情境強度

情境強度（英文：situational strength）係性格心理學上嘅一個概念，指一個情境有幾「迫使一個人（或者第啲動物）做出特定嘅行為」。舉兩個例說明：

• 想像家陣紅燈而且馬路上有好多部車喺度快速噉駛過－如果一個人衝出馬路，會好大機會會受重傷，情境強；絕大多數嘅人（無論性格係點）都會企喺度唔郁。
• 想像家陣黃燈而且馬路度冇乜車－就算一個人衝出馬路，都冇乜機會會受重傷，情境弱；噉啲人喺行為上會比較多樣化－有啲人（可能大膽啲）揀照過馬路，又有啲人企喺度唔郁。

一條斑馬線；啲行人喺「過唔過馬路」呢樣行為上會唔會有多樣性呢？

如果話一個情境強，意思即係話個情境會強力噉獎勵啲「啱」嘅行為或者會強力噉懲罰啲「唔啱」嘅行為。而喺呢種情況下，人嘅性格會冇咁能夠影響佢哋行為－如果一個情境弱，一個人大可以按喜好行事，而如果一個情境強，「按喜好行事」好多時會造成巨大嘅損失，於是性格對行為嘅影響力就會下降。

用統計學上嘅行話嚟講，即係話情境強度係一個調節變數，會減弱性格同行為之間嘅關係。

睇埋

• 性格心理學
• 動物行為學
• 調節變數
• 進化穩定策略