孫臏
孫臏，原名孫伯靈，係戰國時代中期嘅軍事家，佢天祖父係「兵聖」孫武（即係話孫臏係佢嘅五世孫）。依家有人懷疑《孫子兵法》係佢作嘅。佢亦係《孫臏兵法》嘅作者。
生平 編輯
孫臏細個同龐涓拜鬼谷子做老師，學兵法。後嚟龐涓去咗魏國，做魏惠王嘅將軍，由於佢覺得自己嘅才能唔及孫臏，所以叫佢嚟效力魏國。後來龐涓因為妒忌佢所以捏造罪名將孫臏處以臏刑同黥刑，斬咗佢對腳。由於佢喺嗰時跛咗，所以人人都叫佢做孫臏。
後嚟齊國派使者嚟魏國首都大梁。孫臏趁機會以言辭打動齊國使者，最終成功去到齊國成為田忌嘅手下。並喺賽馬比賽當中幫田忌贏齊威王，從此成為朋友。
前354年，魏國打趙國，最後孫臏以「圍魏救趙」幫趙國脫險。
前342年齊威王派田忌、田朌做主將，田嬰做副將，孫臏做軍師，出兵幫韓國。孫臏再次用「圍魏救趙」嘅方法，出兵打魏國首都大梁。龐涓知道後立即率兵返魏國，齊軍就向西進軍。孫臏諗魏軍一向自恃其勇，一定會輕敵，再加上齊軍一向都有無膽鬼嘅名聲，所以打算用誘敵深入嘅戰術，引誘魏軍踩入陷阱再消滅佢。孫臏命令進入魏國境裡面嘅齊軍第一日設十萬個煮飯嘅灶，第二日減做五萬個，第三日減做三萬個。不出佢所料，龐涓行咗三日軍去查齊軍留底嘅灶之後好興奮就講：「我本身都知齊軍出名無膽，入嚟魏國三日咋，齊國士兵就已經着草咗一大半。」之後佢撤走步兵，淨係帶精銳騎兵日夜追殺齊軍。孫臏預算龐涓天黑一定會行到去馬陵，馬陵道路窄，兩邊都峻隘險阻，孫臏於是叫士兵斬走傍邊大樹嘅樹皮，令佢露出白木，並喺樹上面寫「龐涓死於此樹之下」，之後叫一萬名弓手埋伏喺馬陵道兩邊，約定「天黑嗰時係呢度見到有火光就對準龐涓嚟個萬箭齊發」。龐涓嗰晚果然嚟到冇咗樹皮嘅大樹下底，見到白木上面有字，就點火查看。字都未讀完，齊軍嘅伏兵萬箭齊發，魏軍即刻亂起嚟。龐涓知道敗局已定，於是拔劍自殺，臨死前講：「依家就俾孫臏呢個小子成咗名！」齊軍乘勝追擊，殺咗10萬魏軍，俘虜兼斬死魏國主將太子申。從此魏國元氣大傷，齊國就成為東方大國。