Ghost Rider,有譯惡靈騎士幽靈騎士惡靈戰警鬼面騎士幻影騎士,係美國Marvel公司一本暢銷漫畫入面嘅虛構反英雄角色。

Ghost Rider造型

第一本Ghost Rider單行本漫畫喺1973年出版,相對於其他美國漫畫超級英雄可以講係最後生。故事係講一個電單車特技人 Johnny Blaze,將自己嘅靈魂出賣嚟交換摯愛條命,結果受到詛咒,每晚變成邪靈上身嘅惡魔,騎住架地獄之火骷髏頭電單車(Hellcycle)周圍搞嘢。

Carter Slade 編輯

第一代 Ghost Rider 喺 1967年2月出現,嗰陣嘅 Ghost Rider 叫做 Carter Slade。後來Marvel Comics要推出新嘅 Ghost Rider 故事(就係家下嘅 Ghost Rider),所以將原版 Ghost Rider 改名為 Phantom Rider。

Phantom Rider 個造形同而家嘅 Ghost Rider 好唔同,佢係一個成白雪雪,帶面具,Phantom Rider 都唔係渣電單車,而係騎馬。同一個普通西部牛仔無乜分別,係一個靈異西部故仔。

Carter Slade 全身白雪雪其實係嚟自印地安巫醫一種裝備,令佢喺夜晚可以發光,結果喺以前落後嘅美國西部啲人,喺夜晚見到呢個發光嘅人,就以為佢係鬼,所以就叫佢做 Phantom Rider,好多壞人就係因為咁畀佢嚇親。

Johnny Blaze 編輯

1972年8月 Ghost Rider 第一次喺 Marvel Spotlight 出場,由 Roy Thomas 同 Gary Friedrich 創作,Mike Ploog 負責畫。

Johnny Blaze 係一個電單車特技人,佢為咗救佢患咗不治之症嘅繼父 Crash Simpson,而將自己嘅靈魂出賣咗畀 Mephisto,之後佢變成一個着住火嘅骷髏頭,而且會得到惡魔嘅力量,四周圍幫 Mephisto 搞搞震。

出賣咗靈魂之後佢繼父 Crash Simpson 果然好返,但同樣係電單車特技人嘅 Crash Simpson,喺好返之後無耐就喺一次單車特技意外入面死咗。

Johnny Blaze 搵返 Mephisto 講數,但 Mephisto 就話應承幫佢繼父去除病痛,無話佢唔會死於非命喎。搞到 Johnny Blaze 臖過火屎,之後佢喺一啲魔法書上面搵到防禦法術,加上臖過火屎,爆發出嚟嘅力量,令佢最終擺脫咗 Mephisto,但就唔覺意釋放咗佢身上嘅惡魔力量來源:惡魔Zarathos。而由於 Zarathos 係 Mephisto 嘅奴隸,所以 Mephisto 仍然可以有限度咁控制 Johnny Blaze。一方面佢用惡魔嘅力量去伸張正義,另一方面佢又俾 Mephisto 控制去做壞事,於是形成 Johnny Blaze 喺 Ghost Rider故仔入面,經常充滿住好多人性掙扎。

Daniel Ketch 編輯

第二代 Ghost Rider 喺 1990年3月出現,有一次 Daniel Ketch 同佢家姐 Barbara 俾班歹黨搞,之後有一架神秘電單車喺 Daniel Ketch 面前出現, Daniel一騎上咗架電單車之後,就變成咗Ghost Rider,雖然之後將啲歹黨打走,但就救唔到家姐,結果佢家姐俾班歹黨入面一個叫 Blackout 嘅人殺死咗,因為咁佢就成為咗「黑夜之子」(Midnight Sons)。

能力 編輯

Ghost Rider 最搶眼係佢個火焰骷顱頭,除此之外,由於佢係電單車特技人,所以電單車技術好勁,當佢變咗做 Ghost Rider 之後,佢架電單車甚至可以喺任何平面,包括喺水上面都一樣可以行,而且快到無影。重會有超人嘅力量,有25噸嘅力量。

  • Johnny Blaze:除咗電單車技術,Johnny Blaze重有一樣「Hellfire」(地獄之火),係一種特殊火焰,佢燒嘅唔係實質嘅嘢,而係靈魂,但呢種火亦可以轉為一種實體嘅火燄,呢啲火可以根據 Johnny Blaze 嘅想法而變成佢想要嘅嘢,例如佢可以將啲火變成一架單車,或者變成鎗入面嘅子彈發射。
  • Daniel Ketch:同樣都有 Hellfire,但佢就唔係咁識得點用,所以佢主要用電單車鏈做武器,條鏈可以變到好長,而且可以轉變成任何形式武器。不過 Daniel Ketch 最勁係一種叫做 Penance Stare(贖罪凝視),同 Hellfire 一樣可以用嚟燒人嘅靈魂,只要佢一啤住你,咁畀佢啤住嘅人就會重新經歷所有曾經犯下嘅罪行同錯誤無數次。你點樣害人,佢就點樣害返你。

周邊產品 編輯

  • 電影:Ghost Rider 電影(港譯:幽靈車神)由 Nicolas Cage 做 Johnny Blaze,2007年2月16號美國上映