拉撒路復活

拉撒路復活係《聖經》記載耶穌嘅神蹟之一，記載喺《約翰福音》11章1-44節。

聖經譯文

「	有一個患病嘅人名叫拉撒路，住喺伯大尼，就係馬利亞同佢家姐馬大嘅村莊。呢個馬利亞就係嗰個用香膏抹主，又用頭髮擦佢腳嘅；患病嘅拉撒路係佢嘅細佬。兩個姊妹就打發人去見耶穌，話：「主啊，你所愛嘅人病咗。」耶穌聽見就話：「呢個病未至於死，而係為咗榮耀上帝，為要令到上帝嘅仔藉此得榮耀。」耶穌一向愛馬大同佢妹妹，同埋拉撒路。佢聽見拉撒路病咗，仍然喺原地住咗兩日，然後對門徒話：「我哋要再去猶太。」門徒對佢話：「拉比，近嚟猶太人要拎石頭掟你，你重想去嗰度呢？」耶穌話：「日頭唔係有十二個鐘咩？人若喺日間行路，就唔會跌倒，因為佢睇見世上嘅光。人若喺黑夜行走，就會跌倒，因為嗰度冇光。」耶穌講完，就話：「我哋嘅朋友拉撒路瞓咗，我去叫醒佢。」門徒就話：「主啊，若果佢喺瞓咗，就會好返。」耶穌意思就係話拉撒路已經死咗，但係佢哋以為佢係指平常嘅瞓覺。於是耶穌就坦白噉告訴佢哋：「拉撒路死咗。為咗你哋嘅緣故，我唔喺嗰度反而重好，為要令到你哋信。而家我哋去睇佢。」於是嗰個稱為低土馬嘅多馬對其他門徒話：「我哋都去同佢一齊死啦！」 耶穌到咗伯大尼，知道拉撒路已經喺四日前埋葬。伯大尼離耶路撒冷唔夠三公里。有好多猶太人嚟探馬大同馬利亞，要為佢哋細佬嘅緣故安慰佢哋。馬大聽見耶穌嚟咗，就出去迎接佢；馬利亞仍然坐喺屋度。馬大對耶穌話：「主啊，你若果早啲喺呢度，我細佬就唔會死。我都知道，就算而家，你無論向上帝求啲乜，上帝都會賜畀你。」耶穌對佢話：「你細佬會復活嘅。」馬大對佢話：「我知道喺末日復活嘅時候，佢會復活。」耶穌對佢話：「復活在我，生命亦在我。信我嘅人雖然死咗，亦必復活。凡活著信我嘅人必定永遠唔死。你信唔信呢啲呢？」馬大對佢話：「主啊，我信。我信你係基督，係上帝嘅仔，就係要臨到世界嘅。」 馬大講完呢啲嘢就返去，叫佢妹妹馬利亞，私底下講：「老師嚟咗，佢叫你。」馬利亞一聽見，就即刻起身，去見耶穌。那時，嗰陣耶穌重未入到村，重喺馬大迎接佢嘅地方。嗰啲喺屋裏面安慰馬利亞嘅猶太人，見佢急忙起身出去，就跟住佢，以為佢要去墳墓嗰度喊。馬利亞到咗耶穌嗰度，一見佢，就趴喺佢腳前，對佢話：「主呀，你若果早啲喺度，我細佬就唔會死喇。」耶穌睇見佢喊，又睇見同佢一齊嚟嘅猶太人都喊，心裏都悲傷，又好難過，就話：「你哋將佢安放喺邊度？」佢哋對佢話：「主啊，請你嚟睇。」耶穌就流眼淚。猶太人就話：「你睇，佢幾咁愛佢！」其中有人話：「佢既然開咗盲人嘅眼，唔通佢唔能夠叫拉撒路復活咩？」 耶穌心裏非常悲傷，嚟到墳墓前。墳墓係一個竉，有一塊大石擋住。耶穌話：「將大石搬開！」死者嘅家姐馬大對佢話：「主啊，佢而家應該已經發臭喇，因為佢已經死咗四日。」耶穌對佢話：「我唔係對你講過，你若信就必定睇見上帝嘅榮耀咩？」於是佢哋將大石搬開。耶穌舉目望天，話：「父啊，我感謝你，因為你已經聽我。我知道你時常聽我，但係我講呢啲嘢係為咗周圍企喺度嘅人，要令到佢哋相信係你差派我嚟嘅。」講完，就大聲叫：「拉撒路，出嚟！」嗰個死人就出嚟，手腳都包住布，面上亦包住頭巾。耶穌對佢哋話：「解開佢，俾佢行！」	」
——《約翰福音》11章1-44節

概覽

耶穌同拉撒路一家有密切關係：拉撒路家姐馬利亞曾經用香膏抹耶穌，用頭髮擦耶穌嘅腳而得耶穌嘅稱讚；馬大亦經常款待耶穌。拉撒路病咗，佢哋打發人去通知耶穌，但係耶穌嘅反應卻係出人意料之外，佢冇立即趕去，反而話佢嘅病乃係為咗上帝嘅榮耀同叫上帝嘅仔因此得榮耀。耶穌仍然喺嗰度住咗兩日，然後同門徒起程再去猶太。又話日頭有十二個鐘，人應該喺日間行路，雖然明知猶太地有人要用石頭掟佢，佢都照去，去將瞓咗嘅拉撒路叫醒，門徒唔明白，其中多馬就話要同耶穌同去同佢（已死嘅拉撒路）同死。

耶穌重未進入伯大尼條村，馬大出嚟迎接佢，嗰陣時拉撒路喺墳墓裏面已經四日，佢哋嘅朋友嚟探望同安慰佢哋，馬利亞就喺屋企裏面接受安慰。馬大對耶穌有信心，係佢相信末日復活嘅時候，拉撒路亦必定會復活。

馬大同耶穌交談之後趕住返屋企話畀馬利亞知，馬利亞同安慰佢嘅人去到耶穌嗰度，馬利亞亦好似馬大噉埋怨耶穌唔早啲嚟，唔係嘅話拉撒路就唔會死。耶穌嘅情緒表露咗，佢曾經對報信嘅人話拉撒路未至於死，佢哋冇領會到耶穌對佢話：「你兄弟必然復活」係指死咗嘅拉撒路立即復活。耶穌對馬大話：「復活在我，生命亦在我。」馬大嘅信心固然唔夠，而喜愛聆聽同默想耶穌話語嘅馬利亞亦抱怨耶穌唔早啲嚟醫治拉撒路。其他猶太人亦喺度咸，表明佢哋唔相信耶穌能夠立即叫死人復活。耶穌憂愁眾人信心嘅軟弱，所以藉住叫死人復活嚟堅強眾人嘅信心。耶穌流眼淚，唔係因為拉撒路已經死咗（因為耶穌知道死亡唔能夠拘禁佢），佢喊係因為人嘅信心唔夠。

耶穌嚟到墳墓前，叫人將大石搬開，但係馬大仍然話拉撒路已經死咗四日，屍體開始發臭。耶穌喺行神蹟前再次用話語激勵佢話：「你（馬大）若信，就必睇見上帝嘅榮耀。」耶穌先作一個感恩禱告，係為咗幫助周圍嘅人明白佢係上帝所差嚟嘅嗰一位彌賽亞，並將榮耀歸畀上帝，然後大聲呼叫拉撒路出嚟。石頭好大，要幾個人先至搬得開。拉撒路果然復活咗；解裹屍布嘅人一邊解一邊心裏面可能好驚，呢個死咗四日嘅人會腐爛到點嘅樣！但係當佢哋睇清楚耶穌所做嘅事，就只有信佢係上帝所差嚟嘅。耶穌行呢個神蹟，唔單止令到拉撒路一家人喺喜樂中團聚，更係要佢哋學習睇見上帝嘅榮耀。