TNG
提示：呢篇文講嘅唔係Tap & Go。
想搵馬來西亞支付卡「TnG」嘅話，請睇一觸即通卡。TNG係香港嘅儲值支付工具持牌機構，提供TNG電子錢包（TNG Wallet）嘅支付平台，可以做電子交易、外幣兌換同帳單支付。TNG喺2013年創立，2015年開始提供服務，到2017年香港用戶人數超過60萬。TNG籌備喺2019年喺紐約或者香港上市。
TNG可以經7-Eleven、OK便利店或者金管局收銀車增值，亦可以經中銀香港、集友銀行或者南洋商業銀行嘅網上銀行增值，至於信用卡增值就要收2.5%手續費。2018年9月底，TNG接入香港轉數快（FPS），可以即時將錢由本地銀行戶口或者其他電子銀包轉入或者轉出去。
雖則TNG嘅宣傳口號係「香港人的電子錢包」（香港人嘅電子銀包），但皆因唔係好多舖頭收TNG，所以喺香港本地人並唔算普及，反而憑住匯款方便嘅特點，吸引咗唔少外籍家庭傭工去用，將份糧匯返鄉下。