民進黨－時代力量關係

時代力量喺2015年初創黨嘅時候，同民進黨有一定程度合作，外界唔少人將時代力量視為泛綠入面嘅「小綠」，但兩黨之後喺唔同嘅議題（例如《勞動基凖法》、就香港反送中運動支援香港人）日漸出現分岐，加上時代力量內部唔同成員意見都有差異，有一啲聲音認為時代力量已經唔再係民進黨為首嘅泛綠陣營成員，但民進黨同時代力量喺台灣應對中共威脅同一啲外交問題上，仍然有接近立場。

合作起源

時代力量喺2015年1月創黨，當時台灣輿論同社會氣氛對執政嘅國民黨馬英九政府普遍不滿，民進黨雖然形勢看好，但係仍然有一啲選區可能無法同國民黨抗衡，出於政治考慮，民進黨就對時代力量「禮讓」、甚至加以援助。最終，時代力量喺2016年嘅立委選舉攞到5個議席。

部分有意見分岐嘅議題

勞工議題

時代力量嘅政綱強調勞工權益，亦比民進黨偏向進步主義，但去到2018年《勞動基凖法》修法嘅時候，各個工會對草案表達強烈不滿，時代力量亦認為執政民進黨推動嘅修法係「修惡」，企喺資方嘅角度，傷害勞工權益。喺立法院被民進黨、國民黨立委「聯手攻破」後，時代力量5名立委轉移至總統府禁制區內靜坐抗議。呢次修法，可以被視為民進黨同時代力量分道揚鑣嘅導火線。

居住正義問題

内文：台灣居住正義問題

2022年底，時代力量曾經提出《平均地權法案》同埋《租賃住宅市場發展及管理條例》，又曾經提議開徵「空屋稅」，但提案被民進黨黨團阻擋，之後時代力量立委邱顯智就批評，民進黨係因應建商嘅聲音，而在意限制建商囤房條款，亦唔肯採取稅務改革，反而一直採取補貼政策，無法解決問題。

香港反送中運動支援香港人

2019年，香港爆發反送中運動。之前，民進黨喺2018年年底地方選舉大敗，有意競選連任嘅總統蔡英文亦民調低迷，有可能連任失敗，但之後佢多次公開聲援香港民主運動嘅示威者，結果佢獲得香港人一啲支持，最後成功連任。隨著2020年北京未經諮詢或香港人同意，強行訂立《港版國安法》，有唔少香港人選擇移民，有啲人選擇咗台灣作為目的地，但就面對內政部移民署嘅留難，甚至試過連80歲老人申請移台都要寫生活規劃。另外，民進黨亦有人(例如：立委林靜儀)唔止一次以假新聞攻擊香港人，用以叫停一啲支持香港人逃離嘅措施。有部份在台港人甚至選擇二次移民，改去英國、加拿大等地。

時代力量喺反送中運動初期，同民進黨立場相若，亦有同民進黨就議題合作，但對於民進黨政府未有履行對香港人嘅承諾，時代力量亦加以批評，指民進黨對香港人做得未夠多。

現況

時代力量喺一啲應對中共威脅同一啲外交問題上，仍然會公開認可民進黨嘅大方向，但有時亦會批評民進黨做得唔足夠。喺內政問題上，時代力量繼續作為在野黨監察民進黨，亦會對國民黨、民眾黨一啲爭議加以批評。另外，時代力量有時亦會批評台灣基進，指佢哋無法堅持價值，毫無政黨主體性。