年死咗[18],諡號係「魏武王」,佢個位由佢嘅二仔曹丕繼承,曹丕篡位後追尊曹操為「魏武帝」。

身後 編輯

後事 編輯

曹操離世之後,佢個仔曹丕繼承佢魏王、丞相、冀州牧之位[19]。同年十月廿九日,曹丕篡漢,逼漢獻帝退位禪讓俾自己,建立曹魏,年號黃初,定都洛陽。佢封咗劉協做山陽公[20],並且追尊曹操為太祖武皇帝

墓葬 編輯

曹操死之後葬咗喺高陵[21],高陵係2009年12月俾人搵到。

屋企人 編輯

祖父輩 編輯

  • 曹騰(100年-159年),東漢宦官,曹操阿爸曹嵩係佢嘅養子。
  • 曹褒,潁川太守,曹仁嘅阿爺。

父輩 編輯

  • 曹嵩(?-193年),曹操嘅老竇,宦官中常侍、曹丕稱帝之後,追尊曹嵩為太皇帝。
  • 曹熾,侍中、長水校尉。曹褒個仔,曹仁、曹純阿爸。
  • 曹鼎,尚書令、河間相、吴郡太守。曹洪嘅伯父,曹休嘅阿爺。

細佬 編輯

  • 曹德(?-193年),同佢老竇曹嵩被陶謙嘅人殺。
  • 海陽哀侯,唔知佢名,佢個女嫁夏侯淵個仔夏侯衡。
  • 曹彬,曹操個仔曹均嘅養父。
  • 曹操細佬,唔知佢名,佢個仔係曹安民
  • 曹操細佬,唔知佢名,佢個女嫁畀孫堅個仔孫匡

堂兄弟 編輯

  • 夏侯惇(?-220年):字元讓,係曹操嘅最信嘅人。
  • 夏侯淵(?-219年):字妙才,夏侯惇嘅族弟,老婆係曹操嘅原配夫人丁氏個妹。佢個仔夏侯衡娶曹操細佬海陽哀侯個女。
  • 曹仁(168-223年):字子孝,太祖嘅從弟。
  • 曹純(170-210年):字子和,曹仁細佬。
  • 曹洪(?-232年):字子廉,太祖嘅從弟。

妻妾 編輯

曹操正妻同側室,可以搵《魏志·后妃傳》同《武文世王公傳》,有十五位被記載:

編輯

據《魏志·文帝紀》、《任城陳蕭王傳》、《武文世王公傳》,曹操有25個仔,佢哋係按照著佢老母嘅地位排列,唔知佢哋嘅年齡順序:

  • 曹昂(? - 197年),劉夫人大仔,曹操嘅庶大仔,但係畀曹操原配丁氏養大。
  • 曹丕(187年 - 226年),卞皇后嘅大仔,魏文帝。
  • 曹彰(? - 223年),卞皇后嘅二仔,又叫「黃鬚兒」。
  • 曹植(192年 - 232年),卞皇后嘅三仔,叻文學。
  • 曹熊(? - ?),卞皇后嘅細仔,早死。
  • 曹鑠(? - ?),劉夫人嘅細仔,早死。
  • 曹沖(196年 - 208年),環夫人嘅大仔,著名神童,13歲早死。
  • 曹據(? - ?),環夫人嘅二仔。
  • 曹宇(? - 278年),環夫人嘅細仔,魏元帝曹奐嘅老竇。
  • 曹林(? - 256年),杜夫人嘅大仔。
  • 曹袞(? - 235年),杜夫人嘅細仔。
  • 曹玹(? - ?),秦夫人嘅大仔,早死。
  • 曹峻(? - 259年),秦夫人嘅細仔。
  • 曹矩(? - ?),尹夫人嘅獨生仔,早死。
  • 曹幹(214年 - 261年),佢生母陳氏過身後,被王夫人養大。
  • 曹上(? - ?),孫姬嘅大仔,早死。
  • 曹彪(195年 - 251年),孫姬嘅二仔,之後同王凌謀反失敗,被賜死。
  • 曹勤(? - ?),孫姬嘅三仔,早死。
  • 曹乘(? - ?),李姬嘅大仔,早死。
  • 曹整(? - 218年),李姬嘅二仔。
  • 曹京(? - ?),李姬嘅仔,早死。
  • 曹均(? - 219年),周姬嘅獨生仔。
  • 曹棘(? - ?),劉姬嘅獨生仔,早死。
  • 曹徽(? - 241年),宋姬嘅獨生仔。
  • 曹茂(? - ?),趙姬嘅獨生仔,同曹操、曹丕唔啱。

編輯

曹操嘅女,考証到嘅有6位:

另外《昭明文選陸機《吊魏武文》李善嘅注引《魏略》話:太祖杜夫人生沛王豹及高城公主。唔知高城公主同金鄉公主係唔係同一個人。

侄輩 編輯

  • 曹安民,曹操嘅侄仔。
  • 曹休(?-228年):字文烈,太祖嘅族仔。
  • 曹氏,曹操細佬海陽哀侯(佚名)個女,嫁畀夏侯衡
  • 曹氏,曹操嘅侄女,嫁畀孫匡

養仔 編輯

曹操嘅養仔,考証到嘅有3位:

  • 曹真(?-231年):字子丹,老竇係曹邵,一係姓「秦」。
  • 秦朗(?-?),曹叡嘅近臣。生父係秦宜祿,被張飛殺死。老母係曹操嘅妾杜夫人。
  • 何晏(?-249年),大將軍何進嘅孫,曹操嘅女婿,三國時期嘅玄學家。老竇何咸早死,老母係曹操嘅妾尹夫人。

後裔 編輯

參攷 編輯

引用 編輯

  1. 《三國志·魏書一·武帝紀》:太祖武皇帝,沛國譙人也,姓曹,諱操,字孟德,漢相國參之後。
  2. 《曹瞞傳》:太祖一名吉利,小字阿瞞。
  3. 《三國志·魏書一·武帝紀》光和末,黃巾起。拜騎都尉,討潁川賊。遷爲濟南相,國有十餘縣,長吏多阿附貴戚,贓污狼藉,於是奏免其八;禁斷淫祀,姦宄逃竄,郡界肅然。
  4. 《三國志·魏書一·武帝紀》:卓到,廢帝爲弘農王而立獻帝,京都大亂。卓表太祖爲驍騎校尉,欲與計事。太祖乃變易姓名,間行東歸。
  5. 《三國志·魏書一·武帝紀》:太祖至陳留,散家財,合義兵,將以誅卓。冬十二月,始起兵於己吾
  6. 《三國志·魏書一·武帝紀》:太祖兵少,乃與夏侯惇等詣揚州募兵
  7. 《魏略·卷六》:金元休名尚,京兆人也……獻帝初為兗州刺史,東之郡,而太祖已臨兗州。尚南依袁術。
  8. 《三國志·魏書一·武帝紀》:司徒王允與呂布共殺卓。卓將李傕、郭汜等殺允攻布,布敗,東出武關。傕等擅朝政。
  9. 《三國志·魏書一·武帝紀》:是歲,長安亂,天子東遷
  10. 《三國志·魏書一·武帝紀》:天子還洛陽……太祖遂至洛陽,衞京都,暹遁走。天子假太祖節鉞,錄尚書事……洛陽殘破,董昭等勸太祖都許。
  11. 《三國志·魏書七·呂布臧洪傳》:建安三年……太祖自征布……太祖塹圍之三月,上下離心,其將侯成、宋憲、魏續縛陳宮,將其衆降……布與其麾下登白門樓。兵圍急,乃下降。遂生縛布……於是縊殺布。布與宮、順等皆梟首送許,然後葬之。
  12. 《三國志·魏書六·董二袁劉傳》:自軍敗後發病,七年,憂死。
  13. 《三國志·魏書一·武帝紀》:十年春正月……漢罷三公官,置丞相、御史大夫。夏六月,以公爲丞相。
  14. 《三國志·魏書一·武帝紀》:秋七月,公南征劉表。
  15. 《三國志·魏書一·武帝紀》:八月,表卒,其子琮代,屯襄陽……九月,公到新野,琮遂降
  16. 《三國志·魏書一·武帝紀》:秋七月,公西征
  17. 《三國志·魏書一·武帝紀》:十七年春正月,公還鄴。
  18. 《三國志·魏書一·武帝紀》:二十五年……庚子,王崩于洛陽,年六十六。
  19. 《資治通鑑.卷六十九.魏紀一》漢帝尋遣御史大夫華歆奉策詔,授太子丞相印、綬,魏王璽、綬,領冀州牧。
  20. 《資治通鑑.卷六十九.魏紀一》十一月,癸酉,奉漢帝為山陽公
  21. 《資治通鑑·卷六十九·魏紀一》丁卯,葬武王於高陵。

註釋 編輯

  1. 錄尚書事嘅大臣先至可以處理尚書臺(東漢最高權力機關)嘅業務,而且地位仲高過尚書臺最高嘅長官尚書令,所以無論你嘅職位係乜,只要你有咗錄尚書事嘅職位,你就可以享有最高嘅權力。
  2. 呢度嘅中原泛指黃河以南、淮河以北同埋潼關以東嘅廣泛地區。
前任:
董卓
漢朝丞相
208年220年
繼任:
曹丕