神嘅九十億個名

《神嘅九十億個名》（粵讀：san4 ge3 gau2 sap6 jik1 go3 meng2；英文：The Nine Billion Names of God）係 1953 年出版嘅一個科幻短篇故仔，由寫科幻出名嘅英國作家亞科·查理斯·卡奇作嘅。

情節

《神嘅九十億個名》情節大致如下。

有一日，身為電腦專家嘅華博士接到個唔尋常嘅請求。有位喇嘛嚟咗曼克頓，想出重酬請華博士佢哋響喇嘛寺度裝部自動排序電腦。喇嘛係噉講嘅：

「你哋嘅『五式』電腦可以行到十個數位以內嘅任何運算。不過我哋對數字咩興趣都冇，想你將部電腦由印數字改做印字母。」

華博士唔明喇嘛想做乜。

「自從喇嘛寺創立以來嘅三百年，我哋一直都做緊同一樣嘢。我哋響度編寫緊一張名單，呢張名單包含晒神嘅所有名。」

「吓？」

「我哋相信，響一隻我哋發明嘅語言入面，神個名係九個字母咁長。神有好多個名，上帝、耶和華、真主阿拉... 等等，但呢啲只不過係後人所加嘅標籤。我唔想太深入討論其中嘅哲理，但係如果我哋依次序，將所有嘅字母排成九字長嘅組合嘅話，噉其中肯定有一個係神嘅真名。我哋咁耐以嚟，就係想將所有可能嘅名列晒出嚟。由 AAAAAAAAA 開始，一路去到 ZZZZZZZZZ 噉囉。我哋仲需要部機械能夠排除錯名，例如某一個字母唔可以連續出現三次噉。」

華博士聽咗，唔諗住追問。佢想像響高原上，僧人日以繼夜，一代接一代，好似愚公移山噉編寫出一行行嘅亂碼。佢心諗：

「究竟人類嘅鬧劇仲有冇得再痴線啲？不過，始終『客就永遠係啱嘅』。」

華博士最後應承幫手：

「我哋旗下嘅『五式』自動排序電腦 hen1 dou4（handle）到嘅。」

跟住華博士同喇嘛就開始傾運貨嘅事宜，喇嘛仲想請工程師幫手。傾好晒之後，喇嘛就即場畀錢。

工程師阿康同阿漆就係噉跟咗喇嘛返去喇嘛寺。阿康響幾個禮拜之間，望住「五式」電腦印出一疊又一疊九個字母咁長嘅亂碼，而啲僧人就將啲亂碼小心翼翼噉剪貼落一大本書度。阿康淨係一心希望單嘢快啲搞掂收工。

「我真係想快啲返美國。」

正當阿康喺露台煲煙之際，阿漆走嚟。

「阿康，你聽住，我啱啱知道咗件幾麻煩嘅事。」

「咩事？班痴線喇嘛話想我哋留耐啲？」

「唔係，我終於知佢實際上搞緊咩。佢哋相信列出晒神嘅咁多個名之後，人類就算係完成咗佢哋嘅使命。狡兔死，走狗烹。神就唔再需要世界。當我哋收工嗰時，世界就會毀滅。」

「噉我哋仲可以點啫？我哋一早知佢哋痴線㗎啦。」

阿康開始諗，究竟印完晒啲名之後班喇嘛會有咩反應呢？佢哋會惱羞成怒將部機打爛？定係安安靜靜噉由頭開始呢？

限期到咗嗰日，阿康同阿漆準備靜靜雞坐飛機返美國。佢哋兩個一路坐住馬仔漫步落山去機場。阿康開口：

「唔知『五式』印完名未呢？睇錶應該而家搞掂喎。」

阿漆冇應佢，所以阿康回頭睇下咩事。夜空之下，佢只係見到阿漆慘白嘅面望咗上天。阿康跟住抬頭向上望。

了無聲息噉，佢哋頭上面嘅群星同時熄滅晒。

睇埋

• 窮舉搜尋
• 窮舉攻擊
• 河內塔

拎

• 對亞科·C·卡奇嘅神嘅九十億個名嘅總結同分析 （英文）