釜

釜，煮食架生，如同煲。入便裝水同食料，下便起火燒。甚至頂口，可以放甑同蒸籠之類蒸煮。

釜

黑陶釜

釜形鼎，即錡

灶上面放咗釜，釜上便放籠

釜，世界各地出土文物，都好常見。現今仍然為世界各地所用。

釜字，近代中國，近乎唔用。只見南韓日本有用。然而，釜並非消失，而係轉咗字。廣東話地方，釜同煲，一音之轉。煲乃後起形聲字，代替轉為輕唇音嘅釜字。故此煲即係釜，釜即係煲。而古時秦人叫釜做𩰫，日後借用鍋字，廢咗𩰫。鍋亦係釜別名。

釜可以睇成缶，古字亦從缶，較為企身，開口闊多。有啲上有摺邊，若係陶造，釜身熱後，邊無咁熱，方便拎起。有啲底尖啲或圓啲，要有底座先可以放穏。

要喺釜下火燒，就要有支撐。出土文物見，有三件陶造支足，頂起個釜。後尾有啲索性釜身，造埋三足，變成釜形鼎，即係錡。有爐灶後，直放上爐同灶，就唔使腳。 釜喺石器時代已有，現時出唔少陶釜。隨住工藝進步，之後有青銅造，再之後有鐵造。

西洋釜（Cauldron），似勁大煲多啲。主要係放晒啲嘢入去煮。家下都甚少見，除非係拍巫師片，用來煉藥或者煮人。

字

釜

即今釜，曾經有所省畧。雖然出土文物有釜，然而未搵到相應甲骨文。

最早見於金文，一律從缶從父。缶於中，右上加父字做聲符。父字古為重唇濁音，上古時應讀似爸。並未收入萬國碼，電腦無依個字。

到戰國時，簡帛見到新字，上父下金成𨥏字，以示青銅造，以別於陶造。戰國時釜做量器，子禾子釜、陳純釜，容量二十公升多少少。

鬴

古時釜另有寫法，可以寫鬴，從鬲從甫。鬲係三足煮器，三足肥身，用處相近，借來表示釜。同釜一樣，可以用來蒸煮。而甫係聲符，上古都係重唇濁音。

說文

鍑屬。从鬲甫聲。

說文解字注

鍑屬也。𦫵四曰豆。豆四曰區。區四曰鬴。从鬲。甫聲。扶雨切。五部。鬴或从金。父聲。今經典多作釜。惟《周禮》作鬴。

煲

釜同煲，一音之轉。煲係後起形聲字，連康熙字典都無收。廣東話古無輕唇音，只有重唇音，釜轉為輕唇音後，民間依舊用重唇音，另造字煲。南韓釜山，拼音Busan，可以為證。

鍋

現今鍋字，係釜別名。古時秦國叫土釜做𩰫，後尾借咗鍋字。𩰫漸廢，由鍋字代替。

《說文》

秦名土釜曰𩰫。从鬲，㐄聲。讀若過。

《說文解字注》

秦名土鬴曰𩰫。今俗作鍋。土釜者、出於匋也。从鬲。聲。夂部𡕒、夸步也。讀若過。古禾切。十七部。

形

非洲用釜

釜大小不一，係圓口嘅。釜口多數係兩尺直徑，厚兩分。細釜釜口就得一半，厚仍然係兩分。

造

釜多數用鐵造，一係用廢鐵，一係用生鐵。整法係先造內模，曬乾。再整外模，等成個模乾晒冇水。跟住冶爐。鐵響爐熔成鐵水，倒入模底個窿。等佢冷一啲，重係紅卜卜，就揭開個模，睇下有冇穿有冇罅。一有罅就淋少少鐵水補，再用顯草整平。生鐵整通常要補多啲，廢鐵整就好少要補。

好釜用輕杖敲有木聲，聲差嘅第日易壞。

類器

釜、鬲、鼎，都蒸煮器。石器時代，煮法亦類似。只係形狀有別。

• 釜身無腳，要外加三支足承住。
• 鬲有三足，三足肥而中空，與身連成一體。
• 鼎有三足，純粹支撐用。

• 
  釜及支足
• 
  鬲
• 
  鼎

遠古人，唔同族羣，用器物都有偏好，往往相當持續。

出土釜、鬲、鼎，配合Ｙ染色體研究，古人基因研究，以及古今語言紀錄，用作長江以南族人分別。

• 南島語系，基因 O-M119 ，最先到達江南，偏好鼎。
• 南亞語系，越人，基因 O-M95 ，後入，偏好釜。
• 而漢語系商人，基因 O-M122 ，再後入，偏好鬲。

故此追踪出土釜器，亦即追踪古越人遷徙。

文化

唐字

• 破釜沉舟，即係連自己退路米糧都斷埋，代表決心。
• 黃鐘毀棄，瓦釜雷鳴。即係話賢人唔用，普通嘅人就上位。

日本

日本古時視釜為神器。有巫術、占卜、呪法用到釜，得到神明指示同判決。