除夕

  呢篇文講舊曆最後一日。想搵公曆最後一日嘅話，請睇元旦前夕。

除夕（粵拼：ceoi4 zik6）係指舊曆最後一日，通常都係係十二月三十（俗稱年三十、大年三十），如果嗰年臘月得廿九日，除夕就係十二月廿九（俗稱年廿九）。

嗰晚傳統上會食團年飯、賣懶、派壓歲錢、守歲、放炮仗、迎財神。

喺中文語境，「大除夕」同「除夕」有時會撈亂嚟講，農曆除夕同公曆除夕都一樣叫「除夕」，或者一樣叫「大除夕」。

廣東除夕習俗

廣東人喺除夕前一、兩日會大掃除，就係所謂既「年二八，洗邋遢」，寓意係將啲唔好既嘢洗走。喺香港，香港人會喺除夕晚，一家大細一齊食團年飯；食團年飯既寓意係全家人整整齊齊，團團圓圓。新界圍村既原居民會喺除夕食盆菜。香港人仲會喺食完團年飯之後，一家大細行花市。而潮州人會喺除夕日，一家老少換新衫，然後「祭祖」，祭品同埋儀式同平時「祭祖」差唔多。另外，香港人，尤其係潮州人，有除夕夜守歲既習慣。

除夕守歲習俗

除夕既守歲風俗，最早係喺南北朝時期，當時就有「一夜連雙歲，五更分二年」既講法。到咗唐朝，除夕守歲既風俗變得好普遍，就好似唐太宗李世民既〈守歲〉詩「暮景斜芳殿，年華麗綺宮。寒辭去冬雪，暖帶入春風。階馥舒梅素，盤花卷燭紅。共歡新故歲，迎送一宵中」，佢所講既「共歡新故歲，迎送一宵中」就係形容唐朝除夕守歲既習俗。