社會主義
社會主義係一套政治理論同政治運動。主張工人階級無論男女，都應該可以用民主方式，集體管理一個社會。但係歷史上，唔同國家同社會嘅革命家，打住社會主義旗號去推動社會改革運動嗰陣，喺唔同時期唔同地方，社會主義都有唔同嘅表現形式同意義，所以「社會主義」呢樣嘢唔係一樣可以簡單概括。
起源 編輯
一般認為社會主義起源係喺1839年法國同英國，但亦有人認為古時候奴隸叛變爭取自由嘅運動，亦算係一種社會主義革命，例如斯巴達克起義（公元前73年）、德國農民戰爭（1524年）、英國革命（1640年）、法國大革命（1789年）等等。
到18世紀英國工業革命，工人開始意識到要為自己爭取權益，於是開始好多工人組織起嚟，發起爭取權益嘅社會運動，同時喺法國亦有人開始搞呢類社會運動。之後又有啲革命家發起一啲民權運動，爭取平等選舉權利。
社會主義名稱來源 編輯
之前嘅好多奴隸叛變運動，同埋工業革命嗰陣嘅工人階層發起民權運動，都係喺烏托邦主義思想作為基本理念，無話乜嘢社會主義。社會主義呢個稱呼，係英國工業家羅伯特歐文（Robert Owen，1771年-1858年）諗出嚟，佢喺1827年試驗式咁喺蘇格蘭開咗間合作形式嘅鋪頭，呢間鋪頭設立工作時間限制，唔請細路仔做嘢，大啲嘅後生仔就會出錢供佢哋讀書，佢將呢種經營模式叫做「社會主義」，而呢啲鋪頭就叫做「模範會社」。但當佢去到英國南部同美國印第安納州開呢啲鋪頭時，就全部衰晒。1834年佢喺英國組織一個全國工會聯合會，幾個禮拜之內有成五十幾萬人加入，佢哋成日發動罷工同老闆作對，搞到好多工廠執笠，結果全國老闆壓力之下，呢啲工人組織最後都散晒。
演變 編輯
一直以來呢啲工人革命運動，喺下層推翻上層之後，奴隸或者工人取代上層階級，自己變咗權力階級之後，又會變成一班新嘅壓迫者，之後又對無權力嘅人壓迫。
18世紀中期，居美德國思想家馬克思同恩格斯就發現呢個問題，分析過歷史上好多呢類革命運動，認為社會主義唔會由上而下，即係權力階層唔會放棄原本有嘅利益，自動走去社會主義，社會主義一定要由下而上，即係要由下層，例如工人階層或者無權力嘅人搞起，因為工人要擺脫工人階級而自己組織政黨管理政府唔係話咁易，所以只有工人先可以解救工人，工人應該自己組織起嚟形成力量，變成一種同權力階層平等嘅力量，喺平等關係之下，有乜嘢唔啱都可以傾到啱。
喺呢個諗法之下，佢哋鼓勵工人組織工會，喺1848年發表共產黨宣言，支持工人組織發起革命，社會主義概念開始喺世界各地興起。
第一國際 編輯
喺1864年世界唔同國家嘅工人組織，夾埋一齊創立國際工人協會，呢個協會又有另一個稱呼：「第一國際」。
呢個組織認為，佢哋要同統治階層抗爭，達到解放工人嘅目的，而呢種抗爭一定係國際性先有力量，所以就同全世界嘅工人組織一齊夾埋，就組成咗國際工人協會。本來呢個協會原意係捉成工人同政黨之間合作，但抱社會主義同抱無政府主義嘅工人組織喺對權力嘅觀點上發生分歧，第一國際慢慢積弱。