佳麗貸

佳麗貸係中國喺2017年左近開始出現嘅一種另類借貸服務，以女性為服務對象，以「低利息、無抵押、放款快」招徠，女性嘅「顏值」越高，借到嘅錢就越多。呢種借貸服務一般被視為犯法，而且實際上利息極高，涉及性相關嘅威脅，搵唔到錢嘅話可能要提供性服務，甚至捐卵還債。有經濟學者就分析，中國經濟增長走下坡，好多人唔夠工作機會同人工，又問唔到銀行借錢，結果就衍生咗好多呢啲不法嘅借貸模式。

除咗佳麗貸，中國仲有好多其他另類「裸貸」、「醫美貸」借貸服務，但性質都係要女性錢債肉償。

成因

經濟學者羅家聰（末日博士）喺2020年12月接受香港蘋果日報嘅時候話，呢啲種另類借貸服務出現嘅表面原因係年青人易呃，但實際同整個經濟環境有關。佢話，呢十幾年嚟，內地經濟增長持續走下坡，就業機會少，大學生畢業後好難搵工，搵到工人工亦唔高。另外，有啲冇辦法讀落去嘅大學生想做生意，但佢哋好難問到銀行借錢，加上好多呢啲另類借貸公司嘅出現，亦令佢哋覺得借錢好正常。

財經專欄作家渾水就話，呢個現象同內地對借貸嘅監管向來較寬鬆有關，內地借貸市場好容易衍生一啲騙案，成個生態唔健康。