分羊嘅比喻

分羊嘅比喻係耶穌講嘅一個比喻，記載喺《新約聖經》《馬太福音》第25章第31-46節，係關於末日耶穌再來嘅一個比喻。

聖經譯文

「	當人子做王，天使同佢一齊來到時，佢要坐喺榮耀嘅寶座上。地上萬民都要聚集喺佢面前。佢將佢哋分為兩群，好似牧羊從山羊中將綿羊分別出嚟一樣，佢將綿羊放喺右邊，山羊放喺左邊。然後，王對喺右邊嘅話：「蒙我父賜福嘅人呀，你哋嚟，承受創世以嚟為你哋預備嘅國；因為我肚餓，你哋畀我食，我口渴，你哋畀我飲；我流落異鄉，你哋留我住喺你哋屋企；我赤身，你哋畀我着；我有病，你哋照顧我；我坐監，你哋來探望我。」義人就回答話：「主呀，我哋幾時見你肚餓，畀你食？口渴，畀你飲？幾時見你流落異鄉留你住喺我哋屋企？見你赤身畀你着？我哋幾時見你有病或坐監去探望你呢？」王要答話：「我實在話你哋知，無論乜嘢時候，你哋喺我弟兄中一個最小嘅人身上做，就係為我做。」然後，王又對喺左邊嘅話：「走開，你哋受咒詛嘅人，離開我！入去為魔鬼同佢嘅使者所預備永遠唔熄嘅火裏面！因為我肚餓，你哋冇畀我着，我口渴，你哋冇畀我飲；我流落異鄉，你哋冇留我住喺你哋屋企；我赤身，你哋冇畀我着；我有病或坐監，你哋冇照顧我。」佢哋又回答話：「主呀，我哋幾時見你肚餓、或口渴、或流落異鄉、或赤身、或有病、或坐監，冇去幫助你呢？」王答佢哋話：「我實在話你哋知，無論幾時，你哋唔肯幫助一個最小嘅人，就係唔肯幫助我。」噉樣嘅人要受永遠嘅刑罰，至於嗰啲義人，佢哋一定會得到永生。	」
——《馬太福音》25章第31-46節

解釋

綿羊通常係白色嘅，山羊通常係黑色嘅。當時嘅牧羊人通常都喺牧場門口將綿羊同山羊區分出嚟。因為日頭兩種羊都可以喺埋一齊食草，不過到咗夜晚，因為山羊比較怕凍，一定要養喺室內。綿羊就可以養喺室外，因此一定要將兩種羊區分出嚟。一般嚟講綿羊嘅經濟價值比較高，亦較山羊溫馴。綿羊同山羊可能喺外觀上好難分辨出嚟，不過本質上就唔同。噉樣亦都暗示喺末日審判之中被區隔出嚟嘅兩種下場唔同嘅族群，係有唔同嘅生命本質。

喺呢個比喻裏面，耶穌將信徒分成兩隊，一隊係能夠得救嘅綿羊，一隊係唔能夠得救嘅山羊，唔信耶穌嘅人唔包括在內。綿羊能夠得救唔係因為佢哋淨係遵守道理冇犯罪，而係佢哋能夠以主嘅愛去實行耶穌嘅新命令：彼此相愛，唔係淨係愛嗰啲愛佢嘅人，並且愛嗰啲身心窮困而饑餓、乾渴、冇衫着、冇地方住，或遇到患難、受逼迫、患病嘅人。山羊雖然遵守道理，冇違背十誡，不過佢哋可能淨係愛嗰啲愛佢嘅人，唔能夠用主嘅愛去愛嗰啲患難中窮困嘅人，因此違背咗耶穌最後賜下最重要嘅命令：彼此相愛。