普卡
普卡（粵拼：pou2 kaa1；英文：Polka；愛爾蘭蓋爾文：Polca；要啲音準確噉反映來源詞，可以變讀做普
.jpg)
普卡樂曲有好多易認嘅特徵：喺音樂特性上，普卡樂曲正路會跟 2/4 拍，興用 oom-pah 嘅伴奏，跟 1 2、1 2、1 2... 噉嘅規律打拍子；除此之外，普卡舞曲仲出嗮名氣氛活潑詼諧，啲人跟普卡跳舞嗰時，通常會係若干對男女，成雙成對噉嚟跳，會跟住音樂做出一吓吓嘅彈跳動作[4][5]。
到咗廿一世紀初，普卡唔淨只係一種樂曲同舞蹈，仲係一種傳統文化：歐美人表演普卡嗰陣，通常會有套特定嘅樂器嚟演奏，當中以手風琴最具代表性，而啲舞蹈員仲好興特登著住民俗服裝嚟跳[4]；而且普卡因為俾人覺得氣氛歡樂，所以好多歐美人都鍾意喺婚禮或者嘉年華呢啲喜慶場合播普卡[6]。
音樂特性 編輯
- 拍號：普卡定義上實係雙拍子嘅[7]，多數都係用 2/4 拍號，每段節拍兩吓拍子，第一吓拍子強，每吓拍子相當於一個四分音符，會跟 1 2、1 2、1 2... 噉嘅規律打拍子。下圖係普卡嘅典型節奏[5]：
- Oom pah：oom pah 係普卡嘅常用伴奏，指段伴奏交替噉出以下噉嘅規律[8]
- 速度：普卡樂曲嘅速度通常都比較快，好多時都接近或者超過 130 bpm。
- 二段體：愛爾蘭嘅普卡會有 32 橛小節，呢啲小節會細分做 4 部份，每部份 8 小節，跟 A-A-B-B 噉嘅形式。
- 手風琴：普卡可以用包括大號、鋼琴、結他、大提琴在內嘅好多種樂器嚟演奏，不過以手風琴算係最出名同有代表性，啲人通常一講起普卡音樂嘅樂器第一時間就係會諗起手風琴。
- 歡樂氣氛：普卡樂曲普遍俾人覺得係活潑、詼諧又歡樂[9]；因為噉，喺廿一世紀初嘅歐洲（尤其係中歐）同英文圈，普卡樂曲常見於婚禮或者嘉年華呢啲喜慶場合，當中慕尼黑啤酒節（德文：Oktoberfest）就好出名－慕尼黑啤酒節係德國慕尼黑一年一度嘅盛事，每年都會响九月中至尾嗰陣搞，維持兩個禮拜左右，俾出席嘅人盡情噉一路飲啤酒一路玩，而普卡音樂演奏就係慕尼黑啤酒節最常見嘅音樂表演之一[10]。
名曲 編輯
- 《爆作普卡》（德文：Explosions-Polka），由約翰施特勞斯二世喺 1847 年作。
- 《噢，蘇珊娜》（Oh! Susanna），著名美國作曲家史蒂芬·福斯特作，1848 年公開，用咗普卡式拍子。
- 《傾閒偈普卡》（德文：Tritsch-Tratsch-Polka），由約翰施特勞斯二世喺 1858 年作。
- 《香檳普卡》（德文：Champagner-Polka），由約翰施特勞斯二世喺 1858 年作。
- 《飛快子彈曲》（德文：Freikugeln），由約翰施特勞斯二世作，1868 年首次公演。
- 《撥奏普卡》（Pizzicato Polka），由約翰施特勞斯二世喺 1870 年作。
- 《薩基雅爾維嘅普卡》（芬蘭文：Säkkijärven polkka），1907 年經已存在喺芬蘭嘅一首民間普卡歌。
- 《啤酒桶普卡》（Beer Barrel Polka），1927 年作，二戰期間曾經响歐美極紅嘅一首普卡歌。
- 《伊娃嘅普卡》（芬蘭文：Ievan polkka），1928 年經已存在喺芬蘭嘅一首民間普卡歌。
起源 編輯
普卡源自 19 世紀上半橛嘅波希米亞。據講喺 1830 年代上半橛嘅波希米亞[註 1]，有個叫約瑟夫·累烏達（Josef Neruda）嘅音樂老師喺度觀察一個叫安娜·詩力莎高娃（Anna Slezáková）嘅後生女仔跳舞；累烏達留意到詩力莎高娃跳嘅舞有啲唔尋常，一問之下得知詩力莎高娃原來係喺度跟住一首叫《Strýček Nimra koupil šimla》（粵譯：Nimra 大叔買咗隻白馬）嘅民歌跳舞，累烏達跟手嗱嗱臨將詩力莎高娃跳舞嗰陣嘅節奏搵紙筆記低，然後仲攞咗去教埋班後生男人跟住一齊跳；打後喺 1835 年，呢種舞傳到去布拉格（今日嘅捷克首都）嘅舞會嗰度，大受歡迎，然後就廣傳－呢種舞喺 1839 年傳到去維也納，及後喺 1840 年傳到去巴黎[1]。而且喺歷史文獻入面啲人仲有提到普卡狂熱（Polkamania）一詞－顯示當時嘅歐洲樂壇舞壇掀起咗一陣普卡熱潮[11]。喺 1844 年，普卡據講經已到咗美國[12]。
順帶一提，有歷史證據指出，普卡似乎喺詩力莎高娃跳之前就經已存在：响 1840 年代（普卡狂熱如火如荼嘅時期）嗰時有文獻紀錄話，有啲歐洲音樂人同當時嘅捷克平民傾過有關普卡嘅嘢；根據啲平民所講，喺貴族同知識份子圈興普卡之前，當地嘅平民之間就一路有喺度跳普卡舞同唱普卡歌。因為噉，有現代學者就話普卡係「一種真正嘅捷克民俗舞曲」－由平民之間自然噉演變出嚟，冇單一作者，因為多人鍾意而廣傳[12]。
註釋 編輯
- ↑ 啲人對於件事嘅確切日期有爭詏。
睇埋 編輯
引述 編輯
- ↑ 1.0 1.1 "History of polka". www.com.
- ↑ Vallely, F. (1999). The Companion to Traditional Irish Music. New York University Press: New York, p. 301.
- ↑ Peter Kemp (2001). "Strauss family". Grove Music Online.
- ↑ 4.0 4.1 4.2 Cranitch, M. (1988). The Irish Fiddle Book. Music Sales Corporation: New York, p. 66.
- ↑ 5.0 5.1 5.2 Blatter, A. (2007). Revisiting music theory: a guide to the practice. Taylor & Francis. p.28.
- ↑ 43 Best Polka Songs. My Wedding Songs.
- ↑ Polka. Merriam-Webster.
- ↑ Introduction to simple music harmony.
- ↑ Polka: So Cheerful, So Competitive. New York Times.
- ↑ Jackson, D. J., & Liggett, L. (2020). Ethnic Music and Identity: Surveying Polka DJs and IJs. Polish American Studies, 77(2), 9-29.
- ↑ "Polkamania ... has raged very fiercely amongst us, indeed all over London this year." Letter by E. J. Knox,14 August 1844: quoted in A. E. Blake, Memoirs of a Vanished Generation ..., London (1909) viii, 217.
- ↑ 12.0 12.1 Čeněk Zíbrt, "Jak se kdy v Čechách tancovalo: dějiny tance v Čechách, na Moravě, ve Slezsku a na Slovensku z věků nejstarších až do nové doby se zvláštním zřetelem k dějinám tance vůbec", Prague, 1895
拎 編輯
- （英文） Polka，不列顛百科全書。
- （英文） Polka. Polish Music Center.
- （英文） "Beer Barrel Polka" (Roll Out the Barrel) by West Coast Prost!，YouTube