大逃殺遊戲

大逃殺遊戲（當中大逃殺粵音為粵拼：daai6 tou4 saat3；參見英文：BR game）係電子遊戲類型，屬網上多人遊戲。大逃殺遊戲建基於最後一人嘅概念，結合生存遊戲要素，有以下嘅特徵：

• 對局有 N 位玩家參與；喺實際應用上，N 嘅數值通常有咁上下大，由 60 至 100 不等。
• 遊戲一開始嗰陣會將嗰 N 位玩家擺喺好大嘅虛擬空間（戰場）裏面。
• 戰場分安全區同非安全區，如果玩家身處喺非安全區，佢會係噉喪失生命值。
• 每隔一段時間（例如每兩分鐘），安全區都會縮細。
• 戰場上有多種物資可以畀玩家搜集，包括係武器同回復生命值嘅藥包呀噉。

大逃殺遊戲個基本格局：
(1)：遊戲地圖上面有安全區（白色圈）；
(2)：白色三角形表示玩家而家嘅位置；
(3)：紫色係風暴區－玩家入咗會喪失生命值；
(4)：綠色嗰笪而家仲係安全區，但就快變成風暴區。

於是玩家就要一路確保自己身處安全區、一路殺敵，最後生存到落嚟嗰位（或者嗰隊）玩家就算贏。包括絕地求生、要塞英雄：空降行動、Apex 英雄同埋使命召喚：戰爭地帶等嘅作品，都係跟從以上嘅格局嘅。

大逃殺遊戲喺二〇一〇年代後半成為咗風潮：絕地求生（PUBG）喺二〇一七年問世，跟住瞬速引起咗大逃殺遊戲熱潮，唔同嘅電子遊戲公司爭住開發大逃殺遊戲；打後幾年喺 Steam 等嘅平台上面，主要嗰啲大逃殺遊戲一路佔據住「最多人睇同玩嘅遊戲」嘅地位，亦引起大逃殺遊戲愛好者玩 cosplay 扮遊戲入面嘅角色或者整網絡 meme 。

概論

内文：Last man standing

睇埋：生存遊戲同動作遊戲

大逃殺遊戲建基於最後一人（簡稱 LMS ）嘅諗頭：最後一人係一種遊戲模式；想像家陣有隻玩家對局嘅射擊遊戲，玩家要互相對射嚟定輸贏；隻遊戲有最少兩種做法可以揀－

1. 死亡競賽：玩家畀人射到生命值變咗 0 就會死，死咗嘅玩家會喺 5 秒後重生，場對局會維持 10 分鐘咁耐，時間夠嗰陣殺敵次數最多嗰位玩家就贏；
2. 最後一人：玩家畀人射到生命值變咗 0 就會死，死咗嘅玩家冇得重生－死咗就出局輸咗，最後淨低生存到落嚟嗰位（或者嗰隊）玩家就算贏。

後者就係大逃殺遊戲嘅基礎。早响廿世紀，電子遊戲界經已有作品採用最後一人制，畀多位玩家對局，玩家要嘗試打低對手，畀人打低咗嘅就出局，最後「企到喺度」嗰位或者嗰隊就算贏。例如一九八〇年代同九〇年代嘅炸彈人作品就係噉。不過，二十世紀嘅遊戲因為技術限制，最後一人對局頂攏淨係可以有五至十位玩家參與。及後到咗廿一世紀初，網上遊戲相關技術日趨成熟，遊戲開發者嘅伺服器可以輕易創建巨大嘅虛擬世界，容納數以百計嘅玩家。於是就有人產生咗個諗頭：

要畀數量龐大（講緊起碼 60 至 100 位）嘅玩家玩最後一人對局。

－大逃殺遊戲就隨之而喺二〇一〇年代後半橛冒起。

機制

睇埋：射擊遊戲

大逃殺遊戲會以一局局（主要）PvP 對局嘅形式進行：對局進行嘅世界會有返咁上下大，容納到 60 至 100 位玩家；遊戲行最後一人制，輸咗嘅玩家就出局冇得再玩，最後淨低嗰位或者嗰隊就係贏家；廿一世紀初嘅大逃殺遊戲多數都同時屬射擊遊戲，要玩家用長距離武器射對手，畀人射中會喪失生命值，生命值變 0 嘅就死。而且為咗令隻遊戲更好玩，大逃殺遊戲通常仲會喺呢套基本格局上加多啲唔同嘅機制。

對局流程

睇埋：掠奪 (電子遊戲)

• 「跳降落傘」：喺多數大逃殺遊戲裏面，對局一開始嗰陣，參與嘅玩家冚唪唥都身處喺一架「飛機」入面，架飛機會喺戰場上空直線飛過，途中玩家有得揀幾時由架飛機度跳出，並且降落喺戰場上佢想去嘅地點度－如是者就形成「對局開始，玩家散佈喺戰場各處」噉嘅狀態。响典型嘅大逃殺遊戲中，揀喺邊度降落都有技巧－例如遊戲往往會設定成戰場某啲地點比較多物資執，尤其係啲外形設計到好獨特嘅地標，但呢啲地點好多時又會吸引大班玩家爭住喺嗰度降落，於是玩家就要衡量「喺嗰笪地點降落係咪著數」嘅問題。
• 遊戲物資：正路嚟講，對局開始嗰時玩家乜都冇咁滯（或者淨係得最基本嘅物資），佢哋要喺戰場上面掠奪各種物資，常見嘅物資有武器（尤其係槍械）、子彈同埋回復生命值嘅藥包呀噉；除咗喺戰場上執之外，玩家仲可以透過打低對手，搶走對手嘅物資，如是者隻遊戲就形成噉嘅形勢－隨住對局演進，玩家開始被淘汰，淨低嗰啲玩家因為由被淘汰嘅玩家身上攞物資，手上物資愈嚟愈充裕，令佢哋有局勢升溫噉嘅感覺。
• 大逃殺圓圈：指遊戲地圖上玩家可以安全企喺度嘅區域（安全區）；喺一般嘅大逃殺遊戲當中，圓圈會慢慢縮細，身處圓圈外（非安全區）嘅玩家會逐啲逐啲噉喪失生命值－圓圈呢種機制，令玩家有誘因不斷移動，想留喺圓圈入面，而隨住圓圈縮細，玩家可以活動嘅範圍就會愈嚟愈細，最後玩家實會撞到其他玩家，焗住要進入戰鬥。

生存狀態

内文：倒下狀態

睇埋：命 (電子遊戲)

• 倒下狀態：指角色正常生命值冇嗮之後會進入嘅狀態；喺典型嘅大逃殺遊戲裏面，角色會有若干生命值，冇嗮呢啲生命值嗰陣佢會倒下，倒下咗嘅角色會（例如）失去攻擊或者用道具嘅能力，而且因為只可以喺地上面爬而移動能力大減，不過佢仲未死，喺呢個時期佢嘅隊友可以幫佢復活－將佢變返做未倒下、淨低少少正常生命值嘅狀態，而如果過咗一段時間都冇隊友幫佢復活，或者倒下狀態嘅生命值因為受到敵人攻擊而冇嗮嘅話，個角色就會死亡。
• Respawn：原則上，最後一人式嘅遊戲，玩家死咗就會出局嘅，所以冇「玩家死咗幾秒後，喺戰場某地點重生」噉嘅情況；不過，有啲大逃殺遊戲可以有重生機制，只係重生受到巨大嘅限制，例如二〇一九年出嘅 Apex 英雄就係噉－三位玩家成一隊，如果有個玩家死咗，佢啲隊友可以喺限時內去佢死嘅地點度執佢嘅 banner 然後佢哋攞住 banner 去戰場上嘅特定地點就有可能俾死咗嗰位玩家重生，而如果全隊人冚唪唥死嗮，嗰隊玩家就出局。

技巧

馬拉松戰役中用嘅側擊戰術圖解；側擊係指一隊部隊移去敵人側面，爭取戰略上嘅優勢。

睇埋：軍事戰術同軍事戰術一覽

喺二〇一〇年代尾，大逃殺遊戲成為咗電競入便相當有影響力嘅一環：好似要塞英雄等嘅射擊型大逃殺遊戲涉及極高技術；玩家要有咁上下射擊技術，能夠喺高壓力環境下準確噉射對手；除此之外，大逃殺遊戲嘅玩家仲要係噉做快速嘅決策，甚至會用到現實軍事上會用到嘅戰術，包括－

• 玩家需要係噉思考周圍嘅資訊，例如周圍有幾多個敵人、每個敵人喺咩位置、每個敵人跟住可能移去乜位置等，都係極重要嘅資訊，而且未必吓吓都能夠精確噉判斷。
• 淨係揀企喺乜嘢位置，經已有一定嘅學問－例如遊戲空間入面嘅某啲位置有比較多物件可以攞嚟做掩護，所以比較安全。可以睇埋射擊遊戲上講到嘅企位概念。
• 「眼前有物資執，攞邊啲先能夠最大噉提升贏面？」
• 「啱啱去到新嘅地帶，唔知有冇敵人喺入面，好唔好入去搜集物資？如果要，由邊條路線入去好？」
• 「離遠見到有個敵人，佢似乎仲未知我存在，好唔好嘗試同佢交戰？如果要，要用咩戰術攻擊？側擊定埋伏？要喺咩時機郁手攻擊？」
• 「而家同敵人交戰緊，邊一方比較有優勢？」
• 「而家同敵人交戰緊，有冇需要推進？」
• 「啲隊友要各自噉同敵人交戰，啲隊友當中邊個比較需要支援？」
• 「頭先嗰個敵人，突然冇嗮動靜，佢係咪冇乜生命值淨，忙緊用藥包？好唔好趁機推進？」
• 「啲隊友冇乜生命值淨要用藥包。要點做，先確保到佢哋用藥包期間唔受敵人侵襲？」
• 「而家同敵人交戰緊，佢哋會唔會推進？如果佢哋會，有冇方法可以確保自己唔處於劣勢？」
• 「而家同敵人交戰緊，有冇需要進入防守狀態？」
• 「而家同敵人交戰緊，好唔好用咗把勁武器佢？」
• 「而家同敵人交戰緊，有冇需要撤退？」
• 「頭先交戰緊嗰個敵人喺度撤退，好唔好追佢？」
• 「圓圈喺度收細緊，我用邊條路線行去安全區好？」

呢啲問題涉及複雜嘅策略思考。

噉嘅思考會涉及大量運算，喺遊戲對局進行中途，玩家往往得嗰幾秒時間做決策，冇得話慢慢計嗮所有可能方案先郁。事實亦表明，專業嘅電子競技參賽者展現到喺幾秒嘅時間內做決定，同時佢哋嘅決策明顯唔係齋靠運氣－如果攞呢啲專業玩家同普通玩家對局，專業玩家會（例如）贏 95% 嘅對局。

起源

描繪《絕地求生》入面嘅角色嘅圖像

睇埋：大逃殺 (電影)同絕地求生

行最後一人制嘅電子遊戲，早喺一九九〇年代已經存在，不過大逃殺遊戲就要去到二〇一〇年代先至成形。

• 2000 年：《大逃殺》（日文片假名：バトルbatoru・ロワイアルrowaiaru）：《大逃殺》係一套出於二〇〇〇年嘅電影，套戲故仔講一場大逃殺比賽，啲參加者被迫要互相殺戮，直至淨低一個生還者為止，而且場比賽進行嘅場地一路縮細緊，生還者要喺噉嘅場地上面收集物資戰鬥－基本上就係大逃殺遊戲嘅電影版本；呢套戲跟住仲引發咗「大逃殺」風潮，吸引啲人製作故仔同《大逃殺》相似嘅電影同漫畫，據講就係大逃殺遊戲個名嘅起源。
• 2012 年：《飢餓遊戲》呢套戲出咗而且大受歡迎，個故仔同《大逃殺》類似；因為套戲受歡迎，吸引咗啲人同包括做個創世神等嘅好幾隻遊戲整 mod 加入類似《大逃殺》故仔噉嘅遊戲模式。當中著名嘅 PlayerUnknown－真名布蘭登·格連－都有份喺呢個時期整啲噉嘅 mod 。
• 2017 年：建基於 PlayerUnknown 整嘅 mod 嘅《絕地求生》（PUBG；粵港地區俗稱食雞）問世，大受歡迎，喺跟住嗰幾年一路都係 Steam 等平台上最多人玩嘅遊戲之一，被指係大逃殺遊戲熱潮嘅創始作。
• 2018 年：《要塞英雄：空降行動》問世，都係大受歡迎，出名在喺大逃殺遊戲入面加入「建築」嘅機制，畀玩家喺戰場上搜集木材、石頭同金屬等嘅材料，用啲材料起建築物，為遊戲增添咗豐富嘅策略。
• 2019 - 2020 年：多隻模仿《絕地求生》同《要塞英雄：空降行動》嘅作品問世，當中有啲甚至畀人話係抄襲，呢啲作品多數失敗收場。喺呢個時期出名嘅作品有藝電公司出嘅《Apex 英雄》－呢件作品被指成功結合大逃殺遊戲同英雄射擊遊戲，亦都創始大逃殺遊戲入便有得重生，Apex 英雄一兩年後將會加入絕地求生同要塞英雄嘅行列，同前者喺 Steam 玩家人數上睇齊。
  • 順帶一提，呢個時期亦都開始出現非射擊型嘅大逃殺遊戲，例子可以睇吓二〇一九年二月問世嘅《俄羅斯方塊 99》，隻遊戲每場對局有 99 位玩家，大家同時玩俄羅斯方塊，清到方塊嘅人可以攻擊對手，喺對手嘅區域落方塊，玩家一旦自己區域嘅方塊出現點畀方塊塞住，就會被淘汰，最後淨低嗰個玩家就算贏。
• 2020 年三月：《使命召喚：戰爭地帶》問世，評語唔算好正面。喺跟住落嚟嗰兩年，大逃殺遊戲界仲係處於絕地求生、要塞英雄同埋 Apex 英雄三家並立嘅局面。
• 2022 年十一月：《使命召喚：戰爭地帶 2.0》問世，用咗進階嘅 AI 技術，對局入面有由電腦控制嘅玩家，評語相當正面。

睇埋

• 射擊遊戲：多數大逃殺遊戲都同時屬於射擊遊戲，尤其係 FPS 同 TPS。
• 季票同戰鬥通行證：都係大逃殺遊戲成日用嘅搵錢方法。
• 開放世界
• 遊戲模組
• 服務型遊戲

文獻

• Choi, G., & Kim, M. (2018). Battle Royale game: In search of a new game genre (PDF). International Journal of Culture Technology (IJCT), 2(2), 5.
• Zhou, N., Doerner, M., Ryan, L., & Pierse, C. (2021, October). AI Coach for Battle Royale Games. In Extended Abstracts of the 2021 Annual Symposium on Computer-Human Interaction in Play (pp. 280-286).

拎

• （英文） 最佳嘅大逃殺遊戲：2022 年度最頂級嘅 BR 遊戲係邊啲？，PCGames