哈利波特：死神的聖物1
《哈利波特：死神的聖物1》（Harry Potter and the Deathly Hallows – Part 1）係一部2010年嘅奇幻電影，由大衛葉斯做導演，套片係上集，改編J. K. 羅琳嘅2007年同名小說。主演有丹尼爾域卡夫、魯拔格連特、愛瑪屈臣。下集係《哈利波特：死神的聖物2》。
劇情 編輯
喺馬份莊園，石內卜向佛地魔同其他食死人彙報，鳳凰會計劃轉移哈利，因爲哈利即將成人，唔再受佢阿媽嘅保護咒語保護。佛地魔搶咗魯休斯·馬份嘅魔杖，因爲佢自己嗰支同哈利嗰支魔杖係用同一隻鳳凰嘅羽毛整出嚟，佢無法殺死哈利。鳳凰會用變身水整咗合埋七個哈利出嚟，轉移去衛斯理嘅屋企洞穴屋。期間哈利受到佛地魔嘅攻擊不過無事，但係瘋眼穆敵就死咗。
係準備比爾·衛斯理同花兒·戴樂古嘅婚禮期間，新嘅魔法部長嚟咗，向哈利、榮恩同妙麗宣讀咗鄧不利多嘅遺囑，榮恩分到熄燈器，妙麗分到一本《吟遊詩人皮陀故事集》，哈利分到佢喺第一場魁地奇比賽入面捉到嘅金探子。鄧不利多其實想畀埋葛萊分多嘅寶劍畀哈利，但係把劍唔見咗。
婚禮期間，佢哋得到消息魔法部已經淪陷，同時食死人襲擊洞穴屋（亦即係婚禮現場），哈利、榮恩、妙麗逃走，後尾嚟到古里某街12號。喺嗰到，榮恩發現R.A.B.原來就係天狼星嘅細佬獅子阿爾發·布萊克（Regulus Arcturus Black），佢喺佛地魔嗰到偷走咗史萊哲林嘅小金匣。嗰小金匣被蒙當葛·弗列契偷咗，之後畀咗桃樂絲·恩不里居。三人組用變身水潛入魔法部，喺恩不里居手上搶返嗰金匣，期間見到穆敵隻瘋眼喺恩不里居嘅辦公室到，攞咗嚟做防盜眼。佢哋事成之後用消影術逃走，但係榮恩受咗傷，三人暫時唔可以用消影術，要徒步繼續行程。
佢哋嘗試摧毀金匣但係都唔成功，之後妙麗突然諗到葛萊分多嘅寶劍可以摧毀金匣，因爲喺密室入面哈利用把劍殺死咗蛇妖，蛇妖嘅毒液可以摧毀分靈體，而把劍係可以吸收佢掂到嘅嘢嘅能力。榮恩受到分靈體嘅影響，對於做咗咁多嘢都無成果感到暴躁，又無端端呷哈利嘅醋，同哈利鬧完交之後自己走咗。
哈利同妙麗繼續旅程，當哈利用嘴脣掂個金探子嗰陣，金探子表面浮現咗一句好似謎語咁嘅說話：「I open at the close.」妙麗喺《吟遊詩人》本書入面留意到一個奇怪嘅符號，同婚禮嗰日露娜亞爸贊諾·羅古德戴嘅吊墜係一樣嘅。
哈利同妙麗去高錐客洞嘗試搵寶劍，喺墓地嗰到哈利見到佢亞爸阿媽個墓，而妙麗就搵到之前見到嗰個神祕符號。老歷史學家芭蒂達·巴沙特接近佢哋，帶咗佢哋去間屋到。哈利喺屋到見到張相，入面有個後生仔，喺哈利嘅夢入面呢個後生仔喺葛果羅威手上偷走咗支魔杖。芭蒂達現出真身——娜吉妮並攻擊哈利。妙麗成功帶哈利逃走，但係咒語反彈意外整斷咗哈利嘅魔杖。
妙麗認得張相入面嗰個係黑巫師葛林戴華德。嗰晚，一隻雌鹿護法引領哈利去一個冰湖上面，葛萊分多嘅寶劍就喺湖底。哈利潛入水想攞寶劍，但係頸上嘅金匣反抗，差啲勒死哈利。榮恩出現救返哈利同攞到寶劍，又用寶劍摧毀咗金匣。榮恩解釋係熄燈器指引佢返嚟。
三個人去拜訪贊諾·羅古德，得知個符號係代表死神聖物：接骨木魔杖、重生石、隱形斗篷，同時擁有三樣就可以成爲死亡嘅主人。贊諾嗌出佛地魔嗰名召喚食死人，因爲佢個女露娜被人捉咗嚟威脅佢。三人成功逃脫，但係被「死拿錢」（Snatcher）捉咗。哈利突然「見到」葛林戴華德同佛地魔講接骨木魔杖已經同鄧不利多一齊長眠地底。三人被死拿錢帶到馬份莊園，貝拉·雷斯壯見到死拿錢攞住葛萊分多嘅寶劍，即刻趕咗佢哋走並留低咗把劍，因爲把劍原本應該喺貝拉嘅古靈閣保險庫入面。哈利同榮恩被捉咗入地牢入面，喺入面佢哋見到露娜、奧利凡德同拉環。喺上邊，貝拉虐待妙麗，哈利用雙面鏡求助，喺鏡入面佢見到對好似鄧不利多嘅眼。多比出現救走大家，喺佢哋消影嘅時候貝拉掉咗把匕首出嚟，插死咗多比。哈利喺比爾同花兒嘅貝殼居附近埋葬咗多比。最後一幕，佛地魔喺鄧不利多嘅墓入面攞咗支接骨木魔杖出嚟。
演員 編輯
- 丹尼爾域卡夫 飾 哈利波特
- 魯拔格連特 飾 榮恩衛斯理
- 愛瑪屈臣 飾 妙麗格蘭傑
- Ralph Fiennes 飾 佛地魔
- Helena Bonham Carter 飾 貝拉·雷斯壯