石室聖心大教堂粵讀:sek6 sat1 sing3 sam1 daai6 gaau3 tong4,英文:Sacred Heart Cathedral,外文名畀當局改成Shi Shi)坐落喺中國廣州市一德路舊部前56號,天主教廣州教區嘅主座教堂,亦都係廣州城中最大最有特色嘅教堂。亦係東南亞最大嘅石構教堂,[1]全球四座全石構嘅哥德式教堂之一,東南亞、中國最大嘅哥德教堂。[未記出處或冇根據]

石室聖心教堂
中華人民共和國
全國重點文物保護單位
喺邊廣州市
時代
4-215
登錄1997年
地圖
Map

教堂1863年開始起,1888年起好,起咗25年,使費40萬法郎。總建築面積2754平方米,東西闊35米,南北長78.69米,地面到塔尖高58.5米。教堂全部牆同柱都係用花崗石造,所以又叫石室石室耶穌聖心堂石室天主教堂,1996年列為全國重點文物保護單位

歷史 編輯

前史·簽約·籌款 編輯

石室所在條街有過千年歷史,宋代叫做「賣麻街」,清代呢度起咗兩廣總督部堂衙門,係兩廣最高權力機關。

1848年法國普行勸善會嘅教士明稽章(Philippe François Zéphirin Guillemin)來廣東傳教,當時佢想喺廣州起座大教堂;咸豐一年(1851年)佢喺兩廣部堂隔離買地,起咗間教堂仔;咸豐三年(1853年)就同當局傾起大教堂嘅事,不過無乜進展。

1856年第二次鴉片戰爭打起,英法聯軍攻陷廣州,兩廣部堂毀咗。過後大清帝國簽咗《北京條約》,其中第六條「傳教士可於各省租買田地起天主堂」,於是羅馬教皇派明稽章喺廣州做粵桂監牧區首任宗座監牧,明稽章就睇啱原先部堂嘅位置。當年,教皇庇護九世宣佈設聖心節,屆時要教徒敬拜聖心像(一粒周圍有荊棘、識發光、帶傷痕嘅心)。

1858年兩廣教務從澳門教區獨立,成立粵桂監牧區,交由巴黎外方傳教會管,首位主教就係明稽章。當年明稽章返法國見拿破崙三世,同佢講下英美廣州貿易如何發達、兩國教會又點起教堂,拿破崙三世驚法國喺廣州嘅影響輸蝕過英美,於是個人贊助50萬法郎,畀主教喺法國籌款;之後1873年法國議會以491:100嘅比數撥7萬5千法郎畀外交部,用作起教堂。明稽章係教堂建造最關鍵人物,從構思、籌款、監工都有份,1869年兩廣總督唔準挖石,民間阻力亦都好大,令教堂停工,係佢直接搵北京大官交涉,先解決問題。不過佢最後無緣見到教堂落成,1886年,教堂落成前兩年喺巴黎病死,享年72歲。由接任主教邵斯(Augustin Chausse)監工。

1860年3月7號同當局簽租用協議,攞咗兩廣部堂笪地,共計42畝6分6釐。當年二次鴉片戰爭結束,咸豐落詔批準起聖心教堂,話「而家起、永遠無再打仗,要永遠真誠維護和平。」

1861年1月25號恭親王奕訢同法國政府簽埋附加條款,正式確認聖心教堂。附加條款擴大咗教堂地段,北到大新路,南到賣麻街,東到白米巷,西到玉子巷;除咗起教堂,重要起附屬機構:嬰堂、聖心書院、方濟各小修院、明德女子中學、日新小學、苦修院和中華無原罪聖母女修會。要令呢處成為華南傳教核心。

破土·奠基 編輯

 
1863年羅馬嗰兩斤泥
 
1863年耶路撒冷嗰嚿石

1861年6月28號(聖心節)石室正式破土起地基。據李泰初《石室始末記》:爲咗體現教堂尊嚴,要「鄰近屋宇,所有窗戶,一律不許望見天主堂(工地)之內」「如有先以造成……即將窗戶用磚堵塞,不必拆毀。」正因如此教堂喺打地基之初就有民間到官方嘅阻力,一面起教堂要徵好多地,好多居民要搬;另一面經歷戰爭無耐,市民對西洋好反感。

1863年起好地基,12月8號聖母無原罪日搞奠基儀式,周圍啲街裝飾得靚靚,兩廣總督坐八人大轎出席,重有班文官、300幾八旗兵、教士、20幾個神父、所有歐洲各國駐粵領事高官都來撐場。奠基儀式由當時法國駐廣州領事李天嘉男爵(Gilbert de Trenqualye)同主教明稽章致辭。奠基時,主教將耶路撒冷嘅一嚿石同羅馬兩斤泥分別置於東西二基,表示天主教創於東方耶路撒冷,興於西方羅馬,兩嚿奠基石刻字「Jerusalem 1863」同「Roma 1863」。

設計·施工 編輯

設計係法國人:來自巴黎嘅建築師安托雲·厄密(Antoine Hermitte),同埋兩位來自南錫嘅建築師利雍·禾特蘭(Léon Vautrin)同沙夏勒·雅山特·閏伯(Charles Hyacinthe Humbert)。風格係哥德式,正立面仿巴黎第七區嘅聖克羅蒂德聖殿(Basilique Sainte-Clotilde),中殿、聖壇仿照法國圖勒聖伊天主教座堂(Cathédrale Saint-Étienne de Toul)。

施工都係廣東人。開工之初請咗唔少揭西石工,不過指揮係兩個法國工程師,同本地工雞同鴨講,中國人又未起過哥德教堂,開頭幾年先堆起幾尺高嘅石,啲石工亦都唔撈。後來時年20歲嘅石工蔡孝(揭西縣坪上鎮尖田村南門人)來工地探鄉里,見到法國佬噉砌石有問題,提醒佢哋時啲人唔在意,後來起唔掂試下佢條橋,效果幾好,就請蔡孝做工程總管。

蔡孝對石室嘅建築起好重要作用。石室啲石過十萬,有啲重過千斤,所有石從打磨到砌,蔡孝都親自檢查。佢嘅施工亦都獨特,比如砌石唔用石灰,用燒融嘅鉛水;穹窿個頂有啲石鑿咗兩個窿,用鐵枝穿起再砌,噉就實啲。等到佢起完石室到50幾歲啦。

石室啲石全部係花崗石,廣州唔產,用嘅係香港九龍牛頭角茶菓嶺嘅大麻石。啲石用帆船運到廣州,再人工打鑿、吊裝、砌,都幾艱難。齋係掘石都要8年。

1888年,歷時25年,石室落成。

建築 編輯

佈局 編輯

據《廣州建築》,石室平面佈局係拉丁十字。遠古時十字係太陽、火嘅象徵,意味光明,後來做咗基督教標誌。雖然係拉丁十字,不過兩翼突出無咁多,係法國教堂常見形制,唔同於英國教堂嘅兩翼突出好長。

呢個十字亦都比喻成人體:左右兩個側廳係兩臂,唱詩班嘅位置相當於個胸,即係心臟,中殿、兩邊側廊係身體下半部,後堂就係頭腦。後堂代表基督聖靈嘅精神空間,教堂其他部分就係世俗世界嘅物質空間。

正立面 編輯

正面係典型嘅「左右三段」+「上下三段」嘅格局,類似九宮格噉。

基層係三棟尖拱門,中門最大,左右門對稱。呢三個門同左右兩側嘅橫門都係好有透視效果嘅尖券門。門楣上有石雕。

 
三棟尖劵門

立面中間(第二層)係玫瑰窗,玫瑰窗兩邊對稱嘅窗、三層嘅兩處窗都係合掌式,同大門一樣暗紅色,亦都喺窗上面裝飾尖劵。各層之間隔住欄杆雕刻。

 
正立面中間嘅玫瑰窗
 
正立面嘅二、三層。

編輯

石室嗰兩支塔最顯眼,呢種瘦高嘅骨架係哥德建築嘅典型特點。雙塔直插雲霄,下面望上去,有種向天空無限延伸嘅感覺,因此好易令人留低深刻印象。

 
由下往上望支塔

西塔裝咗個鐘,東塔係鐘樓,原先有5個法國來嘅大銅鐘,不過有個喺1980年代畀神父送咗畀梧州間教堂,所以而家得四個大鐘。呢啲大鐘向彌撒時響,另外喺聖誕節復活節呢啲重要宗教節慶,大鐘會響起特別嘅鐘聲樂曲。

 
時鐘

內部 編輯

入咗堂,會見到左右兩邊各10條嘅巨石柱撐住急昇嘅尖拱,令教堂內外一樣都有種向上飛嘅感覺,呢種向上、向前延伸嘅感覺令堂內宗教氛圍好重。

 
從大門到最後嘅祭壇,兩排石柱好架勢。
 
企定向上望,啲石柱撐上去,啲尖拱對住上面,會有直達天花嘅飛昇感

天花亦都係拱形,中間高,嗰度吊住盞燈,石柱頂住嘅地方低啲,四條石柱頂起一個堂頂,噉多條石柱就形成好多個堂頂,望過去好有起伏感。

 
成排堂頂望過去,呈起伏狀。
 
原地顎高頭望,吊燈喺頭頂,因為好高,兩邊吊燈望起身喺視野外噉

哥德建築入面嘅石柱往往係束柱,即係望起身似一紮柱綁埋噉。石室每條石柱都係成嚿花崗石堆砌,石面之間嚴絲合縫,對榫好準。石之間係用桐油溝糯米漿黐嘅。

 
柱係一大紮嘅

彩光玻璃 編輯

教堂令人注意嘅另一點係啲彩光玻璃:正面、東面、西面都有直徑7米嘅玫瑰窗,用色有深紅、深藍、紫黃。以前啲窗係有聖經古仔,因為後來破壞嚴重,修補時都用國產藍綠色玻璃。同舊時哥德建築比,石室解決咗啲設計問題,可以係薄牆上開大窗,令得教堂採到光,同時彩光玻璃避免室外強光直射,全年保持柔和,有種慈善、肅穆嘅氣氛。

 
玫瑰窗瀉落嘅光
 
堂內光線唔算好光,亦唔叫暗
 
聖經古仔嘅彩色玻璃

中西合璧 編輯

因為施工嘅都係唐人,佢哋對西方宗教文化識得唔多,所以相比西方教堂,石室嘅人物雕像少好多,但又滲入啲中國元素。

石獅 編輯

啲石獅係出水口,雨水收集自屋頂,再匯到石獅口流出。

 
石獅出水口
 
扶壁上中西合璧

嶺南瓦 編輯

兜到石室後面會見到中國院牆,牆上有細細哋半圓嘅瓦沿,呢啲就係嶺南瓦。教堂嘅屋頂全部用嶺南瓦

 
留意教堂屋頂,有類似祠堂嘅瓦

雕刻 編輯

教堂兩側嘅木門度有梅花、菊花呢啲木雕圖案,塔尖固定避雷針嘅係石葫蘆。

 
花狀窗枝

階磚 編輯

祭衣間(神父換衫地方)原設計方案地下鋪石,改鋪廣東大階磚,有利防潮。

石室朝南唔朝西 編輯

西方嘅哥德教堂,一律朝西,反而石室朝南面嘅珠江。據分析可能係廣州城市軸線起作用。因為當年教堂係廣州至高嘅建築之一,相當今日嘅中信大廈廣州塔,兼且喺城市軸線上。如果朝西,就會破壞城市格局,更加喺當時反感西洋嘅市民眼中顯得篤眼,畢竟佢要傳教,要融入本地。

有意思嘅係,天主教嘅石室、基督新教嘅光孝堂清真教懷聖寺道教五仙觀佛教光孝寺六榕寺喺齊呢條舊城軸線上。

破壞 編輯

最損最嚴重嘅係玻璃。廣州淪陷時,有部日本機撞咗塔尖避雷針,墜喺教堂前面嘅滄海茶樓爆炸,震碎咗啲玻璃;1949年國民黨軍隊撤退廣州,炸附近嘅海珠橋,又震碎咗啲玻璃。

文革嘅損毀最嚴重,呢度停曬宗教活動,所有宗教油畫撕爛咗,剩低嘅窗全部打爛曬,樓頂石獅排水口畀鐵鎚敲碎,教堂收藏嘅經書、佈道用嘅有跪板嘅長凳、祭臺、祭具、聖像、神功亭堆喺教堂內燒曬,將部分石壁、石柱燒到爆,雖然修復過,至今重見到燒過嘅痕跡。之後呢度變成垃圾場。

此外原先教堂嘅附屬機構關曬,教會學校收歸國有,神學院關閉。石室到一德路前面嘅馬路仔,原先叫聖心路,長58米,闊18米,文革時廣州地名畀當局改到亂七八糟,1966年聖心路改名做勞動路,即係話無救世主,全靠勞動人民,至今無恢復個名。教堂週邊都係批發市場,環境好亂。

維修 編輯

石室經歷過三次大修。第一次上世紀20年代將屋頂、大樑、東西塔樓梯換成石屎結構,喺教堂外東、西、北加多個鐵枝護欄;第二次上世紀80年代國務院宗教局撥咗15萬恢復教堂。

第三次係2004年開始到2006年秋天,係教堂目前最大嘅修葺,拆曬屋頂、大樑,原樣做過,防止屋頂漏雨;其次係更換600平方米嘅玻璃窗,原先玻璃窗係19世紀從法國入口嘅,不過無曬,因為中國缺有整教堂彩色玻璃經驗嘅公司,就交由菲律賓來做。原先嘅玻璃窗下面用拉丁文、法文講明窗上嘅聖經古仔,而家變成英文。此外裏裏外外都翻新過,包括西塔換咗國產鐘錶。另外週邊嘅環境整治過,企理過之前。

開放時間 編輯

每日日頭開放畀公眾,唔做彌撒期間,遊客可以隨便參觀,不過教堂內禁攝影;做彌撒時唔準喺堂內四圍行,不過非教徒可以參加彌撒。復活節、聖誕節當日會有好多人來教堂,甚至要排隊入場,因為多人,會教友優先,教外人士有請離場,不過如果在場非教友唔多,亦都可以入內參加。

彌撒時刻表 編輯

  • 星期一到星期五:朝早六點半、七點(廣州話
  • 星期六:夜晚七點(普通話),晏晝三點半(韓文
  • 星期日:朝早六點半、八點半(廣州話),上晝十點半(普通話),晏晝三點半(英文

圖集 編輯

出面網頁 編輯

  1. 广. 原先內容歸檔喺2015-02-22. 喺2015-02-21搵到.