海蛇科
海蛇科包括所有一世都住喺海洋度嘅蛇，屬於蛇亞目，係由遠古眼鏡蛇分化出嚟嘅，呢科有15屬、大約50種。
 | ||||||||||||
|---|---|---|---|---|---|---|---|---|---|---|---|---|
 | ||||||||||||
| 物種分類 | ||||||||||||
| ||||||||||||
海蛇嘅身體後部略側扁，尾部扁平如槳，游水好叻。個頭好細，又細條，好少超過2米，但喺化石度搵到，以前曾經有長達十幾米嘅大海蛇出現。有由頭伸到落尾嘅肺，但亦可以用皮膚嚟呼吸。海蛇嘅鼻窿向上，有瓣膜可以自由開關，吸氣後，可關閉鼻孔潛落水底達10分鐘咁耐，重可以潛到幾十米深。海蛇身體表面有鱗片包住，鱗片下面係好厚嘅皮膚，可以防止海水滲入同避免體液流失。脷下面有鹽腺，可以排出隨食物進入體內嘅過量鹽分。
分布 編輯
海蛇主要分布喺印度洋同西太平洋嘅熱帶海域，大西洋並無海蛇。東太平洋有長吻海蛇分布，劍尾海蛇就通常分布喺暗礁裏面。中國記錄到有19種海蛇，廣泛分布喺廣東、廣西、福建、台灣、香港、浙江、山東、遼寧等省份嘅沿岸近海地方。常見品種有青環海蛇、環紋海蛇、小頭海蛇、海蝰、平頦海蛇同長吻海蛇等。而香港亦記錄過淡灰海蛇（睇香港爬蟲類）。
分類 編輯
海蛇又可以分兩棲海蛇同水棲海蛇兩大類。扁尾海蛇就係屬於前者，需要上岸生蛋，由得佢自然孵化。而後者就係卵胎生嘅，每次要生3到4條20到30厘米長嘅海蛇仔。喺繁殖季節，海蛇成日聚埋一齊，形成綿延幾十公里長嘅蛇陣，有時甚至浮滿整個港口。
毒性 編輯
海蛇同眼鏡蛇有好密切嘅親戚關係，係有較短前溝牙嘅毒蛇，所有海蛇都係有劇毒嘅。啲毒液為無色或者淡黃色粘稠液體，同陸地蛇嘅蛇毒性質好似，但毒性就比陸棲蛇勁好多，係最毒嘅動物。有啲品種嘅毒性強度甚至係響尾蛇嘅十倍以上，鈎嘴海蛇毒液就係飯鏟頭毒液毒性嘅兩倍，係氰化鈉毒性嘅80倍。海蛇毒性為神經毒，目前並無血清可以解毒。
世界上最毒嘅海蛇係貝爾切海蛇，住喺澳洲西北部嘅阿什莫爾群島嘅暗礁周圍，按照單位容量毒液毒性嚟講，佢嘅毒性係眼鏡王蛇嘅200倍。
海蛇咬到人冇劇烈感覺，有時重唔痛又無水腫，所以好難發覺。各種症狀開始始時都好輕微，但會逐漸惡化。逐漸導致呼吸困難、全身癱瘓等症狀，嚴重嘅話可以喺幾十分鐘之後死。人類極少會受到海蛇嘅主動攻擊，往往係因為漁夫捕捉或潛水員唔小心踩到海蛇先搞成咁。有經驗嘅潛水員重會捉海蛇嚟玩。
資料來源 編輯
- 《科學月刊》「蛇類的生態適應」一文，2001年5月號
- 《香港的兩棲類和爬行類》
- 《自然珍藏系列：兩生爬行類圖鑑》ISBN 957-469-519-0