羅品超
羅品超（1911年—2010年7月15號），原名羅肇鑒，人稱鑒叔，祖籍廣東南海南莊龍畔村頭，係粵劇文武生，保持著「世界上年齡最大、表演時間最長嘅藝術家」伊個健力士世界紀錄[1]。
| 羅品超 | |
|---|---|
 羅品超同佢嘅健力士證書 | |
| 出世 | 1911年 |
| 死 | 2010年7月15號 廣州 |
| 國籍 | 中國 |
| 職業 | 粵劇演員 |
| 出名原因 | 「世界上年齡最大、表演時間最長嘅藝術家」 |
提示：呢篇文講嘅唔係羅品信。羅品超12歲進入廣州花地孤兒院舉辦嘅粵劇科班學藝，18歲進入廣州戲劇研究所附屬戲劇學校——八和會館嘅八和戲劇養成所學習[2]。1931年後，羅品超喺「千秋鑒」、「九華台」擔任正印小生，然後進入覺先聲粵劇團，同薛覺先、靚少鳳、千里駒等老倌名伶合作演出，喺廣州、香港、澳門以及南洋各地都有大影響。中共建政之後，羅品超組創珠江粵劇團，任團主任委員。
羅品超嘅表演剛柔相濟，洗鍊細膩，尤以小武見長；同時又多才多藝，戲路好廣，藝術造詣好高，係一位能文能武嘅粵劇表演藝術大師。佢演過嘅最成功嘅角色包括《羅成寫書》入面嘅羅成、《平貴別窯》入面嘅薛平貴、《五郎救弟》入面嘅楊五郎、《林沖》入面嘅林沖、《荊軻》入面嘅荊軻以及《山鄉風雲》入面嘅黑牛。佢自成一格嘅「回龍腔」，韻味獨特。
羅品超先後主演過好多劇目，包括傳統戲《荊軻》、《梁山伯與祝英台》、《林衝》、《五郎救弟》、《黃飛虎反五關》、《樓臺會》、《山東響馬》、《平貴別窯》，現代戲《山鄉風雲》、《紅花崗》、《沙家浜》，重改編過外國戲《璇宮艷史》、《春香傳》等[3]，長期積累咗大量首演劇目，塑造咗一批批性格迥異、令人難忘嘅人物形象。
1952年，羅品超以《鳳儀亭》獲得全國戲曲觀摩演出演員表演一等獎，之後獲獎無數。1958年出任廣東粵劇院副院長。1979年任中國戲劇家協會廣東分會副主席、秘書長。1988年退休之後移居美國，但係仍然致力於宣傳同推廣粵劇藝術，重經常參加國內各種粵劇表演[4]，直到後來健康轉壞先至喺廣州定居。2004年6月，93歲高齡嘅羅品超再演首本戲《荊軻》，成功申報健力士世界紀錄大全，成為至今在世界戲劇舞臺上面年齡最大，舞臺演出時間最長嘅藝術家；伊個紀錄今日重未有人打得破。2009年6月18號，羅品超以一場「羅派藝術經典劇目展演」來提前慶祝百歲壽辰，並以粵曲《故鄉情》壓軸[5]。
羅品超每年都會去香港度假，而香港演藝學院每年亦都特設一個粵劇課程畀羅品超教授，為期一個月。
2010年7月15號13點30分，羅品超喺廣州屋企過咗身，享年99歲[6]。當日18點30分，羅品超喺屋企人、徒弟同埋廣東粵劇界相關人士嘅目送之下，移靈到廣州殯儀館[7]。7月22號，廣州八和會館舉行咗羅品超追思會，其間播放嘅一段羅品超生前接受採訪嘅錄音，詳述咗佢同粵劇大師薛覺先早年合作，演出失敗，後來獲得諒解嘅一段插曲[8]。
個人榮譽 編輯
參考 編輯
- ↑ 百岁粤剧“小武泰斗”罗品超广州辞世 互聯網檔案館嘅歸檔，歸檔日期2010年7月19號，.，南都網
- ↑ 粤剧大师罗品超逝世 表演时间入吉尼斯纪录 互聯網檔案館嘅歸檔，歸檔日期2020年3月28號，.，騰訊網
- ↑ 粤剧大师罗品超昨日辞世 享年101岁 互聯網檔案館嘅歸檔，歸檔日期2016年3月4號，.，人民網
- ↑ 粤剧大师罗品超逝世 表演时间入吉尼斯纪录 互聯網檔案館嘅歸檔，歸檔日期2020年3月28號，.，騰訊網
- ↑ 百岁粤剧“小武泰斗”罗品超广州辞世 互聯網檔案館嘅歸檔，歸檔日期2010年7月19號，.，南都網
- ↑ 粤剧大师罗品超逝世 表演时间入吉尼斯纪录 互聯網檔案館嘅歸檔，歸檔日期2020年3月28號，.，騰訊網
- ↑ 百岁粤剧“小武泰斗”罗品超广州辞世 互聯網檔案館嘅歸檔，歸檔日期2010年7月19號，.，南都網
- ↑ 汪洋16字悼鉴叔 互聯網檔案館嘅歸檔，歸檔日期2015年6月3號，.，南都网，2010-07-23
- ↑ 〈羅品超 LO Pan-chiu 2001 榮譽院士〉 (繁體中文). 香港演藝學院. 原著喺2020年3月28號歸檔. 喺2020年3月11號搵到.