李毅

李毅（1961年11月8號—），中國大陸學者，因為喺台灣問題上主張武統同虛報學歷而聞名。2019年4月佢去台灣旅遊嗰陣，依總統蔡英文同埋行政院院長蘇貞昌嘅指示，被內政部移民署驅逐出境，蘇貞昌認為佢更勝於「恐怖分子」。

爭議

圍繞李毅嘅爭議，主要係同佢政治立場同虛報學歷有關，另外喺武漢肺炎期間佢亦曾經發表反人類言論，引起嘩然。

虛報學歷銜頭

李毅平時會掛住唔少名號，包括「著名旅美學者、中國人民大學重陽金融研究院原研究員及教授、福州大學台灣研究所（民建經濟研究院）原所長」等等，參加唔同嘅論壇。佢亦報稱有唔同嘅學歷，包括「北京大學社會學研究生、美國蘇里大學社會學碩士、伊利諾大學社會學博士」等等，但有啲俾佢提及嘅單位已公開否認，有啲學術單位就無理會。例如，中國人民大學重陽金融研究院，就喺佢發表關於武漢肺炎嘅言論之後發表聲明，否認李毅係佢哋嘅研究員。

因為發表武統言論被驅逐出境

2019年4月，李毅受親共團體中國和平統一促進會（統促會）邀請訪台演講，因為曾經發表武力統一台灣嘅言論，結果喺去台灣嘅時候被驅逐出境。當時行政院長蘇貞昌直情話佢更勝於「恐怖分子」。

武漢肺炎『死咗四千人等於無死人』言論

2020年11月，李毅喺深圳灣論壇發表演講嘅時候，話中國死4千人同美國死22萬人相比，中國等於一個人都無死，又話而家中國經濟一枝獨秀，中國將美國迫到活唔到落去。呢段言論引起嘩然，喺美國同中國都引起極大爭議，《新京報》指責佢自以為幽默同自信，完全無對生命嘅尊重，好多網民批評佢人渣、冷血、無人性，反問佢點解仲揸住綠卡，有美國網民直情話佢反人類。李毅喺網站《烏有之鄉》發文指《新京報》所述不實，話呢啲係「國內外敵對勢力」對佢嘅惡意攻擊，但係李毅嘅反擊招致更多媒體同學者嘅嚴厲批評，批評佢係「愛國」外衣嘅投機者。