瘦金體
瘦金體（粵拼：sau3 gam1 tai2）又叫做瘦金書、鶴體，係宋徽宗趙佶（1082年—1135年）創出嚟嘅一種字體。宋徽宗趙佶係用楷書嘅字體，參考咗褚遂良、薛曜、薛稷、柳公權同埋其他書法家嘅風格，創出一種新嘅楷書字體[1][2]。
瘦金體同傳統嘅楷書字體差別比較大，所以可以話係一種相當獨特嘅字體，呢隻字體嘅代表作有《楷書千字文》、《穠芳詩》等。
瘦金體嘅運筆飄忽快捷，筆跡瘦勁，轉折嘅地方可以明顯見到藏鋒、露鋒等運轉提頓嘅痕跡，被指係一種風格相當獨特，灑脫明快，氣韻脫俗嘅字體。陸游喺《唐希雅雪鵲》講「我評此畫如奇書，顏筋柳骨追歐虞」，而范仲淹嘅《祭石學士文》講「曼卿之筆，顏筋柳骨」，所以瘦金體喺古人嘅睇法係「顏筋柳骨」或者「顏骨柳筋」。而今日嘅「仿宋體」，亦都係喺瘦金體演變出嚟嘅。
古人評論 編輯
- 蔡絛《鐵圍山叢談》
| 「 | 裕陵作庭堅書體，後自成一法也。
|
」 |
- 陶宗儀《書史會要》
| 「 | 徽宗行，草書。筆勢勁逸，初學薛稷，變其法度，自號瘦金書。意度天成，非可以形跡求也。
|
」 |
現代應用 編輯
到咗依家，電腦同傳統書法藝術可以話係相輔相成，電腦字型亦都收納咗瘦金體。例如：漢儀科印開發嘅瘦金書、華康科技（依家叫做威鋒數位）開發嘅徽宗宮體、方正集團開發嘅瘦金書等都係瘦金體。
睇埋 編輯
參考 編輯
- ↑ 〈妙體眾形，兼備各法 宋徽宗〉. 原著喺2008-01-18歸檔.
- ↑ 單遠慕, 寧可 (1998). 《中原文化誌》. Henan Sheng (China). pp. 306頁.