集郵

集郵又叫儲郵票，係一種興趣，又係一種學問。通過收集、研究各種「郵品」，集郵者除咗可以學識世界各國嘅歷史、地理、花草魚蟲同埋人物等相關嘅知識以外，重可以培養出一種「禪定」嘅情趣同埋培養耐性。唔少學校都鼓勵學生集郵，認為集郵嘅好處係怡情、益智等等。

集郵係世界上最普遍嘅興趣之一，估計全世界有成3,000萬集郵者；如果根據美國郵政嘅定義，儲咗最少一個郵票都叫集郵者嘅話，單喺美國就估計有2,000萬人^[1]。

「郵品」唔單止包括郵票，重包括埋郵政機構發行嘅封、片、簡、戳等郵政用品，例如首日封、紀念封、原圖卡、郵政明信片、小全張、小本票、小型張、紀念郵戳等。

對於一尐細尐嘅國（例如列支敦士登）嚟講，集郵者係主要嘅財政收入來源。有尐國會專門針對集郵者出一尐設計得好靚嘅限量郵品，嗰尐郵品嘅發行量往往超過郵政需求，甚至根本唔會用嚟寄信，呢尐會列為「有害郵品」。

因為過份炒作，有時會出現一尐唔理性噉搶購郵票嘅熱潮。1891年 1月22號香港發行嘅「香港開埠五十週年」（1841年—1891年）全球第一套加蓋改值紀念郵票，有英女皇頭像郵票加印英文「香港金禧紀念」，因為發行量只得50,000，而且每人限買20枚，郵局朝頭早一開門就出現人踩人嘅混亂情況，最後搞到兩個葡萄牙人畀人逼死、一個荷蘭水兵畀人打死^[2]。