海牛目
海牛目（Sirenia）係海洋哺乳動物中係相當特殊嘅一群，所屬物種都係食草嘅，主要食海草同其他水生植物。現存有四種海牛目，分為兩個科：海牛科（Trichechidae）嘅3種海牛（Manatee），同儒艮科（Dugongidae）嘅儒艮（Dugong）。儒艮科嘅另一物種史德拉海牛（Steller's Sea Cow，又叫大海牛）曾經生存到近代，但已經喺18世紀時經唔起人類嘅捕獵壓力，絕晒種。
 | ||||||||
|---|---|---|---|---|---|---|---|---|
 西印度海牛
| ||||||||
| 物種分類 | ||||||||
| ||||||||
外形特徵 編輯
海牛目動物相當適應水中生活，佢哋有流線形嘅身體，無後肢同背鰭，身上毛髮稀疏，前肢呈槳狀方便游水。儒艮同海牛嘅體型好似，但可以喺條尾部明顯分辨出嚟：海牛條尾寬大而略呈圓形，儒艮就係V形尾，好似海豚嘅尾鰭咁。
海牛目有厚而可以郁嘅嘴唇，表面有濃密嘅短毛，可以咬住海草送落口。佢哋進化出特殊嘅牙齒替換系統，以因應食用多纖維食物造成嘅牙齒磨損。海牛只得臼齒，更新方式並唔係一隻牙甩咗再生過隻新嘅，而係成棚牙由顎嘅末端水平向前移，當啲牙齒移到顎嘅最前端，牙根會逐漸被吸收終至脫落，同象牙有啲似。儒艮嘅上下顎各有三對臼齒同前臼齒，隨住年齡增長，佢哋前臼齒同第一對臼齒會甩，剩低嘅臼齒就會一直生長。雄性有兩隻大型門牙，喺青春期時會突出嘴邊，但當嘴巴閤埋，會被嘴脣冚住。無外耳殼，只喺頭部兩側各有1個好細嘅耳窿；2個鼻窿都位於吻部嘅頂端，潛水嗰時會俾皮膜掩蓋。雌性有1對乳房，乳頭位於前肢基部。
佢哋個肺好大，係浮力嘅主要來源；橫隔膜嘅位置相當特殊，唔似人類咁同肩膀平行，而係大致同背、腹部平行，推測可能同浮力嘅調節有關。骨架非常厚重，尤其係肋骨，除咗有鉛垂咁幫助下潛嘅功能外，對於鯊魚等天敵嘅衝撞亦有一定嘅抵禦能力。皮膚相當厚，體內儲存有好多脂肪，但脂肪厚度通常唔及鯨類嘅鯨脂咁多。
雄性海牛目生殖器並唔外露，隱藏喺腹部中段；雌性生殖器接近肛門，喺尾柄前方。懷孕期一般大概1年左右，1胎只生1隻。
進化 編輯
已知最早嘅化石大概喺離而家5千萬年前嘅始新世（Eocene）早期，到咗漸新世（Oligocene）同中新世（Miocene）係海牛目嘅全盛時期，之後就逐漸衰退，原因可能係氣候寒冷化、海洋環境變動，或者係古代人類開始捉佢哋嚟食等造成。最早嘅海牛目動物大細同豬差唔多，有四隻腳，住喺岸邊濕地。儒艮科大概喺始新世末期出現，外型相當接近今日嘅儒艮，而出土嘅化石都唔少；海牛科可能喺漸新世初期進化出來，但現有化石數量較少。目前對於海牛目嘅演化分歧情形重有好多疑問，各科分歧嘅時間點都重有爭議，但關於「由陸棲至海生」嘅演化途徑由於化石充足已有完整理論提出。
雖然外型上有相當大嘅差異，不過由考古學同比較解剖學上嘅證據顯示，現生哺乳動物中同海牛目親緣關係最接近嘅係長鼻目（Proboscidea，即係象）。
保育現狀 編輯
近幾世紀以嚟，海牛目嘅族群都明顯下降，喺好多地方都開始絕種。族群減少嘅主要因素係由於受到人類活動嘅干擾，雖然已受保護，但喺佢嘅棲息地內仍然成日遭到獵殺，喺某啲地區嘅市場上甚至重係公開買賣海牛肉。海牛嘅死亡威脅重包括俾運河水門夾傷同困喺漁網中導致窒息。儒艮亦不時死喺漁業拖網、捉鯊魚同海龜網，其他重包括炸魚、海面原油污染、龍旋風同暴風侵襲、寄生蟲、俾殺人鯨同鯊魚捕食等。
分類 編輯
參考書 編輯
- Hadoram Shirihai / illustrated by Brett Jarrett, 《A Complete Guide to Antarctic Wildlife: The Birds and Marine Mammals of the Antarctic Continent and the Southerocean》, Alula Press Oy, 2002: p474-477. ISBN 951-98947-0-5
- Daryl P. Domning, 《Sirenian Evolution》, edit by William F. Perrin, Bernd Würsig, etc. 《Encyclopedia of marine mammals》, Academic Press, 2002: p1083-1086. ISBN 0-12-551340-2
- Daniel K. Odell, 《Sirenian Life History》, edit by William F. Perrin, Bernd Würsig, etc. 《Encyclopedia of marine mammals》, Academic Press, 2002: p1086-1089. ISBN 0-12-551340-2
 |