對六四屠殺嘅否認同讚賞

喺1989年6月4號，中國共產黨派中國人民解放軍武力鎮壓北京天安門學生運動，造成無數傷亡同埋好多國家嘅譴責。不過由事件發生到而家，有唔少親中共人士都曾經發表對六四屠殺否認嘅言論，支持中共當時屠殺嘅決定，甚至騷擾和平悼念嘅人士。

否認論起源

首先提出六四無死人嘅，係當時嘅中國國務院發言人袁木，佢喺鎮壓後嘅記者會上宣布，事件造成約300人死亡，但之後接受美國全國廣播公司（NBC）記者布羅考（Tom Brokaw）訪問嘅時候就話天安門廣場上無發生任何嘅傷亡，引嚟外界非議。

贊許六四屠殺嘅觀點

英國諾定咸大學中國政策研究中心成員張煒曾經喺2013年6月撰寫文章，話贊許六四屠殺，其中一個流傳最廣，似乎最理直氣壯嘅辯解就係：假如中國政府當初喺六四問題上無斷然採取行動，就會失去之後廿幾年經濟快速增長嘅機遇。中國國防部長魏鳳和喺2019年6月2號亦高調捍衛中共當年嘅屠殺決定，話咁做係為咗保持中國穩定。

對呢啲觀點嘅反駁

但張煒指，以經濟同國家穩定做理由呢種論調缺乏事實同邏輯基礎，中國嘅經濟增長，喺1979年就已經開始。此外，亦無人證明到無六四嘅鎮壓，中國經濟就一定會停滯發展。另外，好多其他發展中國家（印度同其他金磚國家），喺呢段時間都有好快速嘅經濟增長，但佢哋都無依靠坦克同機關槍。台灣時事評論員邵立中亦反駁，話呢啲喺國際場合大聲將屠殺人民行為合理化嘅言論，凸顯習近平政權恃住國力強大而毫不掩飾嘅囂張行徑。

否認或淡化解放軍進行六四屠殺嘅例子

台灣

旺旺中時集團董事長蔡衍明喺2012年初接受《華盛頓郵報》採訪嘅時候表示，六四事件入面有人隻身阻擋坦克嘅畫面入面，嗰個人仍然生存，說明「大屠殺」嘅講法唔啱。蔡衍明嘅言論，當時就被兩名民運人士，包括張健同王丹駁斥同譴責。

加拿大

曾經係中共外交部國際司幹部，之後做咗渥太華卡爾頓大學孔子學院院長嘅李征，喺2021年5月喺國會接受加拿大保守黨議員吉尼斯提問嘅時候，表明唔承認中共當時殺害和平抗議者。

香港

• 2007年5月，民建聯主席馬力公開話如果六四係屠城，四千名學生全部都死晒，又揶揄話搵隻豬用坦克車輾過，睇下會唔會變成肉餅。言論當時引起香港學界嘅反對，包括後來成為民主黨主席嘅羅健熙在內，一班大學生就發起聯署，譴責馬力顛倒顛倒是非、不分黑白。羅健熙又反駁，話屠殺唔係關殺咗幾多人事，而屠殺嘅定義係喺冇需要嘅情況下濫殺無辜。
• 2014年六四事件二十五週年前夕，激進親中派李偲嫣公開表示，話當年解放軍根本無亂槍掃射，批評媒體只係報學生傷亡，要尊重軍人都有父母，又批評支聯會將側埋一邊嘅事實攞出嚟講。佢嘅言論畀資深傳媒人楊健興反駁，楊澄清當日解放軍有亂開槍，北京飯店佈滿子彈痕迹。藝人黃秋生亦揶揄佢，話「李偲嫣，日軍侵華，日軍都有死啦，二戰德軍都有死啦」。
• 2014年5月，親中派高達斌亦公開話，當日北京政府只係清場，天安門廣場內冇死人，更指要有幾千或幾萬人死亡先算係「屠殺」，又喺維園同每年舉行六四燭光集會嘅支聯會打對台。佢嘅言論亦畀民運領袖王丹駁斥，話生命寶貴，死一個都唔應該，形容高達斌係港人之恥。
• 2018年6月，親中派珍惜群組喺支聯會維園六四晚會期間，係附近擺檔話當年冇屠城。
• 2019年6月，親中派屈穎妍公開發表文章，對於中共有冇屠殺避而不談，但就話六四唔係當年嗰陣睇得咁簡單，有軍人被燒死。於是，時事評論員馮睎乾引用咗加拿大記者Arthur Kent發佈嘅「六月黑夜」短片同其他資料去反駁，批評佢嘗試塑造中共係被反對派抹黑嘅弱勢社群，悲劇嘅幕後黑手係民運領袖同埋暴徒。
• 2021年6月2號，身兼港區人大代表嘅親中派立法會議員馬逢國公開表示愈來愈接受六四無死人，又話自己係睇到好多外國報道得出嘅真相，當年有好多假消息、假新聞。當年喺北京見證事件嘅前學聯代表陳清華就形容同樣曾經係學聯成員嘅馬逢國背棄理想，又話佢嘅言論好「技術性」，只係話天安門廣場無死人，但自己當時就喺天安門廣場睇見有一名工人被解放軍一槍打死。
• 2021年12月，香港多間大專院校未經諮詢或學生同意，強行移除校內紀念六四屠殺標誌，做法引起爭議，但就得到一啲親中派嘅認同。另外，《立場新聞》就事件採訪咗一啲中國來港學生，佢哋有部份人支持校方做法，比喻六四屠殺係父母同仔女之間嘅一啲打罵。

對於否認或贊同六四屠殺說法嘅批評

香港民主派人士一般都會對呢啲說法有所批評。例如，時事評論員黃世澤喺2019年6月就批評黃均瑜同張家敏喺香港電台節目《城市論壇》否認屠殺嘅說法，話佢哋應該被視為犯罪組織同路人，要用紐倫堡原則對付。另外，喺香港紀念六四標誌被強行移除事件入面，佢亦用「學賊」、「學棍」嚟形容當時中大校長段崇智。

時事評論員馮睎乾就話，就算天安門廣場上無大規模嘅屠殺，但六四當日的確係有屠殺，只係喺廣場之外附近，北京城內，例如長安街嘅範圍。就算話天安門有大屠殺嘅說法唔精準，但亦不過係攞一個象徵意義。

否認六四屠殺言論引申嘅影響

由於好多人都唔接受中共否認六四屠殺嘅言論，所以喺處理中共公佈官方消息嘅時候，有啲人都會攞中共否認六四屠殺嘅言論嚟揶揄。例如，周星馳喺1991年電影《整蠱專家》入面就有一段劇情講周星馳食咗「謊言豆沙包」之後，講咗一句「葉子楣（當時以性感形象走紅嘅香港女藝人）亦都好賢良淑德，陳百祥係世界上最叻嘅人，袁木好誠實，李鵬係我哋最偉大嘅領袖」，被視為諷刺中共政權喺呢件事上面嘅謊言。另外，喺武漢肺炎疫情期間，中國有時會公佈自己疫情受控嘅消息，就會換嚟揶揄，話中共亦話過六四無死人，暗指唔相信中共嘅說法。