明星學生妹
《明星學生妹》（Love Live!）係由日本動畫公司日昇動畫（SUNRISE）、唱片公司Lantis同埋ACG月刊雜誌《電擊G's magazine》共同合作推出嘅多媒體企劃項目，有相關嘅漫畫、動畫同遊戲作品。故仔係講班女主角為咗救返自己學校而合組叫μ's嘅學園偶像團體。
動畫 編輯
電視動畫第1期喺2013年1月至3月響日本首播，共13集。第2期喺2014年4月至6月響日本首播，共13集。香港TVB播嗰陣叫《明星學生妹》。
故事簡介 編輯
東京都嘅國立音乃木坂學院係一間女子高中，因為收生不足，面臨殺校危機。二年級生高坂穗乃果唔想學校被殺，諗到用校園偶像去提升學校嘅受歡迎程度，吸引多啲人入嚟讀，咁就可以唔使殺校。穗乃果同另外8位同學一齊組成一個叫「μ's」嘅校園偶像團體。佢哋喺第一屆Love Live!大賽因為穗乃果病咗而中途退出，喺第二屆終於攞到冠軍。而學校就因為佢哋嘅努力而多咗人入讀，於是唔使殺校。
劇場版 編輯
《Love Live! The School Idol Movie》喺2015年6月響日本上畫，單計日本票房有成28.6億日圓[1]。
故事係接住電視動畫第2期最後一集，講「μ's」以第2屆Love Live!冠軍身份受邀到美國演出，之後返番日本，因為喺美國嘅演出受到好評，搞到佢哋更加出名，但係佢哋都係決定維持番先前講好嘅停止活動決定，之後佢哋就宣佈停止活動嘅消息，而μ's就喺跟住一屆嘅Love Live!大賽度進行佢哋最後一次演出。
同系作品 編輯
Love Live! Sunshine!! 編輯
《Love Live! Sunshine!!》（日語：ラブライブ！サンシャイン!!）係Love Live!系列動畫化「第二作」，啲主角就換咗係另一間學校嘅人。電視動畫第1期喺2016年7月至9月響日本首播，共13集。第2期喺2017年10月至12月響日本首播，共13集。劇場版《Love Live! Sunshine!! 學園偶像電影～彩虹彼端～》喺2019年1月響日本上畫。
衍生作品《幻日夜羽 -鏡中暉光-》嘅電視動畫喺2023年6月響日本首播。
Love Live! 虹咲學園學園偶像同好會 編輯
Love Live!動畫系列「第三作」，第1期喺2020年10月至12月響日本首播，共13集。第2期喺2022年4月至6月響日本首播，共13集。
Love Live! Superstar!! 編輯
Love Live!動畫系列第四作，第1期喺2021年7月至10月響日本首播，共12集。第2期喺2022年7月至10月響日本首播，共12集。
參考 編輯
- ↑ 〈「劇場版ラブライブ!」最終興収28.6億円で確定〉. ORICON STYLE. ORICON. 2016-03-14. 喺2016-03-14搵到.