香港高級程度會考

  提示：呢篇文講嘅唔係香港高等程度會考‎。

香港高級程度會考（英文：Hong Kong Advanced Level Examination，HKALE，慣稱高考、A-Level）係香港考試及評核局主辦、已經停辦嘅其中一個公開考試，前身係香港大學高級程度考試。

香港中學生要喺香港中學會考達到指定分數（包括中國語文科同英國語文科合格），並要修畢兩年制嘅中六同中七預科課程，先合資格參加呢個考試，係香港中學教育舊制之中嘅最後一個階段。最後一屆畀學校考生嘅高級程度會考喺2012年舉行，最後一屆高級程度會考喺2013年淨係畀自修生應考。

香港高級程度會考喺每年3至5月舉行，成績喺6月底公佈。高考設19個高級程度同20個高級補充程度科目。高級補充程度科目所需嘅教學時間係高級程度科目嘅一半，而喺學術要求方面，就同高級程度科目大致相同。大部分日校考生報考5科。除咗中國語文及文化、英語運用兩科（絕大部分學校考生都報考）同其他指定用中文或英文答嘅科目之外，所有試卷考生都可以揀用中文或者英文答。中英文版試卷嘅評卷參考同評級標準完全一樣，應考語文唔會列喺成績通知書或考試證書上。

高考嘅成績共分6級（A至F），以A級最高，F級最低，成績喺F級以下就不予評級（以UNCL表示）。由2002年起，香港高級程度會考嘅一級二等制（即A(01)、A(02)、B(03)、B(04)……等）已經取消。

高考嘅E級，無論係高級程度或高級補充程度嘅科目，都相當於英國普通教育文憑試高級程度考試相應科目合格。

睇埋

• 香港教育
• 香港中學會考
• 新高中學制嘅香港中學文憑考試
• 大學聯合招生辦法

攷

• 香港教育署（1981），香港教育制度全面檢討。於2005年5月15日存取。
• Tang, Kwok-Chun and Bray, Mark (2000). "Colonial models and the evolution of education systems - Centralization and decentralization in Hong Kong and Macau". Journal of Educational Administration 38 (5), p. 482.
• 香港考試及評核局（2003）。香港高級程度會考：考試規則及課程2005。香港：香港考試及評核局。ISBN 962-570-975-4

出面網頁

• 香港考試及評核局 - 香港高級程度會考 （繁體中文）
• 香港公開考試歷史發展 （繁體中文）