華星唱片
華星唱片（英文：Capital Artists）係香港一間唱片公司，現時係豐德麗控股有限公司全資附屬機構。自1971年正式成立後，唔少天皇巨星都曾經羅致旗下，例如羅文、甄妮、成龍、梅艷芳、張國榮、劉德華、李克勤、郭富城、黎明、陳奕迅、楊千嬅、梁漢文、鄭秀文、許志安、草蜢、蘇永康、韓紅、詹天文、莊殷玥、劉芷君、鄧曉殷、繆昀希、楊秉頤、梁善知、林楚麒、黃敏華等。喺八、九十年代叱咤一時嘅華星唱片，旗下歌手數目喺高峰期間多達數十位，喺八十年代嘅樂壇更同寶麗金（家下環球唱片）並駕齊驅。
| 類型 | 唱片公司 |
|---|---|
| 開檔 | 1971年（TVB） 1996年（南華早報集團） 2008年（豐德麗） |
| 總部地址 |  香港 |
| 緊要人物 | 林建岳、黎小田 |
| 產業 | 音樂唱片版權管理 |
| 產品 | 音樂唱片 |
| 母公司 | 豐德麗控股有限公司 |
| 網址 | www |
華星唱片初時係TVBI附屬機構，喺1996年被南華早報集團收購，喺2001年10月20日將餘下十幾名員工遺散並宣佈公司停止運作，但保留公司品牌、商標以及一切歌曲版權，直至2008年由商人林建岳旗下豐德麗收購，並成為東亞唱片 旗下品牌。重組後簽約旗下歌星包括韓紅、蘇永康、劉浩龍。
歷史 編輯
- 1971年：華星娛樂有限公司正式成立，初時主要為舉辦演唱會以及為TVB代理唱片發行，並未有香港歌手加盟以及推出專輯。
- 1982年：華星嘅唱片部以及經理人部門正式成立，並以華星唱片為名為沈殿霞、趙雅芝、石修、李司棋等幾十名TVB藝員發行首張唱片「群星高唱」（CAL-02-1001），佢哋亦因此俾人當咗係華星旗下合約歌手。
- 1982年：陳美齡由娛樂唱片轉會加盟，做咗華星唱片旗下第一位香港歌手並推出華星第二張唱片「灕江曲」（CAL-01-1002）。
- 1982年：張國榮加盟，成為華星唱片旗下第一位男歌手。
- 1982年：聯同TVB合辦「第一屆新秀歌唱大賽」，梅艷芳攞到冠軍後簽約華星唱片。另外，羅文、張國榮、陳潔靈、甄妮等先後喺同公司，令華星唱片成為八十年代獨當一面能夠擁有多位巨星嘅唱片公司。
- 1983年：羅文由百代唱片（香港）轉會加盟，喺華星6年內演繹唔少名曲。
- 1986年：黎明喺「第五屆新秀歌唱大賽」獲得銅獎，簽約華星唱片，但發展平平，直至1990年轉到寶麗金先至受到重視，並喺1992年成為四大天王之一。
- 1987年：張國榮離巢過檔新藝寶唱片公司。
- 1995年：為提高唱片銷量，華星唱片帶頭將唱片零售價一律減至88蚊。
- 1996年：正式被南華早報收購，之後傳出會賣走華星唱片，但總經理吳雨即時作出否認。
- 1997年：推出已離巢嘅鄭秀文（1995年轉投華納唱片）以及許志安（1997年轉投正東唱片）嘅《情侶雙打》唱片，引來兩位當事人不滿，華星唱片同時亦開始走下坡。同年，華星唱片廿五週年紀念，嗰年所有唱片都印有紀念標誌，而「新秀歌唱大賽」改名做「全球華人新秀歌唱大賽」。其後個比賽改左做由英皇娛樂同埋TVB合辦。
- 1998年：當時貴為華星老臣子嘅梅艷芳公開炮轟華星，喺未通知下推出佢嘅精選碟。
- 2001年：車婉婉公開話對華星失望，因為喺華星期間只喺1993年推出一張唱片。同年，新秀出身嘅楊千嬅以及鄧健泓相繼離開華星，分別簽約新藝寶唱片、正東唱片公司。
- 2001年10月20號：遣散十五名員工，只有兩名員工留職到月底，剩低嘅歌手合約未有交代。事實上，當年華星並冇執到，只係除咗版權管理部以外一切運作腰斬[1]。
- 2003年11月，曾任職索尼音樂娛樂（Sony Music）、華納唱片、EMI Group Hong Kong Ltd.（百代唱片 (香港)，現時佢嘅運作實際由華納唱片維持）、環球唱片同佢附屬公司（新藝寶唱片、正東唱片及上華唱片 (香港)）等唱片公司嘅Jacqueline加入華星任版權經理一職。佢加入華星之前做過洲立影視品牌經理，負責邵氏影片品牌。
- 2004至05年期間，華星推出《成人兒歌》、《梅憶錄》、《影視紅聲》、《雛鳳鳴劇團經典戲寶-李後主/俏潘安》、《張國榮History - His Story》以及DSD 數碼復刻系列等等。《梅憶錄》更榮獲IFPI最暢銷十大廣東唱片之一。《梅憶錄》、《張國榮History - His Story》兩張專輯嘅部份收入分別為關懷愛滋以及兒童癌病基金籌款。
- 2008年宣佈由商人林建岳旗下豐德麗購入華星唱片，據知收購價達8,800萬元，成為東亞唱片一部分。其後東亞開始以「東亞+華星」嘅名義為前歌手重新發行部分唱片[2]。
- 2010年5月14號，樂壇天后楊千嬅正式由東亞旗下姊妹公司A Music轉投東亞唱片一部分嘅華星唱片。成為華星旗下首個回歸嘅女歌手。並喺10月8號推出回歸華星後全新唱片《Home》EP。
- 2010年10月18號，劉浩龍由東亞調去佢一部分嘅華星唱片。成為華星旗下首個回歸嘅男歌手。並推出轉調後第一首派台歌曲《冇事，有心》。
- 2011年1月7號，蘇永康加盟華星唱片。其後，韓紅亦調至華星。
- 2020年，楊千嬅轉投華納唱片。
歌手一覽 編輯
寰亞唱片 編輯
| 女歌手 | ||
|---|---|---|
| 韓紅 | ||
| 男歌手 | ||
| 蘇永康 | 劉浩龍 | |
八十至九十年代 編輯
男
女
組合
攷 編輯
- ↑ SCMP GROUP LIMITED Music Publishing Capital Artists Ltd
- ↑ "Lai Sun Group Music Publishing Capital Artists Ltd". 原著喺2015年9月24號歸檔. 喺2010年11月22號搵到.