指事

指事係六書其中一種構成漢字嘅方法，一望埋去大致認到，細心睇就知道佢意思。東漢學者許慎喺《說文解字》嘅序嗰度噉樣描述指事概念：「指事者，視而可識，察而見意，上、下是也。」

爭論

到咗清朝，段玉裁喺《說文解字注》度話：

指事之別象形者，形謂一物，事䀭眾物，專博斯分。

句嘢係講緊指事同象形有咩分別。段玉裁認為，兩者分別在於象形「專門指某一樣嘢」，而指事就可以包含好多種事物。

事實上有學者話指事字同象形字好難分得清。有人就噉講：「象形同指事之間邊度劃界，係學習六書嘅難處。遇夫先生話：講到指事呢樣嘢，以前嘅學者有好多誤解，而近代嘅王筠仲錯得更加厲害。點解王筠會錯？因為佢將指事嘅『事』當做係講字義，唔知其實應該係講字形。好似齊字用禾嘅齊整嚟表示齊，飛字用鳥嘅舉起嚟表示飛，呢啲都係象形字。但係王筠就話齊、飛都係全體指事。因為齊、飛呢兩個字都係表示動作，喺文法上面係動詞所以佢當係指事。呢個係用本字嘅字義嚟判斷指事，唔係用字形嚟判斷...... 總之，指事係講字形，唔係講字義。講到根本，指事嘅『事』就係符號。符號同圖畫唔同，所以指事同象形有分別。符號同意思訓練冇關係，所以指事同文法唔可以相合。」

因為指事字同象形字之間嘅界線咁模糊，有學者乾脆放棄指事呢個概念，認為根本冇所謂嘅指事字。例如《古文字學導論》一書就提出一個講法，話指事呢個分類，只不過係前人因為解釋唔到某啲漢字而諗出嚟，本書嘅作者仲認為啲畀人歸類做指事嘅字，全部都可以歸入象形或者象意度。

字例

以下係一啲經常分類做指事字嘅漢字：

漢字	一	二	三	上	下	本	末	凶	引
讀音	jat1	ji6	saam1	soeng5/ soeng6	haa2/ haa6	bun2	mut6	hung1	jan5

睇睇

• 象形