Beyond

Beyond係香港搖滾樂隊，喺1983年組成。

Beyond
樂隊
音樂類	搖滾樂、流行搖滾、硬搖滾、實驗音樂、藝術搖滾、藍調搖滾、重金屬beyond
演奏樂器	結他、低音結他、鼓
出道地	英屬香港
代表作品	大地（1988） 喜歡妳（1988） 真的愛你（1989） 光輝歲月（1990） Amani（1991） 長城（1992） 海闊天空（1993）
活躍年代	1983－1999年；2003－2005年
唱片公司	KINN'S MUSIC LTD（1987–1988） 新藝寶唱片（1988–1991） 華納唱片（1992–1993） 滚石唱片（1994–1999)
相關團體	高速啤機、Unknown
前任成員
黃家駒（1993年意外逝世） 黃貫中（2005年樂團解散） 黃家強（2005年樂團解散） 葉世榮（2005年樂團解散） 早期成員 鄧煒謙（1983年離隊） 李榮潮（1983年離隊） 關寶璇（1984年離隊） 陳時安（1985年離隊） 劉志遠
獎 香港電影金像獎 最佳原創電影歌曲 2004《無間道2》

樂隊名Beyond係由第一代主音結他手鄧煒謙改嘅，意思係「超越」。喺1998年出嘅樂隊自傳書《擁抱Beyond歲月》入面，鼓手葉世榮解釋過，由於樂隊自從組成開始已經有自己嘅創作，同當時香港其他多數翻唱外國歌嘅樂隊好唔同，所以「Beyond」有超越一般樂隊所做嘅音樂領域咁解，但佢同時亦強調，佢哋將樂隊名改做"Beyond"，並唔係要超越人哋，而係要超越自己。

樂隊成員曾經有五個人咁多，但係以黃家駒、黃家強、黃貫中、葉世榮四個人嘅陣容最多人識。黃家駒死咗之後，樂隊無加入新成員代替佢個位（有時喺現場時會請黃仲賢作為客座結他手，代替黃家駒嘅部份），維持番三個人直到2005年解散。

成員

• 黃家駒（主音歌手同埋節奏結他手，創隊成員，1993年意外過身）
• 黃家強（低音結他手，1983年底加入）
• 黃貫中（主音結他手，1985年加入）
• 葉世榮（鼓手，創隊成員）

其他加入過樂隊嘅成員包括鄧煒謙（結他手，1983年尾離隊）、李榮潮（低音結他手，1983年離隊）、Owen Kwan（主音結他手，1984年離隊）、陳時安（主音結他手，1985年離隊）同埋劉志遠（結他同埋鍵琴手，1988年離隊）。

Beyond嘅發展歷程

地下時期（1983-1986）

八十年代初，黃家駒同埋葉世榮經琴行老闆嘅介紹而識得，發覺大家都受英國搖滾樂嘅影響，音樂嘅取向一樣，於是夾咗Beyond樂隊。無幾耐，佢哋參加《結他雜誌》搞嘅結他比賽攞咗冠軍。1983年尾第一代嘅低音結他手李榮潮走咗，黃家駒嘅細佬黃家強就加入替咗李榮潮個位。佢哋唔停咁寫歌，最想開返場演唱會同埋出一隻屬於自己樂隊嘅碟。

嗰陣Beyond試過好多種音樂風格，包括藝術搖滾，後朋克新浪潮，重金屬甚至華麗搖滾，亦都開始試吓用粵語寫歌，打破嗰陣時香港嘅地下樂隊多數用英文寫歌嘅情況，Beyond用前衛樂隊嘅形象確立咗喺香港地下樂壇嘅江湖地位。

1985年，Beyond向目標又近一步，就係自己出錢搞咗《永遠等待演唱會》，但係呢個時候主音結他手陳時安要走，於是樂隊嘅平面設計師黃貫中因為咁樣得到邀請而加入，第二年成員再夾錢出咗盒帶《再見理想》之後，終於有經理人睇得起簽約。

五人時期（1986-1988）

雖然Beyond當時已經成立咗好幾年，但係直到1987年出咗第一隻EP《永遠等待》同埋大碟《阿拉伯跳舞女郎》之後，至開始踏入主流樂壇畀人認識。但係嗰陣Beyond嘅音樂風格同埋形象唔被大眾接受，唱片唔賣得。1988年出咗《現代舞台》，雖然啲歌已經貼近咗主流啲啲，反應仍然麻麻地。呢個時候，劉志遠亦都因為要去第二度讀書而離開樂隊。

之後，Beyond簽咗當時開咗無耐嘅新藝寶唱片公司。跟住嗰隻碟《秘密警察》就好賣啦，碟入面《喜歡妳》、《大地》都成為流行歌，Beyond開始攞到電子傳媒嘅獎。

雖然歌曲慢慢畀大眾受落，但係呢啲都唔係Beyond最鍾意嘅音樂種類，加上地下時期追隨佢哋嘅歌迷彈佢哋無咗樂隊原有嘅風格，鬧佢哋係「搖滾叛徒」。呢段日子Beyond過得並唔容易。

輝煌時期（1989-1991）

不過，Beyond並無理到外面嘅人嘅指責，黃家駒話，佢哋知道自己做緊乜嘢，要喺商業化嘅香港市場玩自己真正鍾意嘅音樂，就一定要先令到樂隊出名，當多咗人去聽Beyond嘅歌後，佢哋就會玩番自己鍾意嘅音樂。於是，成員拍埋電視劇同戲，造咗個青春健康嘅形象，吸引到唔少後生歌迷。

真正令Beyond推上高峰嘅，係1989年一首以歌頌阿媽為主題嘅歌《真的愛妳》。由於歌曲大熱，連帶埋收錄嗰隻歌嘅碟《Beyond IV》攞到雙白金成績，嗰年Beyond喺伊利沙伯體育館開咗七場「真的見證演唱會」。1990年出咗粵語碟《命運派對》，更加攞埋三白金嘅好成績。

香港市場上咗軌道，Beyond於是就開始發展台灣、中國大陸、新加坡、馬來西亞等等嘅海外市場，簽咗台灣滾石，出咗第一張國語碟。1991年9月，Beyond喺香港體育館開咗五場「生命接觸演唱會」。呢個時候，日本經理人公司Amuse對Beyond有興趣，希望同佢哋簽約，將Beyond帶到日本發展。

日本時期（1992-1993）

1992年初，Beyond轉會去華納唱片，重簽埋Amuse全力打開日本市場長期住咗喺日本。因為文化差異加上溝通唔到，佢哋四個都話日本嘅生活好悶，但係嗰度嘅音樂令佢哋大開眼界，學到唔少錄音同埋演奏嘅技巧。喺年中出咗粵語碟《繼續革命》入面，見到Beyond創作嘅風格已經同新藝寶時代有明顯分別。

1993年5月，Beyond出咗粵語碟《樂與怒》，成員喺香港只係留咗約莫一個月做宣傳就返日本。喺1993年6月24號凌晨，樂隊喺日本東京富士電視台錄影遊戲節目嗰陣發生咗意外，黃家駒喺2.7米高舞台跌咗落嚟，頭部着地重傷暈咗，入咗醫院六日之後喺當地時間6月30號下晝4點15分過身，死嗰陣得31歲。收錄喺《樂與怒》呢隻碟嘅歌《海闊天空》，變成Beyond最後一首由黃家駒唱嘅派台歌。

呢次意外唔單止令Beyond無咗阿頭，對樂隊三個成員嚟講更加係一個好大嘅打擊。Beyond其他成員唞咗四個月，喺嗰年11月商業電台嘅「創作人音樂會」演唱，話會繼承家駒嘅遺志繼續出碟。

Beyond喺日本嗰兩年，出咗兩張日語大碟同埋三張日語細碟。

三人時期（1994-1999）

1994年初，三個人嘅Beyond簽咗香港滾石唱片，跟住開始錄粵語碟《二樓後座》。

Beyond之後另外出咗兩張日語大碟同埋兩隻日語細碟，同Amuse嘅合約完咗之後，Beyond就無再出日語碟，集中火力去番香港同埋台灣嘅市場。簽咗香港滾石之後，佢哋出嘅國語碟香港都有得賣。三個得到同前經理人發生合約糾紛嘅教訓之後，開咗Beyond Publishing Co Ltd，攞番歌曲嘅版權，唱片公司淨係同佢哋發行。

1996年3月，Beyond喺香港體育館開咗黃家駒過身之後嘅第一個大型演唱會「Beyond的精彩演唱會」。呢四場演唱會展示咗佢哋三個仍然強大嘅實力同埋樂隊頑強不屈嘅生命力。喺最後一場嘅演唱會裏面，黃家強一邊喊住一邊清唱《祝您愉快》畀遠方嘅哥哥，感動台下面所有歌迷，成為呢次演唱會入面最感人嘅場面。

之後幾年，Beyond出咗好多隻粵語同國語碟，純熟嘅編曲技巧，令到Beyond變做實力派樂隊。1999年11月，Beyond宣佈出埋粵語碟《Goodtime》兼開埋「Good Time演唱會」之後，樂隊就會暫停活動，每個成員將會作個人發展。

個人時期（2000-2005）

2000年，Beyond三位成員開始自己搵食。2001年黃貫中同埋葉世榮都出咗第一隻自己的碟，黃家強第一隻碟就喺2002年出。

2003年4月，Beyond三個為咗慶祝樂隊成立20周年，再次喺埋一齊開咗五場「Beyond超越Beyond演唱會」。雖然演唱會嗰陣香港咁啱爆發緊非典型肺炎，演唱會仍然好順利舉行，重得到唔錯嘅口碑，結果嗰年六月再開多三場。三個成員重將黃家駒嘅其中一首遺作編過曲派台出版，就係紀念周年歌《抗戰二十年》，嗰年佢哋重第一次開世界巡迴演唱會。

2004年樂隊憑住電影《無間道II》嘅主題曲《長空》，攞咗香港電影金像獎「最佳電影原創歌曲」獎。不過11月三個人因為音樂理念嘅問題，宣佈決定第二年唱完巡迴演唱會之後正式解散。

2005年樂隊開咗「Beyond the Story Live」告別巡迴演唱會，最後一站係新加坡。樂隊解散之後，三位成員繼續以「音樂人」嘅姿態各自發展自己嘅音樂事業。

出過嘅碟

• 《香港》（合輯，1983年）
• 《再見理想》（盒帶，1986年）
• 《永遠等待》（細碟，1987年）
• 《新天地》（細碟，1987年）
• 《亞拉伯跳舞女郎》(1987年12月）
• 《孤單一吻》（單曲，1987年）
• 《現代舞台》（1988年）
• 《舊日足跡》（1988年）
• 《秘密警察》（1988年12月）
• 《Beyond IV》（1989年）
• 《真的見證》（1989年）
• 《天若有情》（1990年）
• 《大地》（國語，1990年）
• 《戰勝心魔》（細碟）（1990年）
• 《命運派對》（1990年）
• 《光輝歲月》（國語，1991年）
• 《猶豫》（1991年）
• 《繼續革命》（1992年7月）
• 《無盡空虛》（細碟，1992年12月）
• 《信念》（國語，1992年12月）
• 《樂與怒》（1993年5月）
• 《海闊天空》（1993年9月）
• 《二樓後座》（1994年6月）
• 《Paradise》（國語，1994年7月）
• 《Sound》（1995年6月）
• 《愛與生活》（國語，1995年10月）
• 《Beyond得精彩》（細碟，1996年2月）
• 《請將手放開》（1997年4月）
• 《驚喜》（1997年12月）
• 《這裡那裡》（國語，1998年2月）
• 《Action》（細碟，1998年7月）
• 《不見不散》（1998年12月）
• 《Good Time》（1999年11月）
• 《Together》（細碟，2003年4月）

拍過嘅電視劇／音樂特輯

• 《淘氣雙子星》（黃貫中、黃家強，1989年）
• 《夠Hit鬥玩Beyond加草蜢》（1989年）
• 《勁Band四鬥士》（1990年）
• 《Beyond放暑假》（共12集，1991年7月至9月）

做過嘅戲

• 《靚妹正傳》（1987年）
• 《戀愛季節》（1987年）
• 《黑色迷牆》（1989年）
• 《吉星拱照》（1990年）
• 《開心鬼救開心鬼》－演出同埋戲嘅配樂（1990年）
• 《忍者龜》（配音，1990年）
• 《忍者龜II》（配音，1991年）
• 《Beyond日記之莫欺少年窮》（1991年）
• 《豪門夜宴》（1991年）
• 《墨斗先生》（2004年）

開過嘅重要演唱會

• 「永遠等待演唱會」@堅道明愛中心（1985年7月）
• 「香港Beyond演唱會」（北京）@首都體育館（1988年10月）
• 「真的見證演唱會」@伊利沙伯體育館（1989年12月）
• 「生命接觸演唱會」@香港體育館（1991年9月）
• 「Beyond Unplugged Live」 @吉隆坡體育館（1993年5月）
• 「Beyond的精彩演唱會」@香港體育館（1996年3月）
• 「Beyond Good Time演唱會」@香港會議展覽中心（1999年12月）
• 「Beyond超越Beyond演唱會」@香港體育館（2003年4至5月）
• 「Beyond超越Beyond演唱會（Part II）」@香港體育館（2003年6月）
• 「Beyond the Story Live」@香港體育館（2005年1至2月）
• 「Beyond the Story Live」（新加坡）@Singapore Indoor Stadium（2005年10月）

出面網頁

• 擁抱BeyOnd歲月 blog
• 【爲Beyond乾杯,爲家駒乾杯】--Beyond rare music