香港雜記
《香港雜記》，係首本用唐字寫嘅香港專書，由陳鏸勳所著。本書出版時，係大清末葉。光緒二十年，卽係甲午年，一八九四年，香港中華印務總局印仿聚珍板。內容講及香港當時概況，以及開港史。書分十二章，分別係地理形勢、開港來歴、國家政治、稅餉度支、中西船務、中西商務、中西醫所、民藉練兵、街道樓房、水道暗渠、華英書塾同埋港則瑣言。作者引用英人沙拔日記，亦有自己實地考察，同引用香港政府統計。
寫書之時，香港只包括香港島、九龍半島同昂船洲。而新界，包括新九龍部份，係由廣東省廣州府下，新安縣九龍司所轄。
出版時，安撫華民政務司搵過陳鏸勳傾過，要執過幾個字眼，如唔可以用江寧條約所禁嘅夷字，英皇后要更正做英皇帝，同埋中廷抬頭，英廷都要抬頭。本書並未改字，但另印更正明示。可見本書係香港出版。
狀況 編輯
該仿聚珍板，現存於香港大學。書中稱附十五圖，之不過，香港大學嗰本從缺。圖書館亦有流傳影印本。
中國廣東暨南大學出版社，出有《嶺南叢書》，當中有《香港雜記》。出版時爲一九九六年，用簡化字重排，叫《香港雜記（外二種）》。排版時，文亦由直書改成橫書。文由莫世祥校注，有改字，亦有斷句，兼加標點。書中亦附有九龍寨城文案同節錄時人有關香港嘅遊記。