杯麪

杯麪係用杯狀嘅耐熱防水容器裝住已經過乾燥處理嘅即食麪，只需要加入熱水焗三分鐘就食得，唔使煮。

杯麪嘅麪種類廣泛，有日式嘅拉麪、烏冬，中式嘅米粉、伊麪，近年亦有意大利粉等種類，通常亦有少量經乾燥處理嘅配料好似肉、蝦同菜。

杯狀嘅耐熱防水容器通常用聚苯乙烯（發泡膠）或經防水耐熱處理嘅紙做材料。除杯型容器外，亦有一啲用碗型嘅容器，叫做碗麪。

史編輯

杯麪由日本日清食品公司發明，1971年 9月18號喺日本上市，最原始品種係Cup Noodles，賣100日圓（0.25美元），係當時袋裝即食麪售價嘅3倍以上，並用發泡聚苯乙烯做容器。

杯麵試賣期間喺球場同馬場等地點銷售，因價錢太貴而唔受歡迎，最後淨係可以喺啲必須夜間值勤嘅單位例如消防隊同日本自衛隊販賣。為求打開市場，安藤百福喺東京市區同三越百貨公司合作促銷，創下4個鐘頭賣出兩萬份嘅紀錄，先奠定日本人接受杯麪嘅基礎。由於杯麪走高價路線，所以配料包括冷凍乾燥法製成嘅乾燥蝦，同時亦改用叉做餐具。東京街頭促銷讓杯麪喺關東得以立足。1972年 2月日本發生赤軍連脅持人質同警察對抗嘅淺間山莊事件。由於警察食杯麪醫肚嘅鏡頭上咗電視現場轉播，杯麪因此一炮而紅。