後小松天皇
(由上皇幹仁跳轉過嚟)
後小松天皇（日文：後小松天皇／ごこまつてんのう Go-komatsu Tennō；1377年8月1號—1433年12月1號）係日本第一百位天皇，亦係持明院統第六代天皇，原名幹仁（日文：幹仁／もとひと Motohito），響1392年11月19號至到1412年10月5號在位。
經歷
編輯佢響1382年冊封做皇太子，同年老豆後圓融天皇讓位畀佢做天皇。
佢響任內最大嘅貢獻就係統一咗南北朝，但係後嚟實權畀大臣足利義滿掌握，搞到班使者唔知當今日本天皇係後小松天皇，以為足利就係日本天皇。咁樣一嚟，後小松天皇就畀人懷疑佢之所以做到天皇係因為有足利嘅幫助。
響大覺寺統嘅後龜山天皇投降嘅時候，後小松天皇曾經應承過佢，話佢死咗之後會傳位畀後龜山天皇大仔小倉宮恆敦親王，爾次談判叫做明德和約。但係後嚟後小松天皇聽咗足利義滿嘅說話，將皇位傳畀自己個仔實仁親王，違反咗明德和約，所以導致咗大覺寺統嗰邊嘅強烈不滿，特別係恆敦親王同佢後人。之後好長時間入面，佢哋試圖搶返皇位，即係後南朝運動。
佢將皇位傳畀實仁親王之後，自己就做上皇，改叫上皇幹仁，實施院政，而實仁就係稱光天皇。
後嚟，稱光天皇早死，所以佢又傳畀契仔、 崇光天皇嘅太孫伏見宮彥仁親王，彥仁就係後花園天皇，而佢就繼續實施院政。佢做咗廿年嘅上皇，響1433年死咗，終年五十六歲。