古風體數字

古風體數字（英文：oldstyle figures，簡稱 OSF），又叫不齊綫數字（non-lining figures），喺印刷同平面設計，係指一種形態上類似細楷羅馬字母嘅阿剌伯數字，同齊綫數字相對；係阿剌伯數字傳入歐洲之後有嘅兩種形式之一，1800年前喺印刷業通行，之後衰落，20世紀初復興，但係只限於書籍印刷，1960年代因為照相植字嘅興起而再度衰落，近年又再度復興，但係因為長期衰落，到而今都仲有人唔明點解啲數字有時係咁嘅樣。

古風體數字嘅常見寫法，四條藍綫由下到上分別係下降筆劃綫、基綫、X 長同上升筆劃綫；4 字亦可以冇下降筆劃

一個同時用兩種數字嘅表，內文用古風體，標題用齊綫數字

設計上，古風體數字係整到同周圍嘅細楷內容喺大細同灰度上協調，通常即係好似細楷字母咁，都係主要筆劃喺基綫（baseline）同 X 長（x-height）之間，而個別數字就加上升筆劃（ascender）或者下降筆劃（descender），通常來講，係 6 同 8 有上升筆劃，3、5、7、9 有下降筆劃，4 可能有下降筆劃。

因為用佢嘅原因係等多細楷嘅版面喺視覺上有一致感，掉轉講即係話佢並唔適合用來排中文，因為中文冇大細楷，用佢反而會導致版面唔一致。

喺電腦排版，如果用嘅係 OpenType 嘅數碼字款，而個字款又有齊古風體同齊綫兩種數字字形，揀用古風體數字可以用 ｢onum｣ 參數，喺 CSS 亦可以喺 font-feature-settings 用同一個參數，而排版軟件就通常會喺用家介面有個選項畀你㨂用邊種數字。