莫斯科號導彈巡洋艦

莫斯科號（俄文：Москва），原本叫做光榮號（俄文：Слава）係俄羅斯海軍隸下嘅1164型巡洋艦首艦，係俄羅斯黑海艦隊嘅旗艦。

2009年嘅莫斯科號

史

光榮號係蘇聯「1164計劃」1976年係蘇聯烏克蘭尼古拉耶夫開工建造，1979年係445號船塢下水，1983年服役。光榮號係1990年進行改裝，解體後等到2000年先改裝完新服役，改名做莫斯科號，成為俄軍黑海艦隊嘅旗艦。2016年進行咗為期3年嘅現代化，之後納入俄羅斯海軍嘅永久戰備部隊。

2022年俄羅斯入侵烏克蘭

2022年2月，黑海艦隊司令伊戈爾·奧西波夫海軍上將親自檢查莫斯科號導彈巡洋艦嘅防空保護。2022年俄烏戰爭期間，2月24號下晝六點，蛇島受到俄國海軍襲擊，莫斯科號同埋瓦西里·貝科夫號巡邏艦以甲板砲向島嶼開火。當表明身分，要求駐紮島上嘅烏克蘭部隊投降嘅時候，烏克蘭嘅羅曼·格里博夫回應話：「俄羅斯戰艦，屌你」。

4月13號，烏克蘭政府聲稱幾架TB2無人機吸引艦雷達嘅注意，再由海岸嘅砲台發射兩枚海王星反艦導彈，喺奧迪沙對出黑海擊中莫斯科號引發大火。莫斯科號喺4月14號沉咗，成為第二次世界大戰結束之後，被打沉嘅最大戰艦。美國國防部官員亦都證實莫斯科號被兩枚烏克蘭嘅反艦導彈擊中，而俄羅斯政府就話火災令到舷側彈藥爆炸，4月14號俄羅斯政府宣佈係拖救嘅時候遇到風暴沉咗。不過根據天氣網站數據，嗰日海域天氣甚佳，只有啲微雨。

影響

根據福布斯，莫斯科號嘅沉沒令到俄羅斯軍方損失約7.5億美元，係有史以來俄羅斯損失最貴嘅軍備。

烏克蘭郵局發行嘅「向莫斯科號舉中指」郵票，莫斯科號被擊沉前兩日發行

莫斯科號嘅沉沒令俄羅斯軍方失去黑海艦隊嘅旗艦，對俄方嘅士氣做成打擊，加上喺沉沒無耐之前烏克蘭郵局發行嘅「向莫斯科號舉中指」郵票非常受歡迎，令到烏克蘭方嘅士氣因此提升。