鐵甲威龍
《鐵甲威龍》（RoboCop）係一部1987年嘅美國數碼鬅客動作電影，由保羅韋浩雲做導演，Edward Neumeier同Michael Miner編劇。主演係Peter Weller，其他配角有Nancy Allen、Dan O'Herlihy、Kurtwood Smith、Miguel Ferrer、Ronny Cox。
| 鐵甲威龍 | |
|---|---|
 | |
| 資料明細 | |
| 導演 | 保羅韋浩雲 |
| 監製 | Jon Davison[*] |
| 編劇 | Edward Neumeier[*] Michael Miner[*] |
| 主演 | Peter Weller[*] Nancy Allen[*] Dan O'Herlihy[*] Ronny Cox[*] Kurtwood Smith[*] Miguel Ferrer[*] Ray Wise[*] Felton Perry[*] Paul McCrane[*] Edward Edwards[*] 保羅韋浩雲 |
| 攝影 | Jost Vacano[*] |
| 製片商 | Orion Pictures[*] |
| 產地 | 美國 |
| 話 | 英文 |
| 上畫同發行 | |
| 上畫日期 | 美國：1987年7月17號 瑞典：1988年1月15號 德國：1988年1月7號 1987 |
| 前集同續集 | |
| 續集 | 鐵甲威龍2 |
簡介 編輯
第一集劇情主要講述鐵甲威龍誕生嘅前後同埋遭遇，而第二集同第三集都係講述鐵甲威龍所遇到嘅事同埋本身人性嘅心路歷程。
呢套戲入面其實隱伏咗好多社會問題，畀觀眾好多討論空間，比如：人死後其實重有冇可能變成機械咁嘅方式而繼續生存呢？經過死亡變成咗另一種存在方式之後，又會唔會重有前身嘅記憶？劇中嘅私營大財團 OCP 一直以接管底特律市為目標而千方百計，導致社區遭到蠶食，現實會唔會發生？又會有咩後果？……等。除此之外，戲裏面重會時不時穿插住一啲似真還假嘅新聞報導同埋廣告，其中嘅訊息好多都關乎我哋週圍發生緊嘅環境，好似臭氧層出現減退，汽車排放廢氣問題，太空戰略計劃嘅問題……等，睇吓睇過嘅人有幾多領會。
第一集劇情大綱 編輯
梅菲（Murphy）係一位新調任到底特律市（Detroit City）嘅機動警察，之不過喺佢第一次同拍檔露薏絲（Lewis）出勤時就出咗意外，俾一班控制區內罪惡，以卡雲斯（Clarence）為首嘅壞蛋幫殺死咗，至於露薏絲就俾人打暈跌咗落倉底逃過一劫。
喺之前，擁有當地規劃兼有警隊管理權嘅大財團 OCP 公司正研究緊發展機械警察，因為當中總裁迪．鍾斯（Jones）嘅全機械設計ED-209喺示範操作時失控殺死咗其中一個與會主任，財團主席感到非常失望，於是選用咗另一位技術主管波比（Bobby）嘅人類改造鐵甲戰士嘅計劃。因為咁，死咗嘅梅菲即刻被送到手術台，經過工程師嘅一輪改造之後，新一代擁有鐵甲身軀，但仍保有部份人類器官嘅半機械超級警察－－－鐵甲威龍（ROBOCOP）正式誕生。
鐵甲威龍嘅程式設定裏面，有三個佢一定要遵守嘅主要法則：
- 為公眾服務
- 保護無辜嘅市民
- 維持法紀
但係原來設定其實重隱藏咗第四項嘅保密法則，只有少數 OCP 高層先知道。因為經過洗腦嘅關係，鐵甲威龍嘅記憶庫裏面只有電腦輸入嘅資料，至於所有關於梅菲前身嘅記憶基本上已經冇晒，之但係工程師意料唔到嘅係，威龍居然會發夢，重夢見到梅菲記憶中嘅點滴同埋被殺嘅一刻，加上露薏絲從威龍無意識嘅慣性動作之中認得佢就係梅菲，於是威龍覺得非常困惑。後來喺出勤任務嘅時候，威龍遇返先前殺過梅菲嗰班人嘅其中一個，而呢個叫艾繆（Emil）嘅惡匪因為聽到威龍嘅口頭禪 「係生係死我都照拉」（Dead or alive, you're coming with me）同之前梅菲同佢講過嘅一樣，衝口而出話認得佢，呢一吓令威龍更加震憾，為求搵出原因，於是威龍返去警察總部翻查電腦檔案，終於搵出殉職警員梅菲嘅資料，後來更從點點湧出嚟嘅記憶之中知道自己就係梅菲。
威龍因為被殺變咗改造人而扯火，於是誓要搵出卡雲斯班人渣出嚟繩之於法。期間，提出改造人計劃嘅波比因為一時得意不知收歛而成為咗鍾斯嘅眼中釘，結果俾鍾斯收買咗嘅卡雲斯殺死；及後當威龍搗破製毒工場時當場捉到卡雲斯，不過卡雲斯為求自保，於是爆咗喺背後操控犯罪嘅其實係鍾斯。威龍捉咗卡雲斯返差館之後就隻身前往 OCP 大樓要拉鍾斯，但係鍾斯已經胸有成竹，佢除咗擁有威龍嘅行動追蹤器知道威龍會嚟之外，重有一樣秘密殺着，就係佢預先加咗喺威龍程式裏面嘅第四項法則；當威龍入到鍾斯嘅辦公室想進行逮捕嘅時候，突然第四法則啟動令到機件癱瘓控制唔到行動，原來呢項法則係用嚟限制威龍唔可以作出對抗 OCP 高層嘅行為。鍾斯一心要毀滅鐵甲威龍，希望財團主席會重用佢嘅全機械警衛計劃，於是派出佢嗰隻全機械警衛ED-209向威龍襲擊，威龍本身已經癱瘓緊，重俾隻機械怪嘅重型炮火猛打，唯有且戰且退咁走到停車場，好彩遇到駕車嚟營救嘅露薏絲，最後逃離咗追捕，去到一個荒廢工場暫避。
OCP 嘅副總裁辦公室入面，鍾斯將個追縱器交咗畀保釋出嚟嘅卡雲斯，重供應咗最新式嘅重型炮畀佢嚟對付威龍，於是卡雲斯拿拿林召集佢嗰幾個手下，一齊去到荒廢工場夾擊威龍，不過威龍亦都早有準備，經過一輪游擊戰之後，呢班匪幫最終都俾威龍消滅晒。
威龍負傷返去 OCP 大樓，直闖入會議室，當時包括鍾斯嘅一眾高層正喺度開緊會，威龍因為受到第四法則限制唔可以對鍾斯作出逮捕行動，於是向財團主席同一眾官員展示鍾斯曾經親口承認派人殺死波比嘅錄影片段，鍾斯知道自己仆咗街，於是掹鎗狹持財團主席要求畀直升機佢走佬，財團主席一嬲之下即時宣佈炒咗鍾斯，而威龍程式第四項法則嘅限制即時解除，就地將鍾斯正法。
財團主席安全脫險，隨口就問正要離開嘅威龍：「靚仔鎗法唔錯吖，你叫咩名？」
威龍回頭一笑：「梅菲。」
演員 編輯
- Peter Weller 飾演 Alex Murphy / 鐵甲威龍
- Nancy Allen 飾演 Anne Lewis
- Dan O'Herlihy 飾演 The Old Man
- Ronny Cox 飾演 Dick Jones
- Kurtwood Smith 飾演 Clarence Boddicker
- Miguel Ferrer 飾演 Bob Morton