拗音

拗音（日文：拗音ようおん^(yō’on)）係日本話音節嘅一種分類，指主輔音同元音中間插入一個半元音，而個半元音可以係 /j/ 或者 /w/，如係 /j/，半元音後面嘅元音可以係 /a/（ゃ）、/u/（ゅ）或者 /ɔ/（ょ），但係如果係 /w/，半元音後面嘅元音只可以係 /a/（ゎ)^[1]，不過加 /w/ 嘅拗音喺現代日文已經消失。表達拗音嘅假名喺現代嘅正字法會寫細，除非係寫喺字上面嘅注音。

舉個例，尖叫嘅擬聲詞｢ぎゃ｣（gya）就係一個拗音。

日文音節除咗拗音之外仲有三類，分別係促音、撥音同直音。促音一般情況下其實係雙子音，撥音係指｢ん｣（鼻音），而直音就係指唔係拗音，又唔係促音，又唔係撥音嘅普通音節。