香港電影分級制度

香港電影分級制度係香港嘅電影分級制度，根據香港法例第392章《電影檢查條例》喺1988年11月10號制定，分級主要根據觀眾年齡限制劃分為I、II、III三級；1995年因為《電影檢查條例》修訂，所以將第II級再細分為IIA同IIB兩個級別，所以部份人會叫呢個電影分級制度做香港電影三級制（而呢條法例亦叫做《兒童不宜法例》）。

香港戲院門票上標明電影嘅級別

香港戲院展示第Ⅲ級影片嘅告示，及《電影檢查條例核准證明書》

根據香港法例，打算喺香港上映、發行錄影帶或鐳射影碟嘅電影，都要送交通訊事務管理局（2012年4月1號之前係香港影視及娛樂事務管理處）評級，並由該處處長核准。第III級錄影帶或影碟嘅包裝物，同埋第III級影片嘅宣傳資料，喺發行或公開展示之前，更需要送交電影檢查監督核准。

所有經評級之後嘅電影，無論係喺戲院上映，又或者係以鐳射影碟等媒體發行，都一定要展示由通訊事務管理局發出嘅《電影檢查條例核准證明書》（簡稱「電檢紙」）副本。

分級嘅目的，係為咗保護18歲以下未成年人士，以免受到不良電影內容影響。噉做亦能夠協助家長幫仔女揀電影。

第I及II級屬勸諭性質，並無法定年齡限制；IIA或IIB級嘅影片就鼓勵家長陪同仔女去睇可以指導佢哋。第III級就最嚴格，唔可以賣飛畀18歲以下人士入戲院睇，法例容許驗票員檢查入場者嘅身份證。

除此之外，電影預告片、教育影片同文化影片都需要送檢，但唔使進行分級。

香港第一套被列為第III級嘅港產電影，係由牟敦芾執導嘅《黑太陽731》。

香港地區以外嘅人可能會誤解「III級電影」即係鹹片。其實，以充滿血腥暴力鏡頭、粗口對白、恐怖、描述喺社會內具爭議嘅道德價值等題材電影，亦會被評為第III級電影，同時裸露鏡頭可能出現喺非第III級影片。不過，分級制開始之時，一直只有過去被禁制嘅色情電影送檢，所以大眾至有噉嘅錯覺，直到《三狼奇案》送檢，係第一部因為過度暴力而被評定為第III級嘅電影。

分級定義同標誌

電影送交評級之後，會根據以下定義，被評為以下三級其中之一：

級別	符號	定義	代表符號
第I級		適合任何年齡人士觀看 Suitable for All Ages	黑色圓形內有白色I字
第II級 （分拆前）		兒童不宜 Not Suitable for Children	黑色正方形內有白色II字樣
第IIA級		兒童不宜 Not Suitable for Children	黑色正方形內有白色IIA字樣
第IIB級		青少年及兒童不宜 Not Suitable for Young Persons and Children	黑色正方形內有白色IIB字樣
第III級		只准18歲或以上人士觀看 Persons Aged 18 and Above Only	黑色或其他顏色三角形內有白色III字

其他

内文：鹹片

香港坊間有「四級片」呢個稱呼，又叫做「四仔」，但唔係法定等級。「四仔」一般係超出香港電影分級制度所限嘅影片及相近作品，即禁片。冇打格色情片、推翻政府、推廣違法等原素，一般被視為「四級」禁片。

睇埋

• 香港電視節目分類制度
• 香港電影
• 電影分級制度

出面網頁

• 香港電影分級嘅介紹
• 部份電影嘅分級資料
• 工商及科技局審核委員會（電影檢查）
• 香港雙語法例資料系統 香港法例第392章–電影檢查條例
• 如何得悉電影播放版本有沒有刪剪？，原載博客《講。鏟。片》，2007-10-16。