基因漂變

基因漂變gei1 jan1 piu1 bin3（genetic drift）係指一個等位基因喺一個族群入面出現嘅頻率因為抽樣誤差（sampling error）而改變嘅過程：有性繁殖嘅父母基因洗牌過程係帶有些少隨機性（randomness）嘅－就算一個等位基因嘅適應性唔差過第啲等位基因，個基因都可能會喺有性繁殖嘅洗牌過程當中咁啱抽唔到佢嚟傳落去後代嗰度，搞到佢嘅出現頻率喺兩代之間有啲隨機性嘅上落。

數學性啲噉講，可以想像上圖，X 軸代表時間，而三條唔同色嘅線分別代表三個描述緊一個隨機過程（例如進化）嘅變數。隨機過程本質上就會有誤差：例如 $x_{t}=f(x_{t-1})+e$，當中 $x_{t}$ 指喺時間點 $t$ 嘅 $x$ 數值（例：喺時間點 $t$，某等位基因喺基因庫入面嘅出現頻率），$f$ 係一個特定嘅函數（反映 $x_{t}$ 點樣受到 $x_{t-1}$ 影響），而 $e$ 係帶有隨機性嘅誤差值；條線會有好多相對細幅度嘅上上落落。

基因漂變淨係會喺兩種情況之下停止：一係個等位基因完全喺個物種嘅基因庫嗰度消失（例：個族群完全冇嗮金頭髮嘅個體），一係個等位基因完全取代嗮第啲等位基因（例：個族群淨係得返金頭髮嘅個體）；如果以上兩個情況冇發生，噉一個等位基因嘅出現率喺唔同世代之間實會有些少上上落落。同時，如果有個屬同一個物種嘅族群（例如係人）因為遷徙等嘅原因而分開做兩組各自獨立發展，就算佢哋各自本來嘅基因庫同埋新環境完全一樣，兩組喺好幾代之後嘅基因庫都梗會有些少唔同。