李福兆Ronald Li Fook-shiu1929年1月2014年12月27號),前香港交易及結算所主席。1987年10月股災時下令停市四日,引嚟各方指摘。1988年喺做聯交所主席時非法收受利益被判坐花廳

生平 編輯

李福兆係香港名門李佩材家族後人,李作元嘅細仔,亦係李國寶李國章阿叔。喺香港大學畢業之後留學美國,攞咗個工商管理碩士學位,同埋會計師資格。1969年創立遠東交易所,做咗第一任主席1986年四會合併,當選做聯交所主席。

1987年10月19號發生世界性股災,聯交所史無前例宣佈停市四日,成為全世界唯一喺股災時停市嘅股票市場。社會已經有輿論質疑聯交所停市決定嘅理據,前香港立法局議員李柱銘喺立法局會議上要求李福兆辭咗聯交所主席個職位。

10月26號挨晚,當聯交所開記者會解釋停市決定,一個澳洲記者質疑停市同李福兆私人利益嘅關係,呢個決定合唔合法。李福兆勃然大怒,用食指直指向嗰個記者,用拳頭面,要求嗰個記者道歉,李福兆話:「噉係惡意誹謗。」「講出你個名,我要我嘅律師記低。」「我今下就畀張告票你。」「告佢,帶佢去差館,帶佢去差館。」聯交所高層職員勸過李福兆冷靜,冇用,一眾記者於是將嗰個澳洲記者拖離會議室,記者會喺喧吵聲中結束。

同年底聯交所改選,李福兆只係做副主席。1988年1月2號,李福兆畀香港廉政公署拉咗,指控佢身為聯交所主席時,喺審核公司招股上市過程入便,非法收受新上市公司配售嘅股份,從中獲利。結果被判罪名成立,坐四年監。出獄之後喺泰國定居,過退休生活,喺2014年,因胃癌與世長辭

屋企人 編輯

李福兆有兩個仔一個女,分別係李國麟律師、李國祥、李志行,馬墉宜係佢嘅女婿,葉亦楠葉傲冬嘅堂大佬)係佢嘅孫女婿。

馬主生涯 編輯

1970年代1980年代中期,李福兆係香港賽馬會出名嘅大馬主,個人名下馬以「一起」兩字起名,而佢有份嘅遠東交易所團體嘅名下馬就以「東」字開頭。