主題關係

喺語言學裡面，主題關係（又叫做語義關係）係指一個名詞或者短語喺句子裡面同動詞之間嘅關係。常見嘅主題關係角色包括：

1. 執行者，指執行一個主動動作嘅實體，例如「我做作業」裡面嘅「我」；
2. 體驗者，指執行一個非主動動作或者體驗到一種感覺嘅實體，例如「我見到常威打來福」裡面嘅「我」；
3. 主題，指承受動作，但係唔改變狀態嘅實體，例如「佢有兩個仔」裡面嘅「仔」；
4. 承受者，指承受動作，而且改變狀態嘅實體，例如「我做作業」裡面嘅「作業」，有時可以同「主題」通用；
5. 工具，指被執行者用來執行動作嘅實體，例如「我用棍打人」裡面嘅「棍」；
6. 自然力或者不可抗力，指大自然嘅力量，例如「颱風逼近廣州」裡面嘅「颱風」；
7. 位置，指動作發生嘅位置，例如「我到咗深圳」裡面嘅「深圳」；
8. 方向，指動作發展嘅方向，例如「本車開往廣東奧體球場」裡面嘅「廣東奧體球場」；
9. 接收者，指接收另一個實體嘅實體，通常祇會用於及雙物動詞嘅間接賓語，例如「我畀咗本書佢」裡面嘅「佢」；
10. 起源，指動作開始嘅地方，例如「封信係來自溫哥華嘅」裡面嘅「溫哥華」；
11. 時間，指動作發生嘅時間，例如「地鐵今日又發生故障」裡面嘅「今日」;
12. 受益者，指從動作當中受益嘅實體，例如「我幫我女朋友洗碗」裡面嘅「女朋友」，有啲語言學家用「受益者」來包括埋「受害者」；
13. 受害者，指從動作當中受害嘅實體，例如「我搞到紅茶館唔見咗兩打碗」裡面嘅「紅茶館」；
14. 方法，指執行動作嘅方法或者途徑，例如「我用妙計破解咗紫金密碼」裡面嘅「妙計」；
15. 目的，指執行動作嘅目的，例如「佢自宮係為咗練《葵花寶典》」裡面嘅「練《葵花寶典》」；
16. 原因，指導致實體執行動作嘅原因，例如「因為出面好凍，所以我關咗窗」裡面嘅「因為出面好凍」。

喺粵語裡面，一個名詞或者短語可以同時有兩種主題關係角色。

睇埋

• 語義
• 故仔